ارقايسىسىنىڭ وزىنە ساي قىلىعى مەن قيىندىعى بار جىلدىڭ ءتورت مەزگىلىندە دالا توسىندە ەڭبەك كورىگىن قىزدىراتىن مۇنايشىلاردىڭ ەرەن ەڭبەگى, جالپى وسى سالانىڭ تىنىس-تىرشىلىگى مەن تولاعاي تابىسى ەلىمىزدەگى ءتۇرلى بۇقارالىق اقپارات قۇرالدارىنىڭ بەتىنەن ءتۇسىپ كورگەن جوق. دەسەك تە, كوبىنە مۇناي-گاز كومپانياسىنىڭ قىزمەتىنە قاتىستى جاريالانىمداردا مۇناي مەن گاز ءوندىرۋدىڭ كولەمى, ساقتاۋلى قورلار, ونەركاسىپتىڭ قۇرىلىمى جانە كىرىستەرى جايلى ايتىلادى. الايدا, «مەدالدىڭ ەكى جاعى بار» دەگەندەي, كومپانيانىڭ ءوز قىزمەتكەرلەرى ءۇشىن جاساپ جاتقان جۇمىستارى, الەۋمەتتىك جاۋاپكەرشىلىگى تۋرالى سيرەك جازىلاتىنى جاسىرىن ەمەس.
ارقايسىسىنىڭ وزىنە ساي قىلىعى مەن قيىندىعى بار جىلدىڭ ءتورت مەزگىلىندە دالا توسىندە ەڭبەك كورىگىن قىزدىراتىن مۇنايشىلاردىڭ ەرەن ەڭبەگى, جالپى وسى سالانىڭ تىنىس-تىرشىلىگى مەن تولاعاي تابىسى ەلىمىزدەگى ءتۇرلى بۇقارالىق اقپارات قۇرالدارىنىڭ بەتىنەن ءتۇسىپ كورگەن جوق. دەسەك تە, كوبىنە مۇناي-گاز كومپانياسىنىڭ قىزمەتىنە قاتىستى جاريالانىمداردا مۇناي مەن گاز ءوندىرۋدىڭ كولەمى, ساقتاۋلى قورلار, ونەركاسىپتىڭ قۇرىلىمى جانە كىرىستەرى جايلى ايتىلادى. الايدا, «مەدالدىڭ ەكى جاعى بار» دەگەندەي, كومپانيانىڭ ءوز قىزمەتكەرلەرى ءۇشىن جاساپ جاتقان جۇمىستارى, الەۋمەتتىك جاۋاپكەرشىلىگى تۋرالى سيرەك جازىلاتىنى جاسىرىن ەمەس.
قاي سالادا, قاي مەكەمەدە بولسىن, ءوز قاراماعىنداعى قىزمەتكەرلەردىڭ جاعدايىن جاساۋ, تۇرمىس-تىرشىلىگىن ءبىلىپ, قولدان كەلگەنشە قاجەتتىلىكتەرمەن قامتاماسىز ەتۋ جاعى قاراستىرىلادى. بۇل ەڭبەكتىڭ ونىمدىلىگىن ارتتىرۋ, ىشكى بەرەكە-بىرلىكتى ۇيىتا ءتۇسۋ ءۇشىن عانا ەمەس, جۇمىس بەرۋشى مەن جۇمىسشى اراسىنداعى ءوزارا سىيلاستىقتىڭ, تۇسىنىستىكتىڭ جانە وركەنيەت الەمىنە ۇمتىلعان جوعارى ادامگەرشىلىك قاعيداتتىڭ بۇلجىماس ورنەگى بولۋى ءتيىس. جوعارىدا توقتالعانىمىزداي, قاقاعان اياز بەن اپتاپ ىستىقتا قۇرىش بىلەگىنىڭ كۇشىن ەل ىرىسىنا جۇمساپ, جىگەرلەنە ەڭبەك ەتىپ جۇرگەن مۇنايشىلاردىڭ جاعدايىن جان-جاقتى جاقسارتۋدى «قازمۇنايگاز» بارلاۋ ءوندىرۋ» اق ەكىنشى كەزەككە ىسىرماي, ۇدايى نازاردا ۇستاپ كەلەدى. كومپانيادا بۇل مىندەتتى ونىڭ ەنشىلەس كاسىپورنى «KMG EP-Catering» جشس اتقارادى. اتالمىش سەرىكتەستىك مۇنايشىلاردى جۇمىس كۇندەرى, ۆاحتا كەزىندە تاماقپەن قامتاماسىز ەتىپ, ەڭبەكتەن تىس ۋاقىتتا دا ولار ءۇشىن قاجەتتى جاعدايلاردى جاساۋمەن اينالىسادى. سەرىكتەستىكتىڭ جاڭاوزەن, اتىراۋ قالالارىندا بولىمشەلەرى بار. قمگ ءبو كەن ورىندارى بولىمشەلەرىندەگى قىزمەتكەرلەردى تاماقپەن قامتاماسىز ەتۋ باستى مىندەتى بولىپ تابىلاتىن كومپانيا تەك اتىراۋ, ماڭعىستاۋ وبلىستارىنداعى تۇسكى اس ازىرلەيتىن, تۇراقتى اسحانالارعا عانا قىزمەت كورسەتپەيدى.
تاماقتاندىرۋ – وتە جوعارى جاۋاپكەرشىلىكتى جۇكتەپ, تازالىقتى تالاپ ەتەتىن جۇمىس. كومپانيا قۇزىرىندا ازىق-ت ۇلىكتى ساتىپ الۋدان باستاپ, اس دايىن بولعانعا دەيىنگى ارالىق تۇراقتى جانە مۇقيات باقىلاۋعا الىنعان.
– مەن وراسان زور ادام سانىنا جاۋاپ بەرەتىنىمدى ءبىر ءسات ەسىمنەن شىعارعان ەمەسپىن. ءبىز مۇنايشىلاردى قالاي تاماقتاندىرساق, ولاردىڭ كوڭىل-كۇيلەرى دە, جۇمىستارىنىڭ ساپاسى دا, ءتىپتى دەنساۋلىعى دا سوعان بايلانىستى بولماق. بايقاۋسىزدا كەتىپ قالعان تيتتەي قاتەلىك تە ۇلكەن ماسەلەلەرگە اكەلىپ سوقتىرۋى مۇمكىن. سوندىقتان, ءبىز كۇندەلىكتى جۇمىسىمىزعا زور جاۋاپكەرشىلىكپەن قارايمىز جانە قىزمەتكەرلەردەن ۇنەمى تازالىقتى, ساقتىقتى, جاۋاپتىلىق پەن كاسىبي شەبەرلىكتى تالاپ ەتىپ وتىرامىز, – دەيدى «KMG EP-Catering» جشس باس ديرەكتورى بەكقوجا بورانباەۆ.
اس ءمازىرى اۋىر جۇمىستاعى ادامداردىڭ اعزاسىنا قۋات بەرەتىن دارۋمەندەرگە باي, قۇنارلى تاعام تۇرلەرىمەن تۇراقتى تولىقتىرىلىپ وتىرىلادى, سونداي-اق, تاعامدار تاجىريبەلى كاسىبي اسپازدار قولىمەن وتە ءدامدى ەتىپ ازىرلەنەدى. اسحانالار مەن اس ۇيلەر ءتۇرلى تاعام دايىنداۋ تەحنولوگياسىنا قاجەتتى قۇرال-جابدىقتارمەن جاراقتاندىرىلعان, «تازالىق – دەنساۋلىق كەپىلى» دەگەندەي ءارى جۇمىسشىلار ءۇشىن جايلى, تازا.
دالا تابيعاتى مەن مىنەزى ادام قالاۋىنا باعىنبايدى. «قارا التىننىڭ» كومبەلەرى مۇنايلى ولكەلەردىڭ سىرىن بۇككەن سارى دالاسىنىڭ ءار قيىرىنا شاشىراي ورنالاسقان, ياعني كەن ورىندارىنىڭ ورنالاسۋ گەوگرافياسى اركەلكى. ءتىپتى, ولاردىڭ ءبىر-بىرىنەن اراقاشىقتىقتارى جۇزدەگەن شاقىرىمعا دەيىن سوزىلاتىندارى دا بار. مۇنداي شالعايداعى ۇڭعىمالاردا جوندەۋ جۇمىستارىمەن اينالىساتىن بريگادالار ءۇشىن تاعامدار ارنايى تەرموستارمەن جەتكىزىلەدى جانە وسى ماقساتتا كومپانيادا اسپاز-ەكسپەديتورلار جۇمىس ىستەيدى.
تاماقتاندىرۋ ماسەلەسىمەن بىرگە, «KMG EP-Catering» جشس كەن ورىندارىندا تۇرمىستىق-شارۋاشىلىق كەشەندەرىنە سەرۆيستىك قىزمەت كورسەتۋ جۇمىستارىن دا ءوز موينىنا العان. ارنايى تۇرعىزىلعان مودۋلدىك عيماراتتاردا ءاربىر جوندەۋشى نەمەسە تەحنيكا جۇرگىزۋشىلەرىنىڭ بريگاداسى ءۇشىن جابدىقتالعان كيىم اۋىستىراتىن بولمەسى, دۋش بولمەسى, كىر جۋاتىن ورنى, كيىم كەپتىرگىشى جانە دەمالاتىن بولمەسى بار.
«KMG EP-Catering» جشس مۇنايشىلارعا جاعداي جاساۋدىڭ كوپ سالالى بولۋىنا ءمان بەرىپ, كورسەتىلەتىن قىزمەت اياسىن جىلدان-جىلعا ۇلعايتىپ كەلەدى. سولاردىڭ ءبىرى – «كەندىرلى» دەمالىس ايماعىنداعى «اقبوبەك» بالالاردى ساۋىقتىرۋ ورتالىعىندا مۇنايشىلار مەن ولاردىڭ بالالارى ءۇشىن دەمالىس ۇيىمداستىرۋ. بارشا قازاقستاندىقتار ءۇشىن اتى ءمالىم كەندىرلى ايماعى جاڭاوزەن قالاسىنان 70 شاقىرىم جەردە, كاسپي تەڭىزىنىڭ جاعالاۋىندا ورنالاسقان دەمالىس ورنى. كوك تەڭىز جاعاسىندا التىن قۇمى كۇنگە شاعىلىسىپ, دەمالۋعا مەنمۇندالاي شاقىرىپ تۇراتىن كەندىرلى دەمالىس ورنى كوپشىلىككە كەڭىنەن تانىمال شەتەلدەردەگى جاعاجايلاردان كەم تۇسپەيدى. تۋريستىك كلاستەردى دامىتىپ, بولاشاق دامۋدىڭ نەگىزگى تەتىكتەرىنىڭ ءبىرى تۋريزم سالاسى رەتىندە قاراستىراتىن تاۋەلسىز قازاقستاننىڭ الىستان تۋريست شاقىرىپ, كەلگەنگە ماقتانا كورسەتىپ, مارقايا دەمالۋىنا ۇيالماي ۇسىناتىن نەگىزگى نۇكتەلەرىنىڭ ءبىرى وسى – كەندىرلى. ماقتاۋلى كەندىرلىنىڭ مۇنايشىلار ءۇشىن ەسىگى قاشان-دا اشىق. دەمالىس ورنى وزىندەگى بالالار لاگەرى, جابىق جانە اشىق ءجۇزۋ باسسەيندەرى, وتباسىلىق جانە جاستارعا ارنالعان كوتتەدجدەرى, جازعى ءدامحانالارى, مەيرامحانالارى, ويىن-ساۋىق ورتالىقتارى سىندى ينفراقۇرىلىمى جاعىنان شەتەلدىك ەڭ وزىق دەمالىس ورىندارىمەن تالاسا الادى. «كەندىرلى» دەمالىس ايماعىنا مۇنايشىلار ءوز وتباسىلارىمەن بىرگە دەمالۋعا جىلدىڭ كەز كەلگەن ۋاقىتىندا زور ىقىلاسپەن كەلەدى. ال سەرىكتەستىك ولاردى جىلى قارسى الىپ, كوڭىلدى جانە مازمۇندى دەمالۋى ءۇشىن لايىقتى قىزمەت كورسەتۋگە تىرىسادى. وسىلايشا, اۋقىمدى ىستەردى قولىنا العان «KMG EP-Catering» جشس جاڭاوزەندە جۋىردا عانا ۆاحتاشى-مۇنايشىلارعا ارناپ اشىلعان «شەرقالا» زاماناۋي قوناق ءۇيى مەن دەنەشىنىقتىرۋ-ساۋىقتىرۋ كەشەنىنە دە قىزمەت كورسەتەدى. سونىمەن قاتار, كومپانيانىڭ اتىراۋ, استانا قالالارىندا ءتۇرلى نىساندارى مەن كەڭسەلەرى بار. اڭگىمە, نىساندار مەن كەڭسەلەردىڭ سانىندا ەمەس, حالىققا, مۇنايشىلارعا ساپالى قىزمەت كورسەتۋدە, اۋىر قىزمەتتە قولتىعىنان دەمەۋدە, ەل نەسىبەسىنىڭ ارتۋىنا ءوز ۇلەسىن قوسۋدا جاتىر. اركەز وسى بيىكتەن كورىنۋدى مىندەت سانايتىن «KMG EP-Catering» جشس قىزمەت كورسەتۋدىڭ اياسىن عانا ەمەس, ساپاسىن دا زامان تالابىنا ساي جەتىلدىرۋ ۇستىندە. ويتكەنى, قىزمەت كورسەتۋ ۇلگىسى مەن ساپاسى زامان ىرعاعىمەن بىرگە كۇن ساناپ جەتىلە تۇسكەن زاماندا ءوز بىلىكتىلىكتەرىن دامىتۋدىڭ اسا ماڭىزدى ەكەندىگى بەلگىلى.
«KMG EP-Catering» جشس قازىر قىزمەت قىرلارىن دامىتا ءتۇسۋ ءۇشىن سونى ىزدەنىس ۇستىندە.
گۇلايىم شىنتەمىرقىزى,
«ەگەمەن قازاقستان».
