«قازمەديا» ورتالىعىندا قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتى ارقاۋىندا «ادەبيەت پورتالى» ينتەرنەت-رەسۋرسىنىڭ تۇساۋكەسەر ءراسىمى ءوتتى.
«قازمەديا» ورتالىعىندا قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتى ارقاۋىندا «ادەبيەت پورتالى» ينتەرنەت-رەسۋرسىنىڭ تۇساۋكەسەر ءراسىمى ءوتتى.
پورتالدى مادەنيەت جانە اقپارات مينيسترلىگىنىڭ جانە پرەزيدەنت جانىنداعى ورتالىق كوممۋنيكاتسيالار قىزمەتىنىڭ قولداۋىمەن «قازكونتەنت» اكتسيونەرلىك قوعامى ازىرلەگەن. جيىندا «قازكونتەنت» اكتسيونەرلىك قوعامى باسقارما باسشىسىنىڭ ورىنباسارى نارتاي ءاشىم زامان تالابىنا سايكەس تۋعان ادەبيەتىمىزدىڭ دە ينتەرنەت جۇيەسىنەن ءوز ورنىن الاتىن ءساتتىڭ جەتكەنىن باياندادى. ۆەب-پورتالدىڭ نەگىزگى ماقساتى – جاس اقىن-جازۋشىلارعا اقپاراتتىق قولداۋ كورسەتىپ, قازاق ادەبيەتىن ينتەرنەت الەمىندە جۇيەلى تۇردە ناسيحاتتاۋ ەكەنىن, مۇندا قازاق جانە الەم ادەبيەتىنىڭ ۇلكەن ەلەكتروندى قورى جيناقتالعانىن جەتكىزدى. «ادەبيەتشىلەر مۇنداعى كىتاپتارعا ونلاين تۇرىندە سىن-پىكىرلەرىن قالدىرا الادى. پورتال ەنتسيكلوپەديالىق قىزمەت اتقارادى. بۇل جەردە ءار اۆتورعا جەكە بەت ارنالعان جانە ولاردىڭ شىعارماشىلىعىنا قاتىستى بارلىق دەرەكتەر توپتاستىرىلعان. ءار اۆتور ءوز شىعارماشىلىعىن ۇدايى دامىتۋ ماقساتىندا ادەبي بلوگ جۇرگىزە الادى. پورتالدا جاس اۆتورلار ءۇشىن ارنايى «جاس اۆتورلار مىنبەرى» ايدارى جانە «اشىق مىنبەر» بلوگى دا ەسكەرىلگەن», – دەدى ول.
«ادەبيەت پورتالى» – تەك ونلاين كىتاپحانا عانا ەمەس, كاسىبي اقىن-جازۋشىلار مەن جاس اۆتورلار ءۇشىن دە بىرەگەي كوممۋنيكاتسيالىق ادەبي الاڭ. مۇندا «اۋدارما», «مازمۇن», «حات», «يلليۋستراتسيا» جانە «پوەزيا الەمى» جوبالارى بار. جوبالاردىڭ شەڭبەرىندە وقىرمان قازاق تىلىنە اۋدارىلعان الەم ادەبيەتىمەن, الەم تىلدەرىنە اۋدارىلعان وتاندىق شىعارمالارمەن, ادەبيەتتىڭ كورنەكتى وكىلدەرىنىڭ قۇندى حاتتارىمەن تانىسا الادى.
پورتالدىڭ تۇساۋكەسەر راسىمىنە اقىن, پارلامەنت سەناتىنىڭ دەپۋتاتى, قازاقستان جازۋشىلار وداعىنىڭ توراعاسى نۇرلان ورازالين قاتىستى. ول سوڭعى ونجىلدىقتا ينتەرنەت, سايت, پورتال ۇعىمدارىنىڭ قوعامدىق ومىرگە دەندەپ ەنگەنىن, بۇل ورايدا قازاق ادەبيەتى ءۇشىن دە ۇلكەن ءبىر پورتالدىڭ اشىلۋى قاجەتتىلىك ەكەنىن العا تارتتى. «ادەبيەت قاي داۋىردە دە حالىقتان بولەك ءومىر سۇرمەيدى. سوندىقتان ادەبي شىعارمالار ارقاشان دا وقىرماندارىن كۇتەتىنى زاڭدى. بۇل ورايدا ادەبيەتتى ناسيحاتتاپ, وقىرمانداردىڭ قاتارىن كوبەيتۋ ءۇشىن پورتال اشىپ جاتقان جىگىتتەرگە ريزاشىلىعىمدى ايتامىن. وتانداستارىمىزدىڭ كىتاپ وقۋعا دەگەن قۇلشىنىسى تومەن ەمەس. كىتاپ وقۋدىڭ جاڭا ءداۋىرى باستالعان تۇستا ونىڭ ەسەلەنەرى ءسوزسىز», دەدى ن.ورازالين.
قازىرگى ۋاقىتتا پورتالدا 1411-دەن اسا كىتاپ, 1184 اۆتوردىڭ جەكە پاراقشاسى جانە «جاس اۆتورلار مىنبەرى» ايدارىندا رەسپۋبليكاعا تانىلا باستاعان 27 اۆتور ورنالاسقان. پورتالداعى كىتاپتار ونلاين تۇرىندە Pdf جانە ePub ارنايى وقۋ جۇيەسى پىشىمىندە جاريالانادى.
ايگۇل سەيىلوۆا,
«ەگەمەن قازاقستان».
