دەنساۋلىعىنداعى كىناراتقا قاراماستان ەل قاتارلى ەڭبەك ەتىپ, پەرزەنتىن دە ءوسىرىپ, بارلىق اۋىرتپالىقتى نازىك يىعىمەن كوتەرىپ جۇرگەن مارجانايدىڭ جاعدايىنا الاڭداعان سىنىپتاستارى باسپانا ماسەلەسىن شەشۋدىڭ جولدارىن ىزدەدى. ويتكەنى العادا پاتەردەن پاتەرگە كوشىپ جۇرگەن جالعىزباستى مۇگەدەك انانىڭ باسىنداعى قيىندىقتى ونىڭ جاقىن جولداستارىنان باسقا ەشكىم بىلمەدى. قانشا جۇگىرسە دە, جالعىزباستى, مۇگەدەك اناعا ءوز كۇشىمەن باسپانا ساتىپ الۋعا مۇمكىندىگى جوق ەكەنىن تۇسىنگەن جولداستارى كوپتىڭ كومەگىنە جۇگىنۋدى ءجون كورگەن. ولار العا قالالىق مەشىتىنىڭ باس يمامىنا بارىپ, قايىرىمدىلىق شارالارى ارقىلى باسپانا ماسەلەسىن شەشىپ بەرۋدى وتىنگەن.
«مارجاناي كورگەن قيىندىعىن جاقىندارىنا دا, جولداستارىنا دا ايتىپ شاعىنباسا دا, سوڭعى ۋاقىتتا ىشتەي قاتتى كۇيزەلىسكە ءتۇسىپ جۇرگەنىن سەزەتىنبىز. جالعىز بالاسىن قاتارىنان كەم قىلماي ءوسىرىپ, جاقسى تاربيە بەرىپ وتىرعان قۇربىمىزدى قيىن ساتتە قولداۋدى ءجون كوردىك. ءبىز دە جاس ەمەسپىز, ارقايسىمىزدىڭ وتباسىمىز, بالا-شاعامىز بار, كوپشىلىگىمىز پاندەميانىڭ كەزىندە جۇمىسسىز قالدىق. دەسەك تە, وسى ءىستى باستاعان سوڭ اياقسىز قالدىرمايىق دەگەن نيەتپەن اۋداندىق مەشىتكە بارىپ كومەك سۇرادىق», دەيدى العا قالاسىنىڭ تۇرعىنى رۋسلان تاجىعۇلوۆ.
قمدب قاراستى «زەكەت» قورىنىڭ ەلىمىز بويىنشا بەرگەن 346-شى باسپاناسى وسىلايشا العا قالاسىنىڭ تۇرعىنى, III توپتاعى مۇگەدەك مارجاناي تۇيەشيناعا بۇيىردى. ايتا كەتۋ كەرەك, وسىعان دەيىن دە «زەكەت» قورى كوپ بالالى وتباسىلارعا, اتا-اناسىز قالعان جاسوسپىرىمدەرگە, مۇگەدەك بالا تاربيەلەپ وتىرعان اقتوبە وبلىسىنىڭ تۇرعىندارىنا 13 باسپانا كىلتىن تابىستاعان ەدى. مارجاناي تۇيەشيناعا پاتەر كىلتىن اقتوبە وبلىسىنىڭ باس يمامى تولەبي وسپان تاپسىرىپ, العا اۋدانىنىڭ اكىمى مامىرعالي اققاعازوۆ سىيلىقتارىمەن كەلدى. مۇقتاج وتباسىلارعا قۋانىش سىيلاپ جۇرگەن «ەل ۇلەسى – پاتەرگە» جوباسى الداعى ۋاقىتتا دا جالعاسا بەرەدى.
اقتوبە وبلىسى,
العا اۋدانى
