قازاقستان • 09 اقپان، 2021

قازاقستاننىڭ 276 ەلدى مەكەنىن سۋ باسۋ قاۋپى بار

40 رەت كورسەتىلدى

توتەنشە جاعدايلار مينيسترلىگى ورتالىق جانە جەرگىلىكتى اتقارۋشى ورگاندارمەن بىرلەسىپ، كوكتەمگى سۋ تاسقىنى كەزەڭىندە توتەنشە جاعدايلاردىڭ تۋىنداۋ قاۋپىن ازايتۋ جونىندەگى ءىس-شارالار كەشەنىن جۇرگىزۋدە. وتكەن جىلداردىڭ تاجىريبەسىن ەسكەرە وتىرىپ، سۋ باسۋ قاۋپى بار نۇكتەلەر ايقىندالدى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمباەۆ حابارلادى.

ونىڭ ايتۋىنشا، سۋ تاسقىنى قاۋپىنىڭ الدىن الۋ جانە جويۋ بويىنشا جول كارتاسىنىڭ ارەكەت ەتۋ كەزەڭىندە 2017 جىلدان باستاپ سۋ تاسقىنىنا قارسى 402 ءىس-شارا ورىندالدى.

«كوكتەمگى سۋ تاسقىنىنا اسا بەيىم 905 ەلدى مەكەن انىقتالدى. جول كارتاسىنىڭ ءىس-شارالارىن ورىنداۋ 315 ەلدى مەكەندى سۋ باسۋ قاتەرىن تولىعىمەن جويۋعا جانە 314 ەلدى مەكەندە بولاتىن قاتەردى بارىنشا ازايتۋعا مۇمكىندىك بەردى. ءتورت جىل ىشىندە ينجەنەرلىك قورعاۋ بويىنشا 400-دەن استام ءىس-شارا ورىندالدى، ونىڭ ىشىندە قورعانىس بوگەتتەرى مەن بىلىكتەرىن سالۋ، قورعانىس قۇرىلىستارىن جوندەۋ، جاعالاۋدى بەكىتۋ، ءتۇبىن تەرەڭدەتۋ بويىنشا جۇمىستار جۇرگىزۋ، اۆتوجولداردا جاڭا وتكىزۋ قۇبىرلارىن سالۋ، اۆتوموبيل كوپىرلەرىن رەكونسترۋكتسيالاۋ جانە سالۋ. سونىمەن قاتار، 276 ەلدى مەكەندى سۋ باسۋ قاۋپى ساقتالۋدا. وسىعان بايلانىستى، وتكەن جىلدىڭ سوڭىندا مينيسترلىكتىڭ باستاماسىمەن مۇددەلى مەملەكەتتىك جانە جەرگىلىكتى اتقارۋشى ورگاندارمەن بىرلەسىپ، 2023 جىلعا دەيىنگى جاڭا جول كارتاسى بەكىتىلدى»، - دەپ حابارلادى ۆەدومستۆو وكىلى.

سونىمەن قاتار، جەرگىلىكتى جەرلەردە 145 مىڭ توننا ينەرتتى ماتەريالدار، 780 مىڭ دانا قاپ، شامامەن 3 مىڭ توننا ججم جانە 20 توننادان استام جارىلعىش زاتتار قورى دايىندالدى. زارداپ شەككەندەردى ۋاقىتشا ورنالاستىرۋدىڭ 3 مىڭنان استام پۋنكتى، لاگەرلەر ورنالاستىرۋ جانە ءۇي جانۋارلارىن ايداپ اكەتۋ ءۇشىن قاۋىپسىز ورىندار انىقتالدى. ەۆاكۋاتسيالاۋ باعىتتارى جاڭارتىلىپ، قاجەتتى كولىك ەسەپتەلدى.

سوڭعى جاڭالىقتار

دوللار ارزاندادى

ەكونوميكا • بۇگىن، 15:50

ۆاكتسينا سالدىرعاندار سانى ارتتى

كوروناۆيرۋس • بۇگىن، 09:17

1227 قازاقستاندىق ىندەتتەن ساۋىقتى

كوروناۆيرۋس • بۇگىن، 09:08

وتكەن تاۋلىكتە 1169 ادام ىندەت جۇقتىردى

كوروناۆيرۋس • بۇگىن، 09:01

ۇقساس جاڭالىقتار