رۋحانيات • 03 اقپان، 2021

«سارى بالا» ۇلتتىق ۇلاندا

509 رەت كورسەتىلدى

وسىدان ءبىر اي بۇرىن الەۋمەتتىك جەلىلەر مەن مەسسەندجەرلەردىڭ بارىنەن اسكەري كيىم كيگەن جاۋىنگەردىڭ رامازان ستامعازيەۆ ورىندايتىن «داريعا داۋرەن» ءانىن اۋەلەتىپ ايتىپ جاتقان بەينەروليگى قىزۋ تالقىعا تۇسەدى، دەپ حابارلايدى Egemen.kz

جۇرتتىڭ بارلىعى بۇل روليكتى وزدەرىنە جۇكتەپ، ءبىر-بىرىمەن ءبولىسىپ جاتتى. ەڭ قىزىعى، جاۋىنگەر ۇلتتىق ۇلاننىڭ قاتارىنا قىزمەت اتقارۋعا كەلىپتى. مۇمكىندىكتى پايدالانىپ، ءبىز روليكتىڭ كەيىپكەرىمەن اڭگىمەلەستىك. سونىمەن ەل اراسىندا «سارى بالا» بولىپ تانىلعان سارباز كىم؟

قاتارداعى الەكساندر اۆەركيەۆ ۇلتتىق ۇلاننىڭ ەلوردالىق جەدەل بريگاداسى – 5573 اسكەري بولىمىندە قىزمەت اتقارادى. وقۋ پۋنكتىندە العاشقى اسكەري دايىندىقتان ءوتىپ جاتىر. اسكەرگە دەيىن  ششۋچينسك قالاسىنىڭ جوعارى پەداگوگيكالىق كوللەدجىندە ساباق بەرگەن، سودان كەيىن استراحانكا اۋىلىندا كلۋب مەڭگەرۋشىسى بولدى. وقۋ ورداسىندا ءبىلىم ىزدەۋشىلەردى ۆوكالدىق ونەرگە ۇيرەتتى. بۇگىنگى قوعامداعى اقپاراتتىق تەحنولوگيالاردىڭ مۋزىكالىق يندۋسترياداعى ورنى مەن ءرولى تۋرالى دارىستەر وقىدى. جاستاردى ءان ورىنداۋعا ۇيرەتتى. ءوزى دە كوپ ىزدەندى. بۇگىنگى تاڭدا سولتۇستىك قازاقستان وبلىسىنداعى جوعارى وقۋ ورىندارىنىڭ بىرىندە ءبىلىمىن جالعاستىرىپ جاتىر.

«جاستاردى ونەردىڭ جوعارى دەڭگەيىنە دەگەن سۇيىسپەنشىلىگىن اشۋ كەرەك. ويتكەنى جوعارى ونەر عانا ماڭگىلىك. قازىرگى كەزدە جەڭىل-جەلپى مۋزىكا جەتكىلىكتى. ولار باسىندا جاقسى ەستىلۋى مۇمكىن، كەيىندە ءوز تىڭدارماندارىن ۇستاپ تۇرا المايدى. ال كلاسسيكا ەشقاشان ءوزىنىڭ ماڭىزدىلىعىن جوعالتپايدى. سوندىقتان قاتارلاستارىما حالىقتىڭ سۇزگىسىنەن وتكەن دۇنيەلەردى تىڭداۋدى، دامىتۋدى جانە ايتۋدى ۇسىنار ەدىم. ءوزىم دە  ۆوكالدىق تۇرعىدان ساپالى ءارى حالىقتىڭ جۇرەگىنەن وتكەن دۇنيەلەردى ورىندايمىن»، دەيدى جاس ورەن.

ءبىز الەكساندردىڭ جاس تا بولسا، تالعامى جوعارى بولعانىنا تاڭدانا قارادىق. ءوزى جاس ءارى ءبىلىمدى ازامات جاقسى تاربيە كورگەن. ءبىز ودان تۋىپ-وسكەن ورتاسى، جالپى مۋزىكاعا، سونىڭ ىشىندە قازاق اندەرىنە دەگەن قىزىعۋشىلىق قالاي پايدا بولعانى تۋرالى ايتىپ بەرۋدى سۇراعاندا ول بىلاي دەپ جاۋاپ بەردى.

1

ء«وزىم وسى اقمولا وبلىسى استراحانكا ەلدى مەكەنىن تۋماسىمىن. جاستايىمنان ونەرگە جاقىن بولىپ ءوستىم. جاقىندارىم مەنى ءار ءتۇرلى ونەر ۇيىرمەلەرىنە بەرگەن. سونىڭ ىشىندە ۆوكال ۇيىرمەسى جانىما جاقىن كەلدى. ءوزىمدى وسى مۋزىكادان تاپتىم. بىردە ۆوكال بويىنشا ۇستازىم زاۋرە مۇحامەدجانوۆا مەنىڭ قازاق تىلىندە اكتسەنتسىز ءان ايتاتىنىمدى كورىپ، ماعان  جوعارى تونالدى اندەردى ورىنداۋعا كەڭەس بەردى. سول وزىمە ۇناعان ءاننىڭ ءبىرى - رامازان ستامعازيەۆ ورىندايتىن «داريعا داۋرەن» ءانى بولدى»، دەپ اعىنان جارىلدى الەكساندر.

روليكتى كورگەن كورەرمەندەردىڭ كوبىسىنىڭ كوكەيىندە تۇرعان ساۋالداردىڭ ءبىرى «سارى بالا قازاق ءتىلىن تۇسىنبەسە، قالاي وسى ولەڭدى ناقىشىنا كەلتىرىپ ورىندايدى؟».  وسى تۋرالى ۇلاندىق جاۋىنگەر بىلاي سىر شەرتەدى.

«مەن ءوزىم قازاقستان رەسپۋبليكاسىنىڭ ازاماتى رەتىندە مەملەكەتتىك ءتىلدى ەركىن مەڭگەرۋىم كەرەك. دوستارىم ماعان قازاق ءتىلىن ۇيرەنۋگە كومەكتەستى. دوستار اراسىندا اۋىزەكى تىلدە جاقسى سويلەسەمىز. ءتىلدى تەرەڭ بىلمەسەم دە، اڭگىمەلەسۋگە ءسوز قورىم جەتكىلىكتى. ولەڭدى تولىق تۇسىنبەي، ونى ءوز جۇرەگىنەن شىعارىپ ورىنداي المايسىڭ. جۇرەكتەن شىققان ءان عانا جۇرەككە جەتەدى. كەيىن الەۋمەتتىك جەلىلەرگە، «You Tube» ۆيدەوحوستينگىنە قازاقشا ورىنداعان اندەرىمدى سالدىم. ماعان كوپتەگەن ادامدار جىلى پىكىرلەر جازدى. قازاق ءتىلدى تىڭدارماندارىم ماعان «سارى بالا» دەگەن ات بەردى. كەيىن  «You Tube»-تاعى ارنامدى «سارى بالا» دەپ اۋىستىردىم. ءبىر بايقاعانىم، قازاقشا ولەڭدەردىڭ قۇدىرەتى مىقتى. ماعان شەتەلدە تۇراتىن قازاقتار مەن بۇرىنعى قازاقستان تۇرعىندارى حابارلاستى. لوس-اندجەلەستە، گەرمانيادا، رەسەيدە تۇراتىن قازاقستاندىقتار حابارلاسىپ، «سەنىڭ اندەرىڭنەن قازاق دالاسىن كورگەندەي بولدىق»، «وتانىمىزدى ەسىمىزگە ءتۇسىردىڭ» دەيتىن پىكىرلەر ايتتى. مەن، ارينە، وسى پىكىرلەرگە قۋانىشتىمىن. بۇل ماعان قوسىمشا كۇش بەرەدى. مەنى ءتىلدى جاقسى ۇيرەنۋگە، جاڭا ولەڭدەر ورىنداۋعا ىنتالاندىرادى. اسكەر قاتارىندا ءجۇرىپ تە ونەرىمدى جەتىلدىرۋگە تىرىسامىن»، دەيدى الەكساندر اۆەركيەۆ.

اسكەر دەمەكشى، جاقىن ۋاقىتتا الەكساندر اسكەري انت قابىلداپ، تولىققاندى  وتان قورعاۋشىلاردىڭ  قاتارىن تولىقتىرادى. الايدا، قازىردىڭ وزىندە ۇلتتىق ۇلان قاتارىندا ءجۇرىپ، كوپتەگەن جاڭا دۇنيەلەردى ۇيرەنگەنىن ايتادى. سونىڭ ىشىندە ءتارتىپ پەن ەلجاندىلىق  تاربيەنىڭ ورنى ەرەكشە.

«اسكەري ۇجىم – جاۋىنگەرلىك وتباسى سەكىلدى. سەن جالعىز ەمەس، قارۋلاستارىڭمەن بىرگەسىڭ. قارۋلاس جولداستارىڭمەن وتان قورعاۋعا دايىن بولۋىن كەرەكسىڭ. العاشقى اسكەري دايىندىقتان بارشامىز بىرگە وتەمىز. بىلمەگەنىمىزدى ءبىر-بىرىمىزگە ۇيرەتەمىز. ويتكەنى، ونسىز ۇجىم بولمايدى. اسكەرگە ءوز ەركىممەن سۇرانىپ باردىم. بارار الدىندا ينتەرنەت ارقىلى اسكەر تۇرلەرى تۋرالى اقپارات جينادىم. كوز الدىما ۇلتتىق ۇلان جاۋىنگەرى دەنيس ياكوۆلەۆتىڭ بەينەروليگى كەلدى. ول قازاقتىڭ قاسيەتتى دومبىراسىمەن حالىق اندەرىن ورىندادى. ونىڭ ۇستىنە ادام ءومىرىن ساقتاپ قالعان ەرجۇرەك ازامات ەكەن. مەن دە دەنيس سەكىلدى ۇلتتىق ۇلان اسكەرىندە قىزمەت اتقارعىم كەلدى. ادام نەگە ۇمتىلادى سول ورىندالادى دەگەن راس سەكىلدى. مەن ەلوردانىڭ قاسىنداعى 5573 اسكەري بولىمىنە وتان الدىنداعى بورىشىمدى ورىنداۋعا كەلدىم. وسى اسكەري بولىمدە ۇلتتىق ۇلاننىڭ ءان-بي ءانسامبلى ورنالاسىپتى. ءدال وسى انسامبلدە دەنيس ياكوۆلەۆ قىزمەت اتقارادى ەكەن. بولاشاقتا مۇمكىندىك بولسا، دەنيسپەن ءبىر ساحنادا قازاقتىڭ حالىق اندەرىن ورىنداسام دەيمىن. مەن ەڭ ءبىرىنشى كەزەكتە جاۋىنگەرمىن. دەسە دە، مۇمكىندىك تاۋىپ اسكەري ونەرپازداردىڭ قاتارىن دا تولىقتىرعىم كەلەدى. تەك ۇلتتىق ۇلاندا وسىنداي ازاماتتار قىزمەت اتقارادى ەكەن»، دەيدى جاۋىنگەر.

قاتارداعى الەكساندر اۆەركيەۆ اسكەري قىزمەتىن جاڭا باستاعان جاۋىنگەر. ازاماتتىق ومىردەگى تانىمالدىعى ونىڭ قىزمەتىنە وڭ اسەرىن تيگىزبەسە، زيانىن تيگىزبەسى راس. «حالىق پەن اسكەر ءبىر» دەمەكشى، اسكەري ورتاداعى الەكساندرداي ونەرپازدار حالىق پەن اسكەر اراسىندا ورناعان التىن كوپىر بولاتىنىنا كامىل سەنەمىز. ونەرلى جاستارىمىز كوپ بولعاي!

ۇقساس جاڭالىقتار