جيىنعا وڭىرلەردەگى دەنساۋلىق ساقتاۋ باسقارمالارىنىڭ, رەسپۋبليكالىق مەديتسينالىق ۇيىمداردىڭ جانە مەديتسينالىق جوو وكىلدەرى قاتىستى.
دەنساۋلىق ساقتاۋ مينيسترلىگىنىڭ ءباسپاسوز قىزمەتىنىڭ حابارلاۋىنشا, نارەستە ءولىمىن ازايتۋعا حالىقارالىق قۇجاتتاردا سونداي-اق ەلىمىزدىڭ باعدارلامالارىندا باسىمدىق بەرىلگەن.
اجار عينيات 2020 جىلدىڭ قورىتىندىسى بويىنشا رەسپۋبليكادا وڭ ديناميكا بايقالىپ, نارەستە ءولىمىنىڭ كورسەتكىشى وتكەن جىلمەن سالىستىرعاندا 7,2%-عا تومەندەگەندىگىن اتاپ ءوتتى.
ۆيتسە-مينيستر كەلتىرگەن دەرەكتەرگە قاراعاندا, 2019 جىلى 1000 ءتىرى تۋعان نارەستەگە شاققاندا 8,40 بولسا, بيىل 7,79, ال 2020 جىلعا نارەستەلەردىڭ ءولىم-ءجىتىم ينديكاتورىنىڭ نىسانالى ءمانى دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنا سايكەس 10,1 قۇرايدى. سونداي-اق, بالالار ءولىم-ءجىتىم كورسەتكىشى وتكەن جىلعى كورسەتكىشپەن سالىستىرعاندا 16,8%-عا تومەندەدى جانە ءتىرى تۋعان 1000 بالاعا شاققاندا 2019 جىلعى 10,7-گە قاراعاندا 8,9-دى قۇرادى. قر دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنا سايكەس بالالار ءولىم-ءجىتىمى كورسەتكىشىنىڭ نىسانالى ينديكاتورى 2020 جىلدىڭ قورىتىندىسى بويىنشا 10,6 بولۋى ءتيىس.
«اتالعان كورسەتكىشتەرگە اسەر ەتۋدىڭ ماڭىزدى اسپەكتىلەرىنىڭ ءبىرى – انالاردىڭ دەنساۋلىعىن جاقسارتۋ, پەريناتالدىق جانە نەوناتالدىق كومەكتى جەتىلدىرۋ, پاتروناجدىق قىزمەتتىڭ امبەباپ-پروگرەسسيۆتى مودەلىن, بالانى ەمشەك سۇتىمەن ەمىزۋدى قولداۋ», دەدى ۆيتسە-مينيستر.
وسىعان وراي ۆيتسە-مينيستر ۆەدومستۆو ەلىمىزدە مۇمكىندىگى شەكتەۋلى بالالارعا كەشەندى كومەك كورسەتۋدى جەتىلدىرۋ, ونىڭ ىشىندە ەرتە جاستاعى سكرينينگتەردى قولعا الۋ جونىندەگى جول كارتاسىن ىسكە اسىرۋ شەڭبەرىندە شارالار قابىلداپ جاتقانىن جەتكىزدى.
مەديتسينالىق-سانيتاريالىق العاشقى كومەك كورسەتۋ باعىتىندا ۋچاسكەلىك قىزمەتتىڭ بالالارمەن جۇمىستى ۇيىمداستىرۋ جانە ارالاس قىزمەتتەرمەن ساباقتاستىقتىعىن جاقسارتۋ قاجەت.
سونىمەن بىرگە, مەديتسينا قىزمەتكەرلەرىنىڭ بىلىكتىلىگى مەن كاسىبي ءبىلىم دەڭگەيىن ارتتىرۋ جونىندەگى جۇمىستى جالعاستىرۋ, بالالار ماماندارىنىڭ تاپشىلىعىن شەشۋ, ونىڭ ىشىندە «پەدياتريا (نەوناتولوگيا), بالالار رەانيماتولوگياسى, انەستەزيولوگيا» جانە «بالالار پۋلمونولوگياسى» ماماندىقتارى بويىنشا كادرمەن قامتۋدى 100%-عا دەيىن جەتكىزۋ قاجەت.
سونداي-اق مەملەكەت باسشىسىنىڭ تاپسىرماسى بويىنشا بوساندىرۋ ۇيىمدارى مەن بالالار ستاتسيونارلارىن زاماناۋي جابدىقتارمەن تولىق جاراقتاندىرۋ جوسپارلانۋدا.
