قازىرگى ۋاقىتتا «قايىرىمدى ىستەر مارافونىن» 60-تان استام ۇەۇ مەن بيزنەس وكىلدەرى قولدادى. ولاردىڭ اراسىندا Samruk Kazyna Trust الەۋمەتتىك جوبالاردى دامىتۋ قورى, «ۆەرنىي كاپيتال» كومپانيالار توبى, قازاقستاننىڭ ازاماتتىق اليانسى, ۇلتتىق ەرىكتىلەر جەلىسى, قازاقستاندىق سپورتشىلار وداعى, «قوعامدىق ماڭىزى بار باستامالاردى دامىتۋ قورى» قق, «Altyn Qyran Foundation» قق, «Aitas KZ» اق, «كار-تەل» جشس, «استاناگاز» جشس, «وپەراتور روپ» جشس, ل.گۋميلەۆ اتىنداعى ەۇۋ بار.
15-21 اقپان ارالىعىندا «قايىرىمدى ىستەر مارافونى» اياسىندا ەلىمىزدىڭ تۇكپىر-تۇكپىرىندە 135 ءىس-شارا وتكىزىلىپ, 2000-نان استام ادامعا قولداۋ كورسەتىلدى.
شىعىس قازاقستان وبلىسىندا ەرىكتىلەر از قامتىلعان وتباسىلارعا ازىق-ت ۇلىك سەبەتتەرىن تاراتىپ, قارت ادامدارعا ۇيدە كومەك كورسەتۋ ءۇشىن «ەشكىم جالعىز قالمايدى» قايىرىمدىلىق اكتسيالارىن وتكىزدى.
اقتوبە وبلىسىندا «قايىرىمدى ىستەر مارافونى» اكتسياسى رەسمي تۇردە باستالدى. قايىرىمدىلىق مارافونى بارىسىندا مۇمكىندىگى شەكتەۋلى 15 ادام «شيپاگەر» ساۋىقتىرۋ ورتالىعىندا ەمدەلۋگە جولداما الدى.
ۆولونتەرلىك ۇيىمداردىڭ باسشىلارى تاۋەلسىزدىك قۇرداستارىنىڭ اتىنان «قايىرىمدى ىستەر مارافونى» جالپىۇلتتىق جوباسىن قولداۋعا شاقىردى. ولار قيىن ومىرلىك جاعدايعا تاپ بولعان ق.مەيرامعاليدىڭ وتباسىنا 400 مىڭ تەڭگە سوماسىندا سەرتيفيكات تابىس ەتتى. بۇل قاراجات تۇرعىن ءۇي ساتىپ الۋعا باستاپقى جارنا رەتىندە پايدالانىلاتىن بولادى.
ەستەرىڭىزگە سالا كەتەيىك, قازاقستان تاۋەلسىزدىگىنىڭ 30 جىلدىعى اياسىندا مەملەكەت باسشىسىنىڭ باستاماسىمەن «قايىرىمدى ىستەر مارافونى» جالپىۇلتتىق جوباسى باستاۋ الدى. مارافونعا قاتىسۋعا بارلىق قازاقستاندىقتار, سونىڭ ىشىندە مەملەكەتتىك جانە قوعامدىق ۇيىمدار, بيزنەس جانە جوو وكىلدەرى شاقىرىلدى.
