ەكىنشى ورىندى باتىس قازاقستان وبلىسى يەلەنسە, ۇزدىك ۇشتىكتى اتىراۋ وبلىسى قورىتىندىلادى.
جارىستا ەلىمىزدىڭ ون ەكى وڭىرىنەن, ياعني الماتى, اقمولا, جامبىل,قىزىلوردا, شقو, بقو, اقتوبە, اتىراۋ, قاراعاندى وبلىستارىنان, سول سياقتى نۇر-سۇلتان, الماتى جانە شىمكەنت قالالارىنان 372 سپورتشى باق سىنادى.
سونداي-اق جارىسقا رەسپۋبليكالىق كيوكۋشينكاي-كان كاراتە فەدەراتسياسىنىڭ پرەزيدەنتى ومارحان وكسىكباەۆ پەن قر سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ قاتىسىپ, جارىس جەڭىمپازدارى مەن جۇلدەگەرلەرىن ارنايى ماراپاتتادى.
ءۇش كۇنگە سوزىلعان دودا سانيتارلىق تالاپتارعا ساي ۇيىمداستىرىلدى. كيوكۋشينكاي-كان كاراتەدەن نۇر-سۇلتان قالاسى قۇراماسىنىڭ اعا جاتتىقتىرۋشىسى داستان ابجانوۆ كارانتين سپورتشىلاردىڭ جاتتىعۋىنا اسەرىن تيگىزبەي قويماعانىن ايتتى.
«جارىس جوعارى دارەجەدە ءوتتى. سانيتارلىق نورمالار قاتاڭ تۇردە ساقتالدى. قاتىسۋشىلار ءار ۋاقىتقا ءبولىنىپ, جەكە-جەكە شىعارىلدى. شىنى كەرەك سپورتشىلارعا ءبىراز قيىنداۋ بولدى. كارانتيننەن كەيىنگى العاشقى جارىس بولعاندىقتان, دايىندىقتىڭ جەتكىلىكتى بولماعانى بايقالدى. بۇدان دا جوعارى ناتيجە كورسەتۋگە بولاتىن ەدى, دەگەنمەن بۇل كورسەتكىش تە جامان ەمەس», دەدى داستان دۇيسەنباي ۇلى.
