ەلوردادا «بايتەرەك» مونۋمەنتى مەن «حان شاتىر» سوو, الماتىدا – «حالىق ارەنا» سپورت جانە مادەنيەت سارايى, «الماتى ارەنا» مۇز سارايى, اباي اتىنداعى قازاق مەملەكەتتىك اكادەميالىق وپەرا جانە بالەت تەاترى, Renion Park قوناق ءۇيى مەن MEGA Alma-Ata سوو-داعى Happy Eye شولۋ دوڭگەلەگى كوك ءتۇستى شامدارىن جاعادى.
اكتسيانىڭ باستاماشىلارى قازاق ونكولوگيا جانە راديولوگيا عىلىمي-زەرتتەۋ ينستيتۋتى (قازورعزي), «قاتەرلى ىسىكپەن كۇرەسەيىك» قوعامدىق قورى جانە Takeda بيوفارماتسەۆتيكالىق كومپانياسى قوعامنىڭ نازارىن وسى جاھاندىق پروبلەماعا اۋدارۋ جانە حالىقتى كەسەلدى ەرتە انىقتاۋعا جانە ەمدەلۋگە شاقىرۋ, بۇگىنگى وركەنيەتتىڭ ەڭ اۋىر دەرتتەرىنىڭ ءبىرى رەتىندە جۇرتشىلىقتىڭ قاتەرلى ىسىك تۋرالى حاباردارلىعىن ارتتىرۋ ماقساتىندا ءىس-شارانى جۇزەگە اسىردى.
- بۇگىنگى ونكولوگيا العا قاراي قادام باستى. قازىرگى تاڭدا 10-15 جىل بۇرىن ەمدەۋ مۇمكىن بولماعان كەسەلدەرگە ەم بار. ونكولوگيالىق اۋرۋلاردى ەمدەۋدەگى الەمدەگى الدىڭعى قاتارلى ادىستەمەلەر يگەرىلدى جانە ولار قازاقستاندا بەلسەندى قولدانىلادى. وسىنىڭ بارلىعى تەگىن ەمدەلۋگە مۇقتاج ءاربىر ازاماتقا تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە قولجەتىمدى. الايدا, ۇزاق ۋاقىت ەمدەلۋدەن ارىلۋعا جانە ءتىپتى ءومىردى ساقتاپ قالۋعا مۇمكىندىك بەرەتىن ەڭ ماڭىزدى فاكتور – تۇراقتى ونكوسكرينينگ پەن اۋرۋدىڭ ەرتە كەزەڭدەرىندە ازاماتتاردىڭ جۇگىنۋى, - دەيدى «قازاق ونكولوگيا جانە راديولوگيا عىلىمي-زەرتتەۋ ينستيتۋتى» اق باسقارما ءتورايىمى ديليارا قايداروۆا.
قازىرگى ۋاقىتتا قازاقستاندا جەتەكشى ونكولوگيالىق قاۋىمداستىقتاردىڭ حالىقارالىق حاتتامالارىنا سايكەس كەلەتىن ونكولوگيالىق اۋرۋلاردى ەمدەۋدىڭ قازىرگى زامانعى تۇرلەرى جۇرگىزىلۋدە. تارگەتتى تەراپيا, يممۋنوتەراپيا جانە گەندىك ينجەنەريا ادىستەرى بەلسەندى قولدانىلادى. بارلىق حيميوتەراپيالىق جانە تارگەتتىك پرەپاراتتار تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) شەڭبەرىندە قامتاماسىز ەتىلەدى. 2010 جىلدان باستاپ سۇيەك كەمىگىن ترانسپلانتاتسيالاۋ جۇرگىزىلۋدە. 2012 جىلى قازاقستاندا ونكوپسيحولوگتاردىڭ جەكە كاسىبي قىزمەتى پايدا بولدى.
ماڭىزدى جەتىستىك رەتىندە اۋرۋدىڭ ساتىسى مەن تارالۋىن ءدال انىقتاۋعا, ەمدەۋدىڭ وڭتايلى رەجيمدەرىن تاڭداۋعا, جەكە تەراپيانى قولدانۋعا, ساۋلەلەنۋدىڭ نەمەسە حيميوتەراپيانىڭ وڭتايلى كۋرسىن تاعايىنداۋعا, ەمدەۋدىڭ تيىمدىلىگىن باقىلاۋعا جانە نەگىزسىز وپەراتسيالاردى بولدىرماۋعا كومەكتەسەتىن مرت جانە پەت-كت دياگنوستيكاسىن, مولەكۋلالىق-گەنەتيكالىق زەرتتەۋلەر مەن تەلەپاتولوگيانى ەنگىزۋدى ايتۋعا بولادى. ونكولوگيالىق اۋرۋلاردىڭ ەرتە بەلگىلەرىن انىقتايتىن جانە انىقتالعان اۋرۋلارى بار پاتسيەنتتەرگە العاشقى كومەك كورسەتەتىن ەمحانالاردىڭ قىزمەتكەرلەرى ۇلكەن جۇمىس اتقارادى. ونكولوگيالىق اۋرۋلارمەن كۇرەسۋدىڭ كەشەندى جوسپارى اياسىندا قاتەرلى ىسىكتىڭ كەڭ تارالعان تۇرلەرىمەن اۋىراتىن پاتسيەنتتەرگە ۇيدە پاللياتيۆتىك كومەك كورسەتۋ بويىنشا ءموبيلدى توپتاردىڭ جۇمىسى باستالدى.
سونىمەن قاتار, قازاقستاندىق ناۋقاستار پاتسيەنتتەرگە ارنالعان مەكتەپتەر فورماتىندا قورقىنىشتى دياگنوز تۋرالى بىلگەن پاتسيەنتتەردەگى اقپاراتتىڭ جەتىسپەۋشىلىگى ماسەلەسىن شەشۋگە عانا ەمەس, بۇعان قوسا تەراپياعا توزىمدىلىككە بايلانىستى پسيحولوگيالىق جانە الەۋمەتتىك پروبلەمالار مەن ماسەلەلەردى شەشۋگە كومەكتەسەتىن قولداۋ باعدارلامالارىنا قول جەتكىزە الادى. قوعامدىق ۇيىمدار مەن الەۋمەتتىك جاۋاپتى بيزنەس بۇل جۇمىستا ونكولوگتارعا باعا جەتپەس كومەك كورسەتەدى.
- ءبىزدىڭ ميسسيامىز – قاتەرلى ىسىكپەن اۋىراتىن ناۋقاستاردىڭ ومىرىنە اراشا ءتۇسۋ جانە ءومىر ءسۇرۋ ساپاسىن بارىنشا جاقسارتۋ ءۇشىن بۇكىل قوعامنىڭ كۇش-جىگەرى مەن الەۋەتىن بىرىكتىرۋ, - دەپ اتاپ ءوتتى «قاتەرلى ىسىكپەن كۇرەسەيىك» قق اتقارۋشى ديرەكتورى گۇلنار كۋنيروۆا. - ءبىز ۋاقىتىلى بەلسەندى بىرلەسكەن ءىس-قيمىلدار قازاقستاندىقتاردىڭ ەرتەڭگى ۇرپاعىنىڭ دەنساۋلىعىنا وسى اۋرۋدىڭ قاۋپىن ايتارلىقتاي ازايتادى دەپ سەنەمىز. ءوز دەنساۋلىعىڭا دارىگەرلەر جانە مەملەكەتپەن بىرگە جاۋاپكەرشىلىكپەن قاراۋ – بۇل ءاربىر ادامنىڭ ورىنداي الاتىن مىندەتى: سكرينينگتەرگە قاتىسۋ, سالاۋاتتى ءومىر سالتىن ۇستانۋ جانە ءپوزيتيۆتى ويلاي ءبىلۋ, ءوزىنىڭ حاباردارلىعىن ارتتىرۋ ارقىلى ميفتەردەن ارىلۋ – وسىنىڭ بارلىعى كەز-كەلگەن قازاقستاندىقتىڭ قولىنان كەلەدى.
جىل سايىن قازاقستاندا قاتەرلى ىسىك اۋرۋىنىڭ 36 مىڭعا جۋىق جاڭا جاعدايى تىركەلەدى. ونكولوگيالىق ەسەپتە 180 مىڭنان استام قازاقستاندىق تۇر.
