وسىدان جيىرما جىل بۇرىن باشقۇرتستاننان قارعالى اۋدانىنىڭ قايراقتى اۋىلىنا جەكە كاسىبىنىڭ شارۋاسىمەن كەلىپ قونىستانىپ قالعان زاكير ابسالياموۆ بۇل كۇندە ءۇش بالانىڭ اكەسى, بەس نەمەرەنىڭ اتاسى. وسى اۋىلدىڭ زيادا ەسىمدى بويجەتكەنىمەن باس قوسىپ, تۇراقتاپ قالادى.
– قازىر بالالارىم ءوستى, ءبارى وتباسىلى, جان-جاقتا تۇرادى. اقتوبە قالاسىنان نەمەرەلەرىم ءجيى كەلەدى. ادەتتە قىسقى, جازعى كانيكۋلدى ء بىزدىڭ قاسىمىزدا وتكىزەتىن ەرەسەك نەمەرەلەرىم اعاشتان جاساعان مۇسىندەرگە قاتتى قىزىعىپ, قاسىمدا ءجۇرىپ ۇيرەنگىسى كەلەدى. بەس جاستاعى ەڭ كىشكەنتاي نەمەرەم قالادان كەلگەندە شارباقتاعى قار مەن مۇزدان سوعىلعان ءمۇسىندى قىزىق كورەدى. ءوز باسىم قىستا نەمەرەلەرىممەن اققالا سوققاندى ۇناتامىن. ەكى-ءۇش جىلدان بەرى جەلتوقساننىڭ سوڭعى ءتۇنى جاڭا جىلدىڭ سيمۆوليكالىق بەينەسىن كەسكىندەپ, مۇزدان ءمۇسىن ويۋدى ادەتكە اينالدىردىم. بيىلعى سيىر جىلى ەلىمىزگە تىنىشتىق, قۇت-بەرەكە اكەلسىن, قيىندىقتى بىرگە ەڭسەرىپ, جاقسى كۇنگە جەتەيىك دەگەن تىلەكپەن ءۇيدىڭ اۋلاسىنا وگىزدىڭ ءمۇسىنىن مۇزدان ويىپ تۇرعىزدىم, دەيدى زاكير ابسالياموۆ.
كورشىلەرى اۋەلدە جەلتوقساننىڭ سوڭعى كۇنى ء تۇرلى اڭ-قۇستىڭ ءمۇسىنىن قاردان سوعىپ, مۇزدان ويىپ الەككە ءتۇسىپ جاتقان زاكيردىڭ ءىسىن قىزىق كورگەن. دەگەنمەن, كوز تارتارلىقتاي سۇلۋ اڭ-قۇستاردىڭ قاتارلاسا تىزىلگەنىن كورگەن ولار جىلدىڭ سوڭعى ءتۇنى زاكيرگە قولعابىسقا كەلەدى. ء تىپتى كەيبىر كورشىلەرى ۇيلەرىنىڭ جانىندا اڭ-قۇستاردىڭ بەينەسىن سوعا باستاعان. وسىلايشا قايراقتىداعى مۇزدان ءمۇسىن جاساۋدىڭ شەبەرلىك ساباقتارى تەككە كەتكەن جوق. ەندى جەلتوقساننىڭ سوڭعى ءتۇنى ابسالياموۆتار ءۇيىنىڭ جانىنداعى ءمۇسىن سوعۋ مەرەكەسىنە قايراقتى اۋىلىنىڭ تۇرعىندارى ءبىرى قالماي جينالاتىن بولدى.
زاكيردىڭ قولونەرگە دەگەن قۇلشىنىسى سوناۋ بالا كەزىنەن ويانعان ەكەن. كىشكەنتايىنان اعاشتى جونىپ, ءار ءتۇرلى بەينەلەر جاساۋدى جاقسى كورگەن ول ورتا مەكتەپتى بىتىرگەن سوڭ باشقۇرتستانداعى كوركەمسۋرەت ۋچيليششەسىنە وقۋعا ءتۇسۋدى جوسپارلايدى. بىراق كاسىبي سۋرەتشى-بەزەندىرۋشى بولۋعا مۇمكىندىگى بولماي قالسا دا, وسى كەزگە دەيىن اۋەسقويلىعىن تاستامايدى. ول ءۇيىنىڭ اۋلاسىنداعى اعاشتان سوققان شەبەرحاناسىندا قولى بوساعان كەزدە اعاشتان ءتۇرلى بەينەلەر جاسايدى.
اعاشتان ءتۇيىن تۇيگەن شەبەر قايراقتىسىن جاقسى كورەدى. وتە ەڭبەككقور جاننىڭ اۋلاسىندا سىنىق ءشوپ تە جاتپايدى, جۇمىستان قولى بوساعاندا جازداي شارباعىنداعى جەمىس اعاشتارى مەن گۇلدەرىن باپتايدى. بۇل كىسىنىڭ ءۇيىنىڭ زاتى ءوز ورنىندا, قيسايعان شارباق, توپساسى ءتۇسىپ قالعان سىقىرلاۋىق قاقپا دەگەن بۇل ۇيدە جوق. قولى التىن ازامات اۋىل تۇرعىندارىنىڭ ەلەكتر جەلىلەرىن جوندەپ, سىمدارىن جالعاپ قانا قويماي, شارباقتارىنىڭ قيسايعان جەرىن دە تۇزەپ بەرەدى. قايراقتى اۋىلىنىڭ كىرەبەرىسىندە دالا بۇركىتى بەينەلەنگەن ستەللا تۇر. قاناتىن قومداپ, ۇشقالى تۇرعان ء ور دە تاكاپپار دالا بۇركىتىن زاكير اعاشتان جاساپ, اۋىلعا سىيعا تارتقان. «بۇركىت – بوستاندىق پەن تاۋەلسىزدىكتىڭ» بەينەسى دەيدى شەبەر.
زاكير قايراقتى اۋىلىنىڭ ورتاسىندا شاعىن بالالار الاڭىن دا ءوز قولىمەن تۇرعىزدى. «اۋىلىمىزدا ارنايى جابدىقتالعان ويىن الاڭى جوق. جازعى كانيكۋلدا بالالار جاتتىقسىن دەگەن ويمەن دانەكەرلەگىش اپپاراتتىڭ كومەگىمەن بىرنەشە تۋرنيك, ء ۇش اتكەنشەك جاسادىم. اۋىلداستارىم قولدان جاسالعان قوندىرعىلاردى ويىن الاڭىنا مىقتاپ بەكىتتى», دەيدى زاكير.
قايراقتى اۋىلىنىڭ تۇرعىندارى قولى التىن ازاماتقا ءدان ريزا. اۋىلدىڭ تازا, كورىكتى, ءساندى بولۋىنا كوپ ۇلەس قوسىپ جۇرگەن ازامات ەڭبەگىن بۇلدامايدى, ۇندەمەي-اق كوپ ءىس تىندىرىپ ءجۇر.
