«2021 جىلعى 5 اقپاندا ساعات 00.05-تە پاۆلودار وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ جەدەل قىزمەتكەرلەرى نوۆويامىشەۆو اۋىلىنىڭ جانىنداعى «ومبى-مايقاپشاعاي» اۆتوجولىنىڭ 463 شاقىرىمىندا 30 جاستاعى پاۆلودارلىق ازامات باسقارىپ كەلە جاتقان «نيۆا» اۆتوكولىگىن ۇستادى. كولىكتىڭ سالونىندا جۇرگىزۋشىدەن باسقا تاعى ەكى ەر ادام بولعان. سونداي-اق ولاردا كولىكتىڭ تىركەمەسى, قاردا جۇرگىش كولىك جانە ءتۇرلى ماركالى التى مىلتىق بولدى, بارلىق مىلتىقتار ىشكى ىستەر ورگاندارىندا تىركەلگەن. وقيعا ورنىن تەكسەرۋ كەزىندە 50 مەتر قاشىقتىقتا جابايى قاباننىڭ ءولى دەنەسى تابىلدى. پوليتسيا قىزمەتكەرلەرى 2021 جىلعى 4 اقپاندا ساعات 13.00 شاماسىندا ەر ادامداردىڭ اققۋلى اۋدانىنىڭ اۋماعىندا ءتيىستى رۇقساتسىز زاڭسىز اڭ اۋلاعانىن انىقتادى», دەدى پاۆلودار اۋدانى پوليتسيا ءبولىمىنىڭ باستىعى دۋلات توكەنوۆ.
پوليتسيا قىزمەتكەرلەرى اتالعان فاكتىنىڭ تىركەلگەنىن اتاپ ءوتتى. ءتيىستى ساراپتامالار تاعايىندالدى. تەكسەرىس جۇرگىزىلۋدە. اۆتوماشينا, تىركەمە جانە قاردا جۇرگىش كولىك ارنايى ايىپپۇل تۇراعىنا قويىلدى.
