الماتى قالاسىنىڭ اكىمى باقىتجان ساعىنتاەۆ جانە ونىڭ ورىنباسارلارى بايانداما جاسادى. تالقىلاۋعا پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ, ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ, ۇلتتىق ەكونوميكا ءمينيسترى اسەت ەرعاليەۆ, ەنەرگەتيكا ءمينيسترى نۇرلان نوعاەۆ, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, ساۋدا جانە ينتەگراتسيا ءمينيسترى باقىت سۇلتانوۆ, دەنساۋلىق ساقتاۋ ءمينيسترى الەكسەي تسوي, يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ, قارجى ءبىرىنشى ۆيتسە-ءمينيسترى بەرىك شولپانقۇلوۆ, مادەنيەت جانە سپورت ۆيتسە-ءمينيسترى عابيدوللا ءابدىراحىموۆ قاتىستى.
ينجەنەرلىك, كولىك جانە تۇرعىن ءۇي ينفراقۇرىلىمىن دامىتۋ, ءبىلىم بەرۋ جانە دەنساۋلىق ساقتاۋ, كاسىپكەرلىك جانە ينۆەستيتسيالار تارتۋ, قورشاعان ورتانى قورعاۋ جانە الماتى قالاسىن گازداندىرۋ ماسەلەلەرى قارالدى. الماتى اگلومەراتسياسىن دامىتۋ جانە 2020-2024 جىلدارعا ارنالعان «جاڭا الماتى» كەشەندى جوسپارىن ىسكە اسىرۋ ماسەلەلەرىنە ەرەكشە كوڭىل ءبولىندى.
«الماتى قالاسى ەلدىڭ ءجىو-ءنىڭ بەستەن ءبىر بولىگىن قامتاماسىز ەتە وتىرىپ, الەۋمەتتىك-ەكونوميكالىق دامۋ كورسەتكىشتەرى بويىنشا وڭىرلەر اراسىندا جەتەكشى ورىنعا يە. مەگاپوليستىڭ ودان ءارى ايتارلىقتاي دامۋ الەۋەتى بار. جاڭا جۇمىس ورىندارىن قۇرۋ, قالا تۇرعىندارىنىڭ ءومىر ءسۇرۋ ساپاسى مەن ءال-اۋقاتىن ارتتىرۋ, ينفراقۇرىلىمدى جانە جالپى العاندا, الماتى اگلومەراتسياسىنىڭ ەكونوميكاسىن دامىتۋ ءۇشىن بارلىق جاعدايدى جاساۋ قاجەت», — دەدى ا. مامين.
ۇكىمەت باسشىسى بارلىق جوسپارلانعان جوبالاردى ۋاقىتىلى جانە ساپالى جۇزەگە اسىرۋدى, سونداي-اق الماتى قالاسىن ودان ءارى دامىتۋعا ينۆەستيتسيالار تارتۋدى قامتاماسىز ەتۋدى تاپسىردى. 2020 جىلدىڭ قورىتىندىسى بويىنشا الماتى قالاسىندا ونەركاسىپ ءوندىرىسىنىڭ كولەمى 2019 جىلمەن سالىستىرعاندا 4,6%-عا 1,052 ترلن تەڭگەگە دەيىن ءوستى, ونىڭ ىشىندە وڭدەۋ ونەركاسىبى 6,9%-عا (ماشينا جاساۋ 35,8%-عا, فارماتسەۆتيكا 43,5%-عا, قاعاز ءوندىرۋ 95,6%-عا, جەڭىل ونەركاسىپ 5 ەسە) ارتتى.
نەگىزگى كاپيتالعا سالىنعان ينۆەستيتسيالار 17,2%-عا 971,2 ملرد تەڭگەگە دەيىن ءوستى. قۇرىلىس جۇمىستارىنىڭ كولەمى 402,7 ملرد تەڭگەنى قۇرادى (+10,6%), 2,4 ملن شارشى مەتردەن استام تۇرعىن ءۇي پايدالانۋعا بەرىلدى (+14%). 2021-2024 جىلدارى الماتى قالاسىندا 35,4 مىڭ جاڭا جۇمىس ورنىن قۇرا وتىرىپ, جالپى قۇنى 4,5 ترلن تەڭگە بولاتىن 201 ينۆەستيتسيالىق جوبادان تۇراتىن پۋل قۇرىلدى. بيىل 7 مىڭنان استام جۇمىس ورنىن اشا وتىرىپ, 187,9 ملرد تەڭگەگە 92 جوبانى ىسكە اسىرۋ جوسپارلانۋدا.
جۇمىس ساپارى اياسىندا ا. مامين الماتى قالاسىنىڭ تۇرعىن ءۇي ينفراقۇرىلىمى قۇرىلىسىنىڭ بارىسىن تەكسەردى, سونداي-اق قازاقستان مەن ورتالىق ازياداعى اسا ءىرى «SmArt.Point» كوۆوركينگ ورتالىعىن ارالادى, وندا ات, قارجى تەحنولوگياسى, ونلاين-ساۋدا, باعدارلامالىق قامتاماسىز ەتۋدى ازىرلەۋ, كيبەرقاۋىپسىزدىك, بلوكچەين, اT-ءبىلىم بەرۋ, مەديا, اۆتوماتتاندىرىلعان لوگيستيكا, جاساندى زەردە, روبوتتى تەحنيكا جانە ت. ب. سالالارداعى 60-تان استام كومپانيا ۇسىنىلعان.
