قازاقستان • 15 اقپان، 2021

قۇرعاقشىلىقتان ساقتاندىراتىن قۇرىلىم

11 رەت كورسەتىلدى

ەلىمىزدىڭ شارۋالارى ەگىس القاپتارىن قۇرعاق­شى­لىقتان ساقتاندىرا الادى. ونى ۇيدەن شىقپاي-اق ينتەرنەت ارقىلى جاساۋعا مۇمكىندىك بار. بۇل ءۇشىن ەلەكتروندى تسيفرلى قولتاڭبا ارقىلى Qoldau.kz پورتالىنا كىرسە بولعانى. ساقتاندىرۋ قۇنىنىڭ جارتىسىن مەملەكەت تولەيدى.

بىلتىر باستالعان ونلاين ساقتاندىرۋ جاقسى ناتيجە كورسەتتى. مىسالى، فەرمەرلەرگە 535 ملن تەڭگەنىڭ ساقتاندىرۋ تولەمى بەرىلدى. ساقتاندىرۋ جاعدايى تۋىنداعانىن كوميسسيا مۇشەلەرى ەمەس، سپۋتنيكتىك مالىمەتتەرگە نەگىزدەلگەن اقپاراتتىق جۇيە انىقتادى. بۇل ساقتاندىرۋ تولەمى مەحانيزمىنىڭ وبەكتيۆتىلىگى مەن اشىقتىعىن قامتاماسىز ەتتى.

اگروساقتاندىرۋ سالاسىنداعى وپەراتور – «قازاگرو» ۇلتتىق باسقارۋشى حولدينگى» اق-نىڭ ەنشىلەس كومپانياسى اۋىل شارۋاشىلىعىن قارجىلاي قولداۋ قورى. مەملەكەت وپەراتور ارقىلى اۋىل شارۋاشىلىعى تاۋارىن وندىرۋشىلەرگە ساقتاندىرۋ سىياقىسىن تولەۋگە ارنالعان شىعىنداردىڭ ءبىر بولىگىن وتەيدى.

«اۋىل شارۋاشىلىعىن قارجىلاي قولداۋ قورى» اق ساقتاندىرۋ دەپارتامەنتىنىڭ ديرەكتورى اسەل رامازانوۆانىڭ ايتۋىنشا، بيىل اگروساقتاندىرۋ شىعىندارىن سۋبسيديالاۋعا 3،3 ملرد تەڭگە ءبولۋ جوسپارلانىپ وتىر. بارلىق ساقتاندىرۋ پروتسەسى Agroinsurance سەرۆيستىك جۇيەسى ورنالاسقان Qoldau.kz پلاتفورماسىندا ىسكە اسىرىلادى. قازاقستاندىق ساقتاندىرۋ كومپانيالارى ءوز تاۋەكەلدەرىن الەمدىك نارىقتا ايرىقشا ورنى بار Swiss Re، Munich Re جانە Hannover Re سياقتى ءىرى حالىقارالىق كومپانيالار ارقىلى قايتا ساقتاندىرادى.

ساقتاندىرۋعا ءداندى داقىلدار (بيداي، ارپا، جۇگەرى، س ۇلى) جانە مايلى داقىلدار (كۇنباعىس، راپس، زىعىر) جاتادى. ايتا كەتەيىك، ەگىس القاپتارىن اقمولا، اقتوبە، باتىس قازاقستان، قاراعاندى، قوستاناي، پاۆلودار جانە سولتۇستىك قازاقستان، شىعىس قازاقستان، وبلىستارىنىڭ شارۋالارى ساقتاندىرا الادى.

ەگىس القابىن ساقتاندىرۋ ءۇشىن شارۋا ەڭ اۋەلى ەلەكتروندى تسيفرلى قولتاڭبا ارقىلى سايتقا تىركەلۋ كەرەك. سودان سوڭ جەكە كابينەتكە كىرۋ ارقىلى تىزىمنەن تاۋەكەلى باسىم ساقتاندىرىلۋى ءتيىس ەگىس القابىن جانە ساقتاندى­رۋ كومپانياسىن تاڭداۋى (جۋسان گارانت، ۆيكتوريا، نوماد ينشۋرانس) قاجەت. بۇدان كەيىن ساقتاندىرۋ قۇنىنىڭ
50%-ىن­ تولەيدى.

وسى قاراپايىم پروتسەدۋرالاردان كەيىن فەرمەر كۇن سايىن جەكە كابينەتى ارقىلى توپىراقتاعى ىلعال دەڭگەيىن باقىلاۋعا مۇمكىندىك الادى. بۇل ءۇشىن ۇنەمى ونلايندا بولۋدىڭ قاجەتى جوق. ەگەر جۇيە ىلعال جەتىسپەۋشىلىگىن نەمەسە ارتىق مولشەرىن تىركەسە، فەرمەر ەلەكتروندى پوشتاسى ارقىلى حابارلاما الا الادى. وسىدان كەيىن ەلەكتروندى تسيفرلى قولتاڭبا ارقىلى تولەم وتىنىشىنە قول قويۋى كەرەك.

بارلىق پروتسەسس اۆتوماتتاندىرىلعان جانە ساقتاندى­رۋ شارتىنا سايكەس ساقتاندىرۋ جاعدايى تىركەلگەن ساتتەن باس­تاپ 15 جۇمىس كۇنى ىشىندە تولەم جاسالادى.

ىلعال تاپشىلىعىنان ساقتاندىرۋ جاعدايى ورىن الۋى مۇمكىن تاۋەكەلدەردى ساقتاندىرۋ يندەكسى ءۇش كەزەڭدى قامتيدى. ءبىرىنشى كەزەڭ – 15 مامىردان 14 ماۋسىمعا دەيىن، ەكىنشى كەزەڭ – 15 ماۋسىمنان 14 شىلدەگە دەيىن جانە ساقتاندىرۋ ارقىلى قورعانۋدىڭ ءۇشىنشى كەزەڭى – 15 شىلدەدەن 14 تامىزعا دەيىن. وسى كەزەڭدەردىڭ ارقايسىسى ءۇشىن جۇيەدە ءوز تريگگەرلەرى قويىلادى. ياعني ساقتاندىرۋ جاعدايى ىسكە قوسىلاتىن نۇكتەلەر مەن كەزەڭدەردىڭ ارقايسىسىنا تولەمدەر قاراستىرىلعان. توپىراقتاعى ىلعال دەڭگەيىن انىقتاۋدىڭ تولىق پروتسەسى، تريگگەرلەر مەن باسقا دا پارامەترلەر شارۋانىڭ جەكە كابينەتىنە جىبەرىلىپ تۇرادى.

قازاقستاننىڭ كوپتەگەن ايماقتارىندا تۇسكەن قاردىڭ جانە توپىراقتاعى ىلعال قورىنىڭ ازدىعىن ەسكەرە وتىرىپ، ساراپشىلار بيىل جازدا قۇرعاقشىلىق بولادى دەپ بولجاپ وتىر. قور مەملەكەتتىك سۋبسيديا ەسەبىنەن قولداۋ بىلدىرىلەتىن قۇرعاقشىلىقتان ساقتاندىرۋ مەحانيزمى شارۋالارعا ۇلكەن كومەك بولاتىنىنا سەنىمدى.

 

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار