ولاردىڭ ەسەپتەۋىنشە, قازاقستاندا كولەمى 90 شارشى مەتر بولاتىن, 20 جىلعا يپوتەكاعا بەرىلەتىن پاتەر نەمەسە ءۇي ساتىپ الۋ كەزىندەگى اي سايىنعى تولەم ءبىر وتباسىنىڭ اي سايىنعى تابىسىنان 1,5 ەسە اسىپ تۇسكەن. ەڭ قولجەتىمدى يپوتەكا – ساۋد ارابياسى, اقش, پۋەرتو-ريكو ەلدەرىندە ەكەن. بۇل ەلدەردەگى يپوتەكانىڭ اي سايىنعى تولەمى ءبىر وتباسىنىڭ ايلىق تابىسىنىڭ 30 پايىزىن عانا قۇراعان.
ءوزىمىز ءجيى سالىستىراتىن ەاەو ەلدەرىنىڭ ىشىندەگى ۇزدىك كورسەتكىش رەسەيگە تيەسىلى – 65-ورىن. الايدا ونداعى اي سايىنعى تولەم ءبىر وتباسىنىڭ كىرىسىنەن 30,3 پايىزعا كوپ. ارمەنيا – 93, بەلارۋس – 96, قىرعىزستان 98-ورىندا. بۇل ەلدەردەگى يپوتەكانىڭ ايلىق تولەمى ءبىر وتباسىنىڭ ايلىق تابىسىنان سايكەسىنشە 2,3, 2,5 جانە 2,6 ەسە جوعارى.
رەيتينگتى ارگەنتينا قورىتىندىلايدى: اي سايىنعى تولەم ءبىر وتباسىنىڭ ءبىر ايدا جيىپ-تەرگەن تابىسىنان 9,4 ەسە جوعارى ەكەن. يران (108), سيريا (107) ەلدەرىنىڭ دە جاعدايى ءماز ەمەس.
قازاقستان بىلتىرمەن سالىستىرعاندا جاعدايىن ءبىرشاما جاقسارتقان. 2020 جىلى ءبىزدىڭ ەل 104 ەلدىڭ ىشىنەن 80-ورىن الىپ, ايلىق تولەم وتباسىنىڭ ايلىق تابىسىنان 77 پايىزعا اسىپ كەتكەن. ال بەس جىل بۇرىن 78-ورىندا بولىپپىز.
ەلىمىزدە زەينەتاقى قورىنان تۇرعىن ءۇي جاعدايىن جاقسارتۋ ماقساتىندا قارجى الۋ باستاماسى باسپانا باعاسىنىڭ قىمباتتاپ كەتۋىنە اكەلىپ سوقتى. ءبىر جىل ىشىندە 1 شارشى مەتر جاڭا ءۇي باعاسى 8,2 پايىزعا ءوسىپ, 319,3 مىڭ تەڭگە بولعان. بۇل – سوڭعى بەس جىلداعى ەڭ جوعارى كورسەتكىش. قايتالاما نارىقتاعى ءۇيدىڭ ءبىر شارشى مەترى سوڭعى جىلدا 20,5 پايىزعا شارىقتاپ, 244,7 مىڭ تەڭگە بولعان. تەك بيىل قاڭتار ايىنىڭ وزىندە جاڭا ۇيلەردەگى 1 شارشى مەتر قۇنى 3,8 پايىزعا, قايتالاما نارىقتا 7,2 پايىزعا قىمباتتاعان.
تەلەگرامداعى Risk Takers كانالىنىڭ اۆتورى ەلدەگى باسپانا باعاسىنىڭ سەكىرىپ كەتۋىنە مەملەكەتتىڭ ءوزى كىنالى دەپ سانايدى. جاقىندا رەسەي بانكىنىڭ توراعاسى ەلۆيرا نابيۋللينا ەلدەگى ۇسىنىس سۇرانىسقا ىلەسە الماي, بۇل باسپانا باعاسىنىڭ قىمباتتاۋىنا ىقپال ەتكەنىن ايتقان. وسىنى نەگىز ەتكەن كانال اۆتورى رف ۇكىمەتىنىڭ ارەكەتى ءۇي باعاسىن ءوسىرىپ جىبەردى, ءبىزدىڭ احۋال دا وسىعان ۇقساس دەيدى.
«زەينەتاقى قارجىسىن پايدالانۋ اسىرەسە جالعا بەرىلەتىن تۇرعىن ءۇي مەن قايتالاما نارىقتاعى ءۇي باعاسىنىڭ وسۋىنە اسەر ەتتى. رەسەي سۇرانىستى ىنتالاندىرعان جاعىمسىز اسەردى ءتۇسىنىپ جاتسا, قازاقستاندا شەنەۋنىكتەر مەن مۇددەلى تاراپتار ازىرگە ءوز پوزيتسياسىن قورعاپ اۋرە. رەسمي تۇلعالار سپەكۋلياتسيا جاسادى دەپ ساتۋشىلاردى ايىپتايدى نەمەسە باسقا سەبەپتەر ىزدەيدى. ونىڭ ۇستىنە نەگاتيۆ اقپاراتتى ازايتۋ ءۇشىن PR مامانداردى جالداۋدان دا تايىنبايدى. ولار بەنەفيتسيارلار بانكتەر مەن قۇرىلىس كومپانيالارى ەكەنىن ۇمىتىپ تا كەتەدى. قازىر تەك اقشا العاندار تۋرالى عانا ايتىپ جاتىر», دەيدى اۆتور.
ەلىمىزدە بىلتىر 15,3 ملن شارشى مەتر تۇرعىن ءۇي سالىندى. بۇل 2019 جىلمەن سالىستىرعاندا 16,8 پايىزعا كوپ. مەملەكەت بيىل 17 ملن شارشى مەتر باسپانا سالۋدى جوسپارلاپ وتىر.
