مۇعالىمدەر بىلىكتىلىگىن كوتەرۋگە عىلىمي تۇرعىدان قاراۋىمىز قاجەت
مىنە, ءبىر جىل بويى پەداگوگيكالىق كادرلاردىڭ بىلىكتىلىگىن ارتتىرۋ جۇيەسى جاڭا فورماتتا جۇمىس جاساپ كەلەدى. پرەزيدەنت نۇرسۇلتان نازارباەۆتىڭ تاپسىرماسى بويىنشا جۇرگىزىلگەن ءبىلىم بەرۋ جۇيەسىن جاڭارتۋ ءۇردىسى پەداگوگيكالىق كادرلاردىڭ بىلىكتىلىگىن ارتتىرۋدىڭ يننوۆاتسيالىق مودەلىن – «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامىن قۇرۋعا مۇمكىندىك بەردى.
مۇعالىمدەر بىلىكتىلىگىن كوتەرۋگە عىلىمي تۇرعىدان قاراۋىمىز قاجەت
مىنە, ءبىر جىل بويى پەداگوگيكالىق كادرلاردىڭ بىلىكتىلىگىن ارتتىرۋ جۇيەسى جاڭا فورماتتا جۇمىس جاساپ كەلەدى. پرەزيدەنت نۇرسۇلتان نازارباەۆتىڭ تاپسىرماسى بويىنشا جۇرگىزىلگەن ءبىلىم بەرۋ جۇيەسىن جاڭارتۋ ءۇردىسى پەداگوگيكالىق كادرلاردىڭ بىلىكتىلىگىن ارتتىرۋدىڭ يننوۆاتسيالىق مودەلىن – «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامىن قۇرۋعا مۇمكىندىك بەردى.
قازىردە كادرلىق قۇرامدى جانە ونىڭ الەۋەتىن دامىتۋ ءۇشىن بارلىق جاعداي جاسالۋدا. بىلىكتىلىكتى ارتتىرۋ جۇيەسىنە عىلىمي تۇرعىدان كەلمەي, ءتيىمدى ناتيجەگە قول جەتپەيتىنى بەلگىلى بولىپ وتىر. ويتكەنى, ءبىلىم بەرۋ سالاسىندا جۇرگىزىلىپ جاتقان رەفورمالار جاڭا فورماتسيالى مۇعالىمدى دايارلاۋدى قاجەت ەتەدى. سالاداعى عالىمدار مەن تاجىريبەلى ماماندار جۇمىسىنىڭ ۇيلەسىمدىلىگى, سونىمەن بىرگە, بارلىق وبلىستىق بىلىكتىلىكتى ارتتىرۋ ينستيتۋتتارىن ءبىر قۇرىلىمعا بىرىكتىرۋ وسى مىندەتتىڭ ەڭ دۇرىس شەشىمى رەتىندە تانىلادى.
«ورلەۋ» بىلىكتىلىكتى ارتتىرۋ ۇلتتىق ورتالىعىنىڭ قوستاناي وبلىستىق فيليالى – پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ ماتەريالدىق-تەحنيكالىق بازاسى زامان تالابىنا تولىق ساي كەلەدى. وندا 5 كومپيۋتەرلىك سىنىپ بار, ونىڭ بىرەۋى پلانشەتپەن جابدىقتالعان, ءبىلىمىن ارتتىرۋ ءۇشىن كەلگەن مۇعالىمدەردىڭ ىزدەنۋىنە وتە قولايلى. بىزدە وقىتۋشىلار قۇرامىنىڭ الەۋەتى دە جوعارى, ولاردىڭ اراسىندا عىلىم كانديداتتارى بار. قاتارىمىزعا جاڭاشا ويلايتىن تەگەۋرىندى جاستاردىڭ قوسىلۋى دا سەنىمدىلىكتى ارتتىرا تۇسەدى. بىراق وسى ماتەريالدىق بازا مەن پروفەسسورلار قۇرامىنىڭ الەۋەتى, ولاردىڭ ءبىلىمى مەن تاجىريبەسى تولىق قۋاتىندا پايدالانىلىپ وتىرىلعان جوق. وعان وسى سالاداعى مەملەكەتتىك تاپسىرىستىڭ ازايۋى مەن شىنايى ەمەس باسەكە باستى سەبەپ بولىپ وتىر. ماتەريالدىق-تەحنيكالىق بازاسى سىن كوتەرمەيتىن, ونى جاسايتىن عيماراتى جوق مەكەمە مەن ماتەريالدىق بازاسى مىقتى, تاجىريبەسى مەن ءبىلىمى جوعارى دەڭگەيدەگى وقىتۋشىلار قۇرامى بار ينستيتۋتتى سالىستىرۋعا بولا ما؟ ءبىلىم بەرۋ سالاسىنداعى باسەكە شىنايى بولسا يگى.
وسى جىلى فيليال وقىتۋشىلارىنىڭ 200-دەن ارتىق عىلىمي ماقالاسى جارىق كورىپ, 55 ادىستەمەلىك قۇرال, ۇسىنىمدار مەن باعدارلامالارى باسىپ شىعارىلدى, سونىڭ ىشىندە: «تەحنيكالىق جانە كاسىپتىك ءبىلىم بەرۋ ۇيىمدارىندا ءدۋالدى ءبىلىم بەرۋ جۇيەسىن ەنگىزۋ» ادىستەمەلىك ۇسىنىمدارى, «پەداگوگتىڭ كاسىبي دامۋىن پسيحولوگيالىق قولداۋ», «زەرەك بالا» مەكتەپكە دەيىنگى تاربيە بەرۋ جانە وقىتۋ باعدارلاماسى, تاعى باسقا دا كوپتەگەن رەسپۋبليكالىق, وڭىرلىك جانە وبلىستىق دەڭگەيدەگى ءىس-شارالار جوعارى عىلىمي-ادىستەمەلىك دارەجەدە وتكىزىلدى. ۋاقىت تالابىنا سايكەس مەرزىمدى باسپا ونىمدەرىنىڭ سانىن ارتتىرۋ قاجەتتىلىگى تۋىندادى. قازىر ءبىزدىڭ كادرلىق جانە رەسۋرستىق الەۋەتىمىز «ءبىلىم-ينفو» اقپاراتتىق-ادىستەمەلىك جۋرنالىن, «ۆەستنيك ورلەۋ – kst» عىلىمي-ادىستەمەلىك جۋرنالىن, «ورلەۋ – قوستاناي داۋىسى» گازەتىن, «ترەنەر – education» رەسپۋبليكالىق اقپاراتتىق-ادىستەمەلىك جۋرنالىن شىعارۋعا مۇمكىندىك بەرەدى.
مۇعالىمدەردىڭ بىلىكتىلىگى ولاردى دايىندايتىن وقىتۋشى-پروفەسسورلار قۇرامىنىڭ جۇمىسىنا تىكەلەي بايلانىستى. سوندىقتان, الدىمەن ينستيتۋتتا جاڭا فورماتتى وقىتۋشى-ترەنەرلەردى دايىنداۋ ورتالىقتارىن اشۋعا ءتيىسپىز. رەسپۋبليكالىق, حالىقارالىق دەڭگەيدەگى كونفەرەنتسيالار مەن سەمينارلارعا قاتىسۋ جاڭا ىزدەنىستەرگە باستايدى. ءبىلىم سالاسىندا ۇيرەنەتىن ۇزدىك ءتاجىريبەسى بار سولتۇستىك كورەيا, ۇلىبريتانيا, فرانتسيا, اۆستراليادا بىلىكتىلىكتى ارتتىرۋ بىزگە شەتەلدىك تاجىريبەنىڭ جەتىستىكتەرىن زەرتتەۋ مەن قازىرگى جاعدايعا بەيىمدەۋگە, سول ارقىلى بىلىكتىلىكتى ارتتىرۋدىڭ يننوۆاتسيالىق مودەلىن جاساۋعا كومەكتەسەدى. ارينە, سىرتتان ۇيرەنۋ ۇزاق جىلدار قالىپتاسقان وتاندىق تاجىريبەنى كەرى يتەرۋ دەگەن ءسوز ەمەس, قايتا ونى شەتەلدىك وزىق ادىستەمەلەرمەن دامىتا, جاڭعىرتا ءتۇسۋىمىز قاجەت.
بۇگىنگى تاڭدا «ورلەۋ» بىلىكتىلىكتى ارتتىرۋ ۇلتتىق ورتالىعى» اكتسيونەرلىك قوعامى – ءموبيلدى, بولىپ جاتقان وزگەرىستەرگە تەز جانە ۋاقتىلى يكەمدەلە بىلەتىن, پەداگوگيكالىق كادرلاردىڭ بىلىكتىلىگىن ارتتىرۋدى جوعارى عىلىمي-ءادىستەمەلىك دەڭگەيدە وتكىزۋدى قامتاماسىز ەتەتىن قۇرىلىم.
ماريونەللا سلەسار,
«ورلەۋ» بىلىكتىلىكتى ارتتىرۋ ۇلتتىق ورتالىعىنىڭ
قوستاناي وبلىستىق فيليالىنىڭ ديرەكتورى.
