پۋشكين الاڭىنداعى كەلىسىلمەگەن اكتسياعا جينالعانداردىڭ 600-گە جۋىعى ۇستالعان. بۇل تۋرالى قوعامدىق باقىلاۋ كوميسسياسى (قبك) حابارلاعان. كوشەگە شىققان جۇرت تارقاعاننان كەيىن تۆەر كوشەسىندە قاۋىپسىزدىك شارالارى كۇشەيتىلگەن. نارازىلىق بىلدىرۋشىلەردىڭ قۇقىق قورعاۋ ورگاندارىمەن قاقتىعىستارى پۋشكين الاڭىندا, ستراستنىي جانە تسۆەتنوي بۋلۆارلارىندا, ترۋبنوي الاڭىندا جانە «ماترووسسكايا تيشينا» تەرگەۋ وقشاۋلاعىشىنىڭ جانىندا وتكەن. رەسمي مالىمەت بويىنشا نارازى ازاماتتار مەن قۇقىق قورعاۋ ورگاندارى قىزمەتكەرلەرىنىڭ اراسىندا زارداپ شەككەندەر بار.
ماسكەۋدەن بولەك, رەسەيدىڭ وزگە قالالارىندا دا نارازىلىق بىلدىرۋشىلەر كوشەگە شىققان. قۇقىق قورعاۋشىلار بۇكىل ەل بويىنشا 3068 ادامنىڭ ۇستالعانىن حابارلاعان. ال قۇقىق قورعاۋ ورگاندارىنىڭ 39 قىزمەتكەرى ماسكەۋدەگى اكتسيالاردا جاراقات العانى بەلگىلى بولدى.
سونداي-اق كامەلەتكە تولماعان بالالاردىڭ نارازىلىق اكتسياسىنا شىعۋى قوعامدا داۋ تۋعىزىپ وتىر. رەسەي فەدەراتسياسى پرەزيدەنتىنىڭ جانىنداعى بالا قۇقىقتارى جونىندەگى ۋاكىل اننا كۋزنەتسوۆا بالالارعا زاڭسىز اكتسيالاردا ورىن جوق بولۋعا ءتيىستى دەگەن پىكىر ءبىلدىردى.
نارازىلىق كەزىندە ۇستالعان كامەلەتكە تولماعان بالالاردىڭ بارلىعى اتا-انالارىنا امان-ەسەن تابىستالىپتى. رەسەيدىڭ «جاڭالىقتار اگەنتتىگى» ورىن العان جاعدايعا بايلانىستى كامەلەتكە تولماعانداردى زاڭسىز نارازىلىق اكتسيالارىنا تارتقانداردى قىلمىستىق جاۋاپقا تارتۋ تۋرالى زاڭ جوباسى پايدا بولعانىن جازدى. دەپۋتاتتار مەن قوعام بەلسەندىلەرى «تيك توك» الەۋمەتتىك جەلىسىندە كامەلەتكە تولماعانداردى كوشەگە شىعۋعا شاقىرعان حابارلاردىڭ تاراعانىن ايتادى. زاڭدى قاتايتۋ باستاماسىن رەسەيدىڭ تەرگەۋ كوميتەتى مەن جوعارعى سوتى قولداعانىمەن, ۇكىمەتى وعان قارسى بولعان. سوعان قاراماستان, اكتسيالارعا جاسوسپىرىمدەردىڭ قاتىسۋ تاقىرىبى ماڭىزدى سيپات الىپ, قوعامدا قىزۋ تالقىعا ۇلاستى. ال ەلدەگى ەپيدەميالىق جاعداي ءماز ەمەس. ءبىر تاۋلىكتە ىندەت جۇقتىرعاندار سانى 21 127 ادامعا ارتقان.
