گەرمانيا ۇكىمەتى كوروناۆيرۋس كوپ انىقتالىپ جاتقان مەملەكەتتەردىڭ ساياحاتشىلارىنىڭ ەلگە كەلۋىنە تىيىم سالماقشى. بۇل رەتتە تىزىمدە پورتۋگاليا, ۇلىبريتانيا, وار, برازيليا سياقتى مەملەكەتتەر تۇر. شەكارادان وتۋگە رۇقسات تەك جۇك تاسىمالداۋشىلارعا عانا بەرىلۋى مۇمكىن.
«بىزگە تاپ قازىر ارەكەت ەتۋ كەرەك», دەپ مالىمدەدى ىشكى ىستەر ءمينيسترى حورست زەەحوفەر.
«قولدا بار اقپاراتتارعا قاراعاندا, ءبىز الداعى ۋاقىتتا جوسپارىمىزعا سايكەس كەلەتىن شەشىمدەردى جالپىەۋروپالىق دەڭگەيدە قابىلداي المايمىز. سوندىقتان دا ءبىز قازىر ۇلتتىق دەڭگەيدەگى شارالاردى قولعا الىپ جاتىرمىز», دەدى ول.
جۇما كۇنى بيلىك وكىلدەرى وزدەرىنىڭ ناقتى ۇستانىمدارىن حاباردار ەتەدى. نورۆەگيا ءوزىنىڭ شەكاراسىن جاباتىنى تۋرالى مالىمدەدى. ەلگە كىرۋ تەك اسا قاتتى قاجەتتىلىك تۋىنداعاندا عانا رۇقسات ەتىلەدى. بيلىك وكىلدەرى تاۋار تاسىمالداۋعا رۇقسات بەردى. سونىمەن قاتار شۆەتسيا مەن فينليانديادان كەلەتىن مەديتسينا ماماندارىنىڭ ەلگە كىرۋىنە بولادى.
پرەمەر-مينيستر ەرنا سۋلبەرگ: «قاڭتاردىڭ 29-نا قاراعان ءتۇنى ءبىز نورۆەگياعا كىرۋدىڭ ەڭ قاتاڭ ەرەجەلەرىن ەنگىزەمىز. ءىس جۇزىندە شەكارا ءبىزدىڭ ەلىمىزدە تۇرمايتىن ازاماتتاردىڭ بارلىعى ءۇشىن جابىلادى», دەپ تولىقتىرىپ ءوتتى.
ول سونىمەن قاتار اسا قاجەتتى تاۋارلار بۇرىنعىسىنشا نورۆەگياعا جەتكىزىلە بەرەتىنىن جانە ەرەكشە قاجەت قىزمەت تۇرلەرى دە كورسەتىلەتىنىن ايتتى. ال ەڭبەك ميگرانتتارى كەلەسى اپتادا ەلگە كەلە المايدى. بۇل ءتارتىپ ەكى اپتادان سوڭ قايتا قارالادى.
لوندون بولسا, بىرىككەن كورولدىككە پورتۋگاليادان, وڭتۇستىك امەريكا ەلدەرى مەن افريكا مەملەكەتتەرىنەن كەلۋشىلەرگە مىندەتتى كارانتين ەنگىزبەك. ادامدار 10 كۇن بويى مەيمانحانادان شىقپاي جاتادى. ءتارتىپ بۇزعاندارعا ايىپپۇل سالىنادى.
مۇنداعى ماقسات – كورولدىككە جاڭا جانە وتە قاۋىپتى ۆيرۋس شتامدارىن جۇقتىرعانداردىڭ اۋرۋدى ەلگە تاراتۋىنىڭ الدىن الۋ. ەگجەي-تەگجەيلى جوسپاردى بيلىك وكىلدەرى كەلەسى اپتادا ۇسىنباق.
وسىعان دەيىن اتالعان تالاپتاردىڭ اۋستراليا مەن جاڭا زەلانديادا دا ەنگىزىلگەنى حابارلاندى.
