استانادا يزرايل مەملەكەتىنىڭ سىرتقى ىستەر مينيسترلىگى مەن قازاقستانداعى ەلشىلىگىنىڭ جانە Globe gatway كومپانياسىنىڭ ۇيىمداستىرۋىمەن ەكى كۇنگە ۇلاسقان 2-قازاقستان-يزرايل بيزنەس فورۋمى اياقتالدى.
استانادا يزرايل مەملەكەتىنىڭ سىرتقى ىستەر مينيسترلىگى مەن قازاقستانداعى ەلشىلىگىنىڭ جانە Globe gatway كومپانياسىنىڭ ۇيىمداستىرۋىمەن ەكى كۇنگە ۇلاسقان 2-قازاقستان-يزرايل بيزنەس فورۋمى اياقتالدى.
ايتۋلى شاراعا قازاقستان مەن ءيزرايلدىڭ بىرقاتار لاۋازىمدى تۇلعالارى مەن ءىرى كومپانيالارىنىڭ باسشىلارى, سونداي-اق, وزگە دە ۇيىمداردىڭ وكىلدەرى قاتىستى. ولاردىڭ اراسىندا قورشاعان ورتانى قورعاۋ جانە سۋ رەسۋرستارى ۆيتسە-ءمينيسترى ەرلان نىسانباەۆ, توتەنشە جاعدايلار ۆيتسە-مينيسترى ۆالەري پەتروۆ جانە «قازاقتەلەكوم» اق-تىڭ باسقارما توراعاسى قۋانىشبەك ەسەكەەۆ بولدى. يزرايل مەملەكەتىنىڭ قازاقستانداعى ەلشىسى ەلياۋ تاسمان شاراعا مودەراتور بولۋمەن قاتار, العاشقى باياندامانى دا ءوزى جاسادى.
ول اۋەلى ەكى ەلدىڭ دوستىق قارىم-قاتىناسى تۋرالى ايتا كەلىپ, ەكىنشى دۇنيەجۇزىلىك سوعىس كەزىندە قازاقستانعا تاعدىر تالكەگىمەن جەر اۋدارىلىپ كەلگەن ەۆرەي حالقىنا قازاقتار تەك ەسىگىن عانا ەمەس, ءجۇرەگىن دە اشىپ, شىن ىقىلاسپەن قابىلداعانىن اڭگىمەلەدى. «يزرايل مەملەكەتىن قۇرۋ بارىسىندا 20 جىل كولەمىندە ءبىز جەتە الماعان جەتىستىككە قازاقستان ەركىن سەرپىلىپ جەتتى. ونى كوزىمىز كورىپ وتىر. وسىندا ەلشى بولىپ كەلگەن ءبىر جىلدان استام ۋاقىتتا عانا مۇنداعى الەۋمەتتىك-ەكونوميكالىق دامۋ ءۇردىسى مەن تەحنيكالىق-تەحنولوگيالىق جاڭارۋ, جاڭعىرۋ ۇدەرىسىنە كۋا بولىپ ءجۇرمىن. يزرايل ىسكەرلەرىنە ايتارىم, قازاقستانعا كەلىڭىزدەر. وزدەرىڭىزبەن دەڭگەيلەس, ناعىز ىسكەر جانداردى وسى ەلدەن تاباسىزدار. ويتكەنى, بارلىق دامىعان ەلدەر قازاقستاندا ءوز ءارىپتەسىن ىزدەپ ءجۇر. مۇندا تەك يزرايل كاسىپكەرلەرى عانا كوزگە كورىنبەيدى», دەگەن ەلشى مىرزا ەكى ەلدىڭ ۇلتتىق كومپانيالارى مەن ىسكەرلەر ورتاسىن تىعىز ءارىپتەستىككە شاقىردى.
دەگەنمەن, بايانداماشى ەكى ەلدىڭ بىرلەسىپ اتقارىپ جاتقان جۇمىستارىن دا جوققا شىعارمادى. ماسەلەن, سوڭعى جىلدارى قازاقستانعا يزرايل ۇلگىسىندە جىلىجايلار سالىنىپ, وندا كوكونىستەردى سول ەلدىڭ تەحنولوگياسى بويىنشا تامشىلاتىپ سۋارۋ شاراسى جاقسى ناتيجەلەر بەرىپ وتىرعانىنا توقتالدى. ەلشى جىلىجاي قۇرىلعان جەرلەردە يزرايل اگرونومدارى تاجىريبە الماسۋ ماقساتىمەن 2-3 جىل بويى جۇمىس ىستەپ كەتەتىنىن دە ايتتى. ەندىگىدە ەكى ەل ءىت-يندۋسترياسى بويىنشا بىرلەسىپ جۇمىس ىستەسە, كوپ ناتيجەگە قول جەتكىزۋگە بولاتىنىن جەتكىزدى.
كەلەسى ءسوز كەزەگى بەرىلگەن توتەنشە جاعدايلار ۆيتسە-مينيسترى ۆ.پەتروۆ شارانى ۇيىمداستىرۋشىلارعا العىسىن ايتتى. ءسويتىپ, ەكى ەلدىڭ كاسىپكەرلەرىنە تىعىز بايلانىس جاساپ, پىكىر الماسۋ ءۇشىن وسىنداي قولايلى ىسكەرلىك الاڭى اشىلعانىنا ريزا كوڭىلىن ءبىلدىردى. «ءبىز بۇل فورۋمنىڭ ماڭىزىن جوعارى باعالايمىز. ويتكەنى, تەلەكوممۋنيكاتسيا سالاسىندا تاجىريبە الماسۋدا, جاڭا يدەيالاردى تالقىلاپ, تىڭ باعىتتاردى انىقتاۋدا كوپ كومەگى بولادى دەگەن ويدامىز», دەدى ۆ.پەتروۆ.
فورۋمدا ەكى ەلدىڭ كوپتەگەن ماماندارى ءسوز سويلەپ, ءوز تاجىريبەلەرىن ورتاعا سالدى. شارا اياسىندا قازاقستاننىڭ تەلەكوممۋنيكاتسيا سەكتورىنا شولۋ جاسالىپ, يزرايلدىك كومپانيالاردىڭ تانىستىرىلىمى ۇيىمداستىرىلدى جانە ەكىجاقتى كەزدەسۋلەر وتكىزىلدى.
نۇرباي ەلمۇراتوۆ,
«ەگەمەن قازاقستان».
