كەزدەسۋ بارىسىندا ۆەدومستۆولىق جوعارى وقۋ ورىنداردىڭ بازاسىندا كاسىبي دايارلىقتى جوعارى دەڭگەيدە ىسكە اسىرۋعا مۇمكىندىك بەرەتىن ماتەريالدىق-تەحنيكالىق جانە كادرلىق رەسۋرستارى بار مامانداردى دايارلاۋ مەن قايتا دايارلاۋ ماسەلەلەرى قارالدى.
قورعانىس مينيسترلىگى قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىندە (ۇقۋ) جوعارى وقۋ ورنىنان كەيىنگى ءبىلىم بەرۋ باعدارلامالارى بويىنشا تجم اسكەري قىزمەتشىلەرى ءۇشىن كۆوتالاردى 2021 جىلعا ىرىكتەۋ جوسپارىنا ەنگىزۋگە دايىندىعىن ءبىلدىردى. ۇلتتىق قورعانىس ۋنيۆەرسيتەتىنىڭ بازاسىندا «ازاماتتىق قورعاۋ» كافەدراسىن قۇرۋ ماسەلەسى تالقىلاندى. بۇل قىزمەتكە تجم ماماندارى تارتىلاتىن بولادى.
قورعانىس مينيسترلىگىنىڭ جوعارى وقۋ ورىندارىندا رادياتسيالىق, حيميالىق جانە بيولوگيالىق قورعانىس, سونداي-اق بايلانىستى ۇيىمداستىرۋ ماماندىعى بويىنشا قۇتقارۋشىلاردى دايارلاۋ جانە ولاردىڭ بىلىكتىلىگىن ارتتىرۋ جوسپاردا بار.
توتەنشە جاعدايلار مينيسترلىگى وڭىرلەر بويىنشا, ونىڭ ىشىندە تجم كوكشەتاۋ تەحنيكالىق ينستيتۋتىندا قارۋلى كۇشتەردىڭ ورتكە قارسى قىزمەتىنىڭ اسكەري قىزمەتشىلەرىن دايارلىق كۋرستان وتكىزۋدى قامتاماسىز ەتۋدى جوسپارلاپ وتىر.
