«نۇر وتان» پارتياسىنىڭ كەزەكتەن تىس حV سەزى جۇمىسىنا قىزىلجار وڭىرىنەن قاتىسقان دەلەگاتتار جاڭا ساياسي دوكترينانىڭ ءمان-ماقساتى مەن ماڭىزىن ءتۇسىندىرۋ شارالارىنا قىزۋ كىرىسىپ كەتكەن. ءبىز بەلسەندى ۇيىمداستىرۋشىلاردىڭ ءبىرى, پەتروپاۆل قالالىق ءماسليحاتىنىڭ دەپۋتاتى سايران حامزينگە جولىعىپ, فورۋمنان العان اسەرلەرى مەن تاريحي قۇجات توڭىرەگىندە پىكىر الىسقان ەدىك.
«نۇر وتان» پارتياسىنىڭ كەزەكتەن تىس حV سەزى جۇمىسىنا قىزىلجار وڭىرىنەن قاتىسقان دەلەگاتتار جاڭا ساياسي دوكترينانىڭ ءمان-ماقساتى مەن ماڭىزىن ءتۇسىندىرۋ شارالارىنا قىزۋ كىرىسىپ كەتكەن. ءبىز بەلسەندى ۇيىمداستىرۋشىلاردىڭ ءبىرى, پەتروپاۆل قالالىق ءماسليحاتىنىڭ دەپۋتاتى سايران حامزينگە جولىعىپ, فورۋمنان العان اسەرلەرى مەن تاريحي قۇجات توڭىرەگىندە پىكىر الىسقان ەدىك.
– سايران شايسۇلتان ۇلى, ءسىز «نۇر وتان» پارتياسىنىڭ حIII, حIV سەزدەرىنە دەلەگات بولىپ قاتىستىڭىز. سوڭعى سەزد نەسىمەن ەرەكشەلەنگەن ەدى؟
– بيىل «نۇر وتان» پارتياسىنىڭ قۇرىلعانىنا 15 جىل تولدى. وسى ۋاقىت ارالىعىندا جۇرتشىلىقتىڭ ۇلكەن سەنىمىنە يە بولعان قۋاتتى ساياسي كۇش رەتىندە نىعايىپ, ەلىمىزدىڭ الەۋمەتتىك-ەكونوميكالىق دامۋىنا زور ۇلەس قوسىپ كەلەدى. پارتيانىڭ نەگىزىن قالاۋشى ەلباسى نۇرسۇلتان نازارباەۆتىڭ باستاۋىمەن مەملەكەتتىلىگىمىز نىعايىپ, وركەنيەتتى ەلدەر قاتارىنا قوسىلۋعا ۇمتىلىپ وتىرمىز. ەڭ باستىسى, ءبىر شاڭىراق استىندا ۇلتارالىق, كونفەسسياارالىق بىرلىك پەن كەلىسىمنىڭ قالىپتاسۋىن تاۋەلسىزدىگىمىزدىڭ باستى جەمىستەرىنىڭ بىرىنە بالاعان ابدەن قيسىندى. پارتيانىڭ قاي سەزىن الساق تا, ساياسي تۇعىرنامالاردىڭ ورىندالۋىمەن, تاريحي ماڭىزدى شەشىمدەردىڭ قابىلدانۋىمەن, الداعى ستراتەگيالىق باعىتتاردىڭ انىقتالۋىمەن دارالانسا, سوڭعى سەزد دە وزىندىك وزگەشەلىكتەر مەن ەرەكشەلىكتەرگە تولى بولعانىن باسا ايتقىم كەلەدى. «دوڭگەلەك ۇستەل» سيپاتىندا ءوتۋىنىڭ وزىنەن-اق ەركىن ويلار توعىسى مەن پىكىرلەر ارالۋاندىعىنا كەڭ مۇمكىندىكتەر تۋدىرىلعانىن اڭعارۋعا بولادى.
دەسەك تە, تالقىلانعان ماسەلەلەردىڭ ىشىندە پارتيا توراعاسىنىڭ تاپسىرماسىنا سايكەس ەكى اي بويى بۇكىلحالىقتىق تالقىلاۋعا ۇلاسىپ, دەلەگاتتاردىڭ قولداۋىمەن ءابدەن سارالانعان جاڭا ساياسي دوكترينانىڭ قابىلدانۋى باستى جاڭالىق دەسەك, ەش تالاس تۋدىرا قويماس. ەلباسى سويلەگەن سوزىندە سەزدىڭ ءتۇيىندى مىندەتى رەتىندە ححI عاسىردىڭ ورتا شەنىندەگى ءبىزدىڭ بارشا ۇلى ماقساتتارىمىزعا قول جەتكىزۋدەگى «نۇر وتان» پارتياسىنىڭ الار ورنى مەن ساياسي ماڭىزىن ايقىنداپ, ىرگەلى مىندەتتەر قويدى. دوكترينا پارتيانىڭ بولاشاققا جول سىلتەيتىن تەمىرقازىعى بولۋ تيىستىلىگىن قاداپ ايتتى. ءويتكەنى, ءبارىمىزدىڭ الدىمىزدا ەلىمىزدى الەمنىڭ ەڭ قۋاتتى 30 مەملەكەتى ساپىنا قوسۋ سەكىلدى اسقارالى اسۋ تۇر. بۇل ورايدا, قازاقستاننىڭ جاڭا تاريحي بەتبۇرىس بەلەسىن ناقتىلاپ بەرگەن «2050» ستراتەگياسى پارتيالىق باعدارلامالارىمىزدىڭ نەگىزى دەسەك, مەنىڭ ويىمشا, ءبىر-ءبىرىن تولىقتىراتىن بۇل ەكى تاريحي قۇجاتسىز ەلىمىزدىڭ ودان ءارى دامۋىن, جارقىن بولاشاعىن كوزگە ەلەستەتۋدىڭ ءوزى قيىن.
– «نۇر وتان». نۇرلى بولاشاق جولىندا» اتتى جاڭا ساياسي دوكترينا جونىندەگى پايىمدارىڭىزبەن بولىسسەڭىز؟
– جاڭا ساياسي دوكترينانىڭ تاريحي ءمان-ماڭىزىنا پرەزيدەنت سەزدە سويلەگەن سوزىندە ناقتى سيپاتتاما بەردى. پارتيا دوكتريناسى «نۇر وتاننىڭ» ححI عاسىرداعى ميسسياسىن جانە «قازاقستان-2050» ستراتەگياسىن ءتيىمدى جۇزەگە اسىرۋدى قامتاماسىز ەتۋدەگى ءبىزدىڭ الار ورنىمىزدى ناقتى ايقىندادى. ول دەموكراتيالىق, وركەندەگەن, باسەكەگە قابىلەتتى جانە الەۋمەتتىك باعدارلى مەملەكەت قۇرۋ بولىپ تابىلادى. دوكترينادا اتاپ كورسەتىلگەندەي, باستى جەتىستىگىمىز دە, بار باقىتىمىزدىڭ باستاۋى دا تاۋەلسىزدىك دەسەك, مەملەكەتتىڭ, قوعامنىڭ جانە ازاماتتاردىڭ كۇش-جىگەرىن ەلدىگىمىزدى, مەملەكەتتىلىگىمىزدى نىعايتۋعا باعىتتاۋدان اسقان مارتەبە جوق. جالپىعا ورتاق تابىستىڭ فاكتورلارى الدەقاشان ايقىندالعان: ولار – بىرلىك پەن كەلىسىم, ءتول ءمادەنيەت پەن رۋحانيلىق, قۋاتتى ەكونوميكا مەن ادىلەتتى الەۋمەتتىك ساياسات, زياتكەرلىك ۇلت پەن ءتيىمدى مەملەكەتتىك باسقارۋ. مىنە, وسى باسىم قاعيداتتارعا ايرىقشا ءمان بەرە وتىرىپ, پارتيانىڭ بارلىق شەشىمدەرى مەن ءىس-قيمىلدارىن قازاقستاندى وركەندەتۋ يدەياسىمەن ورايلاستىرۋدىڭ ماڭىزى زور.
– جىل وتكەن سايىن «نۇر وتان» پارتياسىنىڭ وبلىستىق فيليالى ۇيىمدىق-قۇرىلىمدىق جاعىنان نىعايىپ, بۇگىندە 45 مىڭعا جۋىق ادامدى بىرىكتىرىپ وتىر. ارالارىندا ءتۇرلى ماماندىق يەلەرى كوپ. ولاردىڭ ءبىر پاراسى – كاسىپكەرلەر. ءسىز قوعامدىق جۇمىستارمەن اينالىسۋعا دا ۋاقىت تاۋىپ ءجۇرسىز. الدىمەن جەمقورلىقپەن كۇرەس جونىندەگى قوعامدىق كەڭەستىڭ جەتەكشىسى رەتىندە نە اتقارىپ, نە تىندىردىڭىز؟
– سەزدە ەلباسى قوعامدى جەگى قۇرتتاي جەگەن قاۋىپتى كەسەل – سىبايلاس جەمقورلىققا قارسى اياۋسىز كۇرەس جۇرگىزىپ كەلە جاتقان قوعامدىق قۇرىلىمداردىڭ قىزمەتىن ايرىقشا باعالاپ, ساياسي كوشباسشىلىقتىڭ قاعيداتتى ماسەلەسى, ياعني جەمقورلىققا قارسى بىتىسپەس ستراتەگيانى ناقتىلاپ بەردى. ءبىز دە جۇمىسىمىزدى وسى تۇرعىدان ۇيىمداستىرىپ, ازاماتتىق ار-وجداننىڭ قاعيداتتى ساقشىسى قىزمەتىن جالعاستىرىپ كەلەمىز. «وزىڭنەن باستا!», «تازا سەسسيا», «جەمقورلىققا جول جوق!» اكتسيالارى قاتارىنا جاستار, ستۋدەنتتەر, ۇكىمەتتىك ەمەس ۇيىمدار كوپتەپ تارتىلدى. قۇقىق قورعاۋ ورگاندارىمەن بىرلەسىپ, رەيدتەر جۇرگىزىلدى. قوعامدىق كەڭەس وتىرىستارىندا جەمقورلىقتىڭ الدىن الۋ جايلارى جۇيەلى قوزعالىپ وتىرادى.
اقىرى ساۋال قويعان ەكەنسىز, باسقا دا قوعامدىق جۇمىستار ءجونىندە بايانداي كەتەيىن. مەن, ءبىر جاعىنان, پەتروپاۆل قالالىق پارتيالىق تەكسەرۋ كوميسسياسىنا جەتەكشىلىك ەتەمىن. ءسوز اراسىندا «تۇرعىن ءۇي-كوممۋنالدىق شارۋاشىلىقتى جاڭعىرتۋ», «قولجەتىمدى باسپانا-2020» باعدارلامالارىن ورىنداۋ بارىسىندا ورىن العان ولقىلىقتارعا وراي ناقتى شارالار قولدانىلعانىن ايتا كەتكەن ءجون. ماسەلەن, «بەرەكە» شاعىن اۋدانىندا سالىنىپ جاتقان تۇرعىن ۇيلەردىڭ ساپاسىزدىعى, مەردىگەر ۇيىمداردىڭ ءوز ىستەرىنە سالعىرتتىعى اتاپ كورسەتىلدى. كەمشىلىكتەر دەرەۋ جويىلدى. دەپۋتاتتار باسقارۋىنداعى 7 باقىلاۋ بەكەتتەرى دە كەمشىلىكتەردى قالت جىبەرمەيدى.
– ءبىز ءسىزدى ىسكەر ازامات, تانىمال كاسىپكەر, تۇرمىسى ءتومەن وتباسىلارعا, اتا-انانىڭ قامقورلىعىنسىز قالعان بالالارعا جۇيەلى قايىرىمدىلىق جاسايتىن جومارت جان رەتىندە دە جاقسى بىلەمىز. ەندىگى اڭگىمەنى وسى باعىتتا وربىتسەك.
– ەلباسى پارتيالىق كوشباسشىلىقتىڭ باستى ماسەلەلەرىنىڭ ءبىرى رەتىندە ەكونوميكالىق جانە الەۋمەتتىك يننوۆاتسيالاردىڭ جالپىۇلتتىق ەپيتسەنترى بولۋ جايىنا باسا نازار اۋدارىپ, قوعام مەن مەملەكەتتى دامۋدىڭ باتىل, يننوۆاتسيالىق يدەيالارمەن ارلەندىرۋ تيىستىلىگىن العا تارتتى. بۇگىندە الەم ەكونوميكالىق, يننوۆاتسيالىق كاسىپورىندارمەن قوسا, وزىق ويلارمەن, عىلىمي جاڭالىقتار نەگىزىندە دە جۇمىس ىستەيدى. ولاي بولسا, ءبىز سەكىلدى بيزنەس سالاسىنىڭ وكىلدەرى دە ۋاقىت كوشىنە ىلەسىپ, قازاقستاندى وركەندەتۋگە ءوز ۇلەستەرىن قوسۋلارى كەرەك.
بۇگىندە پەتروپاۆل قالاسىندا 150-گە جۋىق پاتەردى قوناقۇي قىزمەتىنە تارتتىق. باستاپقىدا ەۋروپا قايتا قۇرۋ جانە دامۋ بانكىنەن قارجى الىپ, قالعانىن ءوزىمىز سالىپ, بيزنەستىڭ العاشقى الىپپەسىن باستاعانبىز. كەيىن, قوناقۇي قىزمەت جۇيەسى كەڭەيگەن سوڭ, نارىققا «Park haus» دەگەن اتپەن شىقتىق. ونداعى ماقساتىمىز تۇتىنۋشىلارعا ساپالى ءارى قولجەتىمدى قىزمەت كورسەتۋ بولىپ تابىلادى. ودان سوڭ گەرمانيالىق ارىپتەستەردىڭ كومەگىمەن فرانچايزينگ جۇيەسىن ەنگىزۋدى قولعا الدىق. بيزنەسپەن اينالىسۋعا تىلەك بىلدىرۋشىلەرگە وزىق تەحنولوگيامىز بەن جوبامىزدى ۇسىنىپ, قىر-سىرىن ۇيرەتۋگە ءازىرمىز.
ەندى وبلىس ورتالىعىنان 3 قاباتتى مەيرامحانا اشۋ ماقساتىمەن عيمارات ساتىپ الدىق. ول فرانتسۋزدىق ۇلگىدە قۇرىلادى. ونىڭ ءبىر قاباتى 30 بەن 50 جاس ارالىعىنداعى ادامدارعا ارنالىپ, بي كلۋبى رەتىندە جاساقتالادى. «Dostavka.kz دەگەن ينتەرنەت جوباسىن جاساپ, تاماق مازىرلەرىن ۇيگە جەتكىزىپ بەرۋ جاعىن ويلاستىرۋدامىز. ونىڭ قانشالىقتى تابىس اكەلەتىنىن ۋاقىت كورسەتەدى. قازىر 80 ادام جۇمىسقا تارتىلسا, اتالعان جوبالار جۇزەگە اسقان جاعدايدا جۇمىسشى-قىزمەتكەرلەردىڭ سانى 150-گە دەيىن جەتەتىن بولادى.
«بيزنەستىڭ جول كارتاسى-2020» باعدارلاماسى شەڭبەرىندە جەڭىلدەتىلگەن نەسيە الىپ, قوناقۇي جۇيەسىن ودان ءارى كەڭەيتتىك. «وبلىستىق مەيرامحانالار مەن قوناقۇيلەر» اسسوتسياتسياسىنىڭ توراعاسى رەتىندە تاماقتاندىرۋ سالاسىنىڭ كاسىبي شەبەرلەرىن دايىنداۋ, شەبەر-سىنىپتار اشۋ, ءتۇرلى بايقاۋلارعا قاتىسۋ داستۇرىنەن سىرت قالعان ەمەسپىز. وسى ورايدا, نورۆەگتىكتەردىڭ تاجىريبەسى نەگىزىندە ستۋدەنتتىڭ تەوريالىق بىلىمىمەن قوسا, ەكى جىل وندىرىستە شىڭداۋ سياقتى وزىق ءتاسىلىن قولدانۋعا نيەت ەتىپ وتىرمىز.
قايىرىمدىلىق شارالارىنا كەلەتىن بولساق, ارنايى اشقان ەسەپشوت ارقىلى مۇقتاجدارعا قارجىلىق دەمەۋ جاسايمىز. بالالار ءۇيى ەرەكشە قامقورلىعىمىزدا. كومەك سۇراي كەلگەن ادامداردى بوسقا قايتارماۋعا تىرىسامىز.
قىسقاسى, سەزد بويىمىزداعى قۇلشىنىسىمىزدى وياتىپ, جاڭاشا ەڭبەكتەنۋگە جىگەرلەندىرگەنىن, تىڭ جوبالارعا قوزعاۋ سالعانىن ايتقىم كەلەدى. ورتاق يگىلىككە قول جەتكىزۋ جاۋاپتىلىعى ەڭ الدىمەن «نۇر وتان» پارتياسىنا سەنىپ تاپسىرىلدى. ولاي بولسا, حالىق مۇددەسىنە قىزمەت ەتۋدەن بىردە-ءبىر نۇروتاندىق شەت قالماۋى ءتيىس.
اڭگىمەلەسكەن
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
