اقتوبە مۇناي-گاز كوللەدجىن بىتىرگەن سوڭ بىردەن تۋعان اۋىلىنا ورالىپ, كاسىپكەرلىكپەن اينالىسۋدى ءجون كورەدى. بادامشا ەلدى مەكەنىندە ءۇي جيھازدارىن جۋىپ-تازالايتىن تسەح اشقىسى كەلگەن جاس وتكەن جىلدىڭ كوكتەمىندە كاسىپكەرلىك نەگىزدەرىنە ۇيرەتەتىن كۋرستا وقىپ, بيزنەس-جوباسىن دايارلايدى. تىنىمسىز ىزدەنىسى ارقىلى 550 مىڭ تەڭگە قايتارىمسىز گرانتقا قول جەتكىزگەن سوڭ وسى قارجىعا بىردەن جيھاز تازالايتىن جابدىقتار ساتىپ الدى. باستاپقىدا باۋىرجانعا اتا-اناسى, تۋىستارى قولۇشىن بەرىپ, شارۋاسىنىڭ ءجۇرىپ كەتۋىنە جان-جاقتى قولداۋ كورسەتتى.
وتكەن جىلدىڭ كوكتەمىنەن باستالعان كارانتيندىك شەكتەۋلەر مەن لوكداۋن كەزىندە جۇمىسىن كىبىرتىكتەپ باستاعان جاس كاسىپكەر وسى كەزگە دەيىن جۇمىسىن بىرقالىپتى جۇرگىزدى. قازىر ونىڭ بادامشاداعى شاعىن تسەحىندا 3 ادام ەڭبەك ەتەدى. ءوزى بوس ۋاقىتىندا كولىك جوندەۋمەن دە اينالىسادى.
ەلگە كەلگەن ىندەت كەسەلىن تيگىزبەسە, اۋىلدا قىزمەت كورسەتۋ ورىندارىن اشۋ تۇراقتى تابىس اكەلەتىن جۇمىس. الداعى ۋاقىتتا كاسىپكەرلىك اياسىن كەڭەيتىپ, بادامشادا كولىك جۋاتىن ورىن اشۋدى دا جوسپارىنا ەنگىزگەن باۋىرجان نۇرماعانبەتوۆ مەملەكەتتەن قايتارىمسىز گرانت تۇرىندە العان ءاربىر تەڭگە ماقساتتى تۇردە جۇمسالۋى ءتيىس ەكەنىن جەتكىزدى. «كاسىپكەرلىكتىڭ باستاۋىندا ءاردايىم ءتارتىپ پەن جاۋاپكەرشىلىك تۇرادى. قارجى ماقساتتى تۇردە جۇمسالسا عانا ءبىراز ۋاقىتتان سوڭ ەسەلەنىپ قايتادى. سوندا عانا جاڭا جۇمىس ورنى اشىلىپ, باستاپقى قاراجات مەملەكەتكە سالىق تۇرىندە قايتىپ ورالادى. ول ءۇشىن جاستار ەرىنبەي ەڭبەك ەتۋى ءتيىس». اۋىل جاستارى كەز كەلگەن شارۋانى قولعا الىپ, پايدالى ىسپەن شۇعىلدانۋى ءتيىس دەگەن ۇستانىمىن جەتكىزگەن جاس كاسىپكەر قالاۋىن تاپقان ادامعا اۋىلدا دا جۇمىس جەتكىلىكتى دەگەن پىكىردە.
اقتوبە وبلىسى
