فورۋم قر پرەزيدەنتى قاسىم-جومارت توقاەۆ پەن دۇنيەجۇزىلىك ەكونوميكالىق فورۋم پرەزيدەنتى بەرگە برەندەنىڭ بەينە ۇندەۋلەرىنەن باستالدى. ونلاين رەجيمىندە Google-ءدىڭ ۆيتسە-پرەزيدەنتى ۆينت سەرف ءسوز سويلەدى. فورۋمنىڭ پلەنارلىق سەسسياسىنا ارمەنيا پرەمەر-ءمينيسترى نيكول پاشينيان, بەلارۋس پرەمەر-ءمينيسترى رومان گولوۆچەنكو, قىرعىزستان پرەمەر-ءمينيسترى ۋلۋكبەك ماريپوۆ, رەسەي پرەمەر-ءمينيسترى ميحايل ميشۋستين, وزبەكستان پرەمەر-ءمينيسترى ابدۋللا اريپوۆ, ەەك القاسىنىڭ توراعاسى ميحايل مياسنيكوۆيچ, Kaspi.kz نەگىزىن قالاۋشىلاردىڭ ءبىرى ميحايل لومتادزە مەن ERG ديرەكتورلار كەڭەسىنىڭ توراعاسى الەكساندر ماشكەۆيچ قاتىستى.
فورۋمنىڭ پلەنارلىق سەسسياسىندا سويلەگەن سوزىندە قر پرەمەر-ءمينيسترى پاندەميا جاعدايىندا قازاقستان ەكونوميكاسى تۇراقتىلىقتىڭ جوعارى دەڭگەيىن كورسەتكەنىن, بۇل ەداۋىر دارەجەدە مەملەكەتتىك جانە جەكەمەنشىك سەكتورلاردىڭ بارلىق سالالارىنا تسيفرلىق شەشىمدەردىڭ ەنگىزىلۋىنىڭ وسۋىمەن بايلانىستى ەكەنىن اتاپ ءوتتى.
«ايقىن شەكتەۋلەرگە قاراماستان, ءبىز تسيفرلىق ينفراقۇرىلىمنىڭ قولجەتىمدىلىگى مەن ساپاسىن ارتتىرۋ جۇمىسىن جەدەلدەتتىك. 2020 جىلى 20 مىڭ تالشىقتى-وپتيكالىق بايلانىس جەلىسىنىڭ قۇرىلىسى بويىنشا ءمجا جوباسى اياقتالدى. 1 000-نان استام ءموبيلدى بايلانىستىڭ بازالىق ستانتسياسى ورناتىلدى, بۇل وڭىرلەردەگى تەحنولوگيالىق تەڭسىزدىك دەڭگەيىن ايتارلىقتاي قىسقارتۋعا مۇمكىندىك بەردى. سونىڭ ناتيجەسىندە قازاقستان حالقىن ينتەرنەتپەن قامتۋ بۇگىندە 99%-دى قۇرايدى», — دەدى ا. مامين.
ۇكىمەت باسشىسى قر ازاماتتارى ءۇشىن تۇلعا بيومەترياسى بويىنشا قاشىقتان سايكەستەندىرۋ ارقىلى ەلەكتروندىق تسيفرلىق قولتاڭبانى (ەتسق) قاشىقتان الۋ مۇمكىندىگى بەرىلگەنىن اتاپ ءوتتى. جيىنتىقتى قۇجات اينالىمى, ءموبيلدى جۇمىس ورنى, كادرلىق اكىمشىلەندىرۋگە جانە الەۋمەتتىك تولەمدەرگە ونلاين تاسىلدەر قولدانۋ سەكىلدى جوبالار بەلسەندى ەنگىزىلۋدە. ونلاين فورماتتا قولجەتىمدى مەملەكەتتىك قىزمەتتەردىڭ ۇلەسى 93%-عا دەيىن جەتكىزىلدى.
سونىڭ ناتيجەسىندە, 2020 جىلى قازاقستان ەلەكتروندىق ۇكىمەتتى دامىتۋ دەڭگەيى بويىنشا بۇۇ رەيتينگىندە 10 پوزيتسياعا كوتەرىلىپ, 193 ەلدىڭ اراسىندا 29-ورىنعا يە بولدى. بولشەك ساۋدا قۇرىلىمىنداعى ەلەكتروندىق ساۋدا كولەمى وتكەن جىلى 3 ەسەگە جۋىق – 3,8%-دان 9,7%-عا دەيىن ءوستى. حالىقتىڭ قولما-قول اقشاسىز وپەراتسيالارىنىڭ كولەمى 2,5 ەسەگە, 14,1 ترلن تەڭگەدەن 35,3 ترلن تەڭگەگە دەيىن ۇلعايدى.
«مەملەكەت باسشىسى قاسىم-جومارت كەمەل ۇلى توقاەۆ بيىلعى جىلدى مەملەكەتىمىزدى ءتيىمدى تسيفرلاندىرۋ جىلى دەپ وتكىزۋدى تاپسىردى. قازىردىڭ وزىندە ءبىز "اۋقىمدى دەرەكتەر" قاعيداتتارىن مەملەكەتتىك ورگانداردىڭ جۇمىسىنا تەرەڭ ينتەگراتسيالاۋ بويىنشا جۇمىس جۇرگىزىپ جاتىرمىز. "Data-driven government" تۇجىرىمداماسى شەڭبەرىندە دەرەكتەردى جيناۋ جانە وڭدەۋ ازىرلەۋدەن باستاپ, تيىمدىلىك مونيتورينگ جۇرگىزۋگە دەيىنگى بارلىق كەزەڭدەردە مەملەكەتتىك قىزمەتتەردىڭ ساپاسىن ارتتىرۋدىڭ فاكتورىنا اينالادى», — دەدى ا. مامين.
پرەمەر-مينيستر تسيفرلىق ينفراقۇرىلىمدى دامىتۋ اياسىندا الداعى 5 جىل ىشىندە قازاقستاننىڭ بارلىق وبلىس ورتالىقتارى مەن رەسپۋبليكالىق ماڭىزى بار قالالارى 5G جابىنىمەن قامتاماسىز ەتىلەتىنىن اتاپ ءوتتى. دەرەكتەردى وڭدەۋ جانە ساقتاۋ سالاسىنا ينۆەستيتسيالار 6 ەسەگە ارتادى (82 ملرد تەڭگەدەن 500 ملرد تەڭگەگە دەيىن). ەلەكتروندىق ساۋدانىڭ ۇلەسى 2 ەسە ۇلعايتىلاتىن بولادى.
«تسيفرلىق سالادا بيزنەستى قولداۋ شارالارىنىڭ ارقاسىندا 1000-نان استام يننوۆاتسيالىق كومپانيا قۇرىلادى, بۇل اكت ەكسپورتى كولەمىنىڭ 25 ەسەدەن استام وسۋىنە اكەلەدى. اT-سالاسىندا شامامەن 100 مىڭ جاڭا جۇمىس ورنى قۇرىلادى, بۇل سىني ماسسانى قالىپتاستىرۋعا جانە ەكونوميكانىڭ بارلىق سالالارىندا مۋلتيپليكاتيۆتىك اسەردى ىسكە قوسۋعا كومەكتەسەدى», — دەدى ا. مامين.
فورۋمعا قاتىسۋشىلار قازاقستاننىڭ مەملەكەتتىك قىزمەتتەردى كورسەتۋ, فيسكالدىق دەرەكتەردى ساراپتاۋ, سونداي-اق قارجى-بانك جانە تەلەكوممۋنيكاتسيا سالالارىنداعى تسيفرلىق جوبالار كورمەسىمەن تانىستى.
