بۇگىنگى كۇننىڭ باستى تاقىرىبىنىڭ ءبىرى – كامالا حارريسكە ءبىر توقتالايىق. ارعى تەگى ءۇندى-يامايكا ناسىلىنەن تامىر تارتاتىن دەموكرات ساياساتكەر 56 جاستا. كاليفورنيا شتاتىندا تۋىپ, حوۋارد, كاليفورنيا ۋنيۆەرسيتەتتەرىندە ءبىلىم العان.
ساياساتقا كەلمەستەن بۇرىن ادۆوكات بولىپ قىزمەت ەتكەن. بەرتىن كەلە دەموكراتيالىق پارتيانىڭ جارىق جۇلدىزىنا اينالدى. دجو بايدەن ونى «حالىققا قىزمەت ەتىپ جۇرگەن بىردەن-ءبىر ازامات» دەپ اتاپ, ونى ەلدەگى ەكىنشى ادام رەتىندە تاعايىندادى.
دەموكراتيانىڭ وتانى سانالاتىن اقش ءالى دە گەندەرلىك تەڭدىكتىڭ جىرىن جىرلاپ كەلەدى. الايدا تاريحقا شەگىنىس جاسايتىن بولساق, سوناۋ 1848 جىلى دا پرەزيدەنتتىككە ۇمىتكەرلەر قاتارىندا ايەل كانديدات كورىنگەن. ليۋكرەتسيا كوففين موتت ازاتتىق پارتياسى اتىنان پرەزيدەنتتىككە, ۆيتسە-پرەزيدەنتتىككە ۇمىتكەر بولدى.
ودان كەيىن تاريحتا ۆيكتوريا ۋدحۋل دەگەن ايەل تۋرالى دا سونداي دەرەك بار. 1872 جىلى مەملەكەت باسشىلىعىنا ءۇمىتتى ساياساتكەردىڭ سول تارتىستا جەڭىلىس تابۋىن كوبى كانديداتقا قويىلاتىن تالاپتىڭ ءبىرى – جاس شاماسى جەتپەۋىندە دەيدى. كەيبىرەۋلەر ماسەلە جاستا بولماعانىن جازادى. دەگەنمەن بۇل وقيعا ايەلدەردىڭ ساياساتقا بۇرىننان-اق تالاسى بولعانىن ايقىن دالەلدەپ تۇر.
نەگىزىنەن, ۆيكتوريا ۋدحۋل باسپاگەر بولعان دەگەن مالىمەت بار. ءوزىنىڭ اپكەلەرىمەن بىرگە جاڭالىققا, رەۆوليۋتسياعا قۇشتار بولعان. پرەزيدەنتتىككە ۇمىتكەرلىكپەن قاتار, Wall Street-تەگى العاشقى بروكەرلەردىڭ ءبىرى رەتىندە تانىلىپ ۇلگەرگەن. سايلاۋ قارساڭىندا تەڭ قۇقىقتار پارتياسىنىڭ نەگىزىن قالايدى. ساياسي ناۋقان كەزىندە گازەتكە ماقالالار جازىپ, ونى سول كەزدەگى ارىپتەستەرى دۇرىس قابىلداماي, سىنعا ۇشىرايدى.
ودان كەيىن ليۋكرەتسيا كوففين موتت ازاتتىق پارتياسى اتىنان پرەزيدەنتتىككە, ۆيتسە-پرەزيدەنتتىككە ۇمىتكەر بولدى. 1964 جىلعى سايلاۋدا 25 پايىز داۋىس جيناپ, ءتاۋىر ناتيجە كورسەتەدى.
1968 جىلى شارلەن ميتچەل ەسىمدى العاشقى افروامەريكالىق ايەل ءوز كانديداتۋراسىن ۇسىنادى. ول – نەگىزگى سايلاۋعا شاقىرۋ العان العاشقى ايەل ساياساتكەر. اقش-تىڭ كوممۋنيستىك پارتياسىنىڭ اتىنان قاتىسقان ۇمىتكەر نەبارى 1 075 داۋىس جيناعان.
1972 جىلى شيرلەي چيشولم مەن توني ناتان ءوزارا باق سىناسقان. 1988 جىلدىڭ سايلاۋى لەنورا فۋلاني دەگەن ۇمىتكەرمەن ەستە.
1984 جىلى قىتايلىق ەمميگرانتتار وتباسىنان شىققان ەمما ۋونگ مار ۆيتسە-پرەزيدەنت بولۋعا نيەت بىلدىرەدى. تابىسسىز سايلاۋدان كەيىن دە سوعىسقا قارسى, فەمينيستىك يدەياسىنا ادال بولىپ, سول جولدا ەلەۋلى ەڭبەك ەتەدى.
1996 جانە 2000 جىلدارى سايلاۋ بيۋللەتەندەرىندە ۋينونا لاديۋك ەسىمى كورىنەدى. ميننەسوتا شتاتىنان شىققان ەكونوميست جاسىلدار پارتياسى اتىنان ۇمىتكەر رەتىندە بەلگىلەنەدى. ول رالف نادەردىڭ جاعىندا بولىپ, ەكەۋى 2,7 پايىز, ياعني 2,9 ميلليون داۋىس جينايدى. بۇل جاسىلدار پارتياسىنىڭ العاش رەت وسىنشا كوپ داۋىس جيناۋى ەدى. بۇل جاڭا عاسىرداعى گەندەرلىك تەڭدىكپەن بىرگە دەموكراتيانىڭ جاڭا كورىنىسى ىسپەتتى قابىلدانعان.
2008 جىلعى تارتىستى سايلاۋعا اقش-تىڭ بۇرىنعى ءبىرىنشى حانىمى, بيلل كلينتوننىڭ ايەلى حيلاري كلينتون قاتىستى. دەموكراتتاردىڭ وكىلى, سەناتور كلينتون باراك وباماعا جول بەرسە دە, جوعارى باسەكەلەستىگىمەن ەستە قالدى. وسى ورايدا حيللاري كلينتوننىڭ پرەزيدەنتتىك دەباتقا قاتىسقان العاشقى ايەل ەكەنىن ەسكە سالا كەتكەن ءجون.
حيللاري حانىم ودان كەيىن 2016 جىلى دونالد ترامپتىڭ قارسىلاسى رەتىندە تاعى دا بوي كورسەتتى.
دەرەكتەرگە قاراساق, ءبىز اتاعان كانديداتتار كوبىنە 2-3 پارتيا وكىلدەرى. اۋەل باستا قولداۋشىلارى از بولعانىمەن, جىل وتە ءبىرسىپىرا داۋىس جيناپ, ايتارلىقتاي ناتيجە كورسەتكەنىن بايقاۋعا بولادى.
وسى ورايدا اقش پرەزيدەنتى اكىمشىلىگىندە قىزمەت ەتەتىن قانداسىمىز اسەل تولەنوۆا تۋرالى ايتپاي كەتپەسكە بولماس. بايدەن پرەزيدەنتتىككە كەلگەلى ونىڭ دا قىزمەتى جوعارىلاعانى حابارلاندى.
20 قاڭتاردا اسەل پرەزيدەنت پروتوكولى باسشىسىنىڭ مىندەتىن اتقارۋشى بولىپ تاعايىندالدى. ول اقش پرەزيدەنتى اكىمشىلىگىندە 15 جىلدان بەرى قىزمەت ەتەدى. باراك وبامانىڭ كەزىندە قىزمەتكە كەلىپ, 3 پرەزيدەنتپەن قاتار جۇمىس ىستەگەن.
قازاق قىزىنىڭ قازىرگى تەگى روبەرتس ەكەن. ديپلوماتيالىق قىزمەت مەكتەبىنىڭ تۇلەگى, ەدمۋند ۋولش اتىنداعى دجوردجتاۋن ۋنيۆەرسيتەتىنىڭ حالىقارالىق قۇقىق جانە ۇيىمدار سالاسىنداعى عىلىم باكالاۆرى دارەجەسى بار. وتانداسىمىز اعىلشىنشانى ايتپاعاندا, قازاق, ورىس جانە جاپون تىلدەرىن مەڭگەرگەن كورىنەدى.
پرەزيدەنتتى ۇلىقتاۋ راسىمىندە تاعايىندالعان كامالا حارريس ايەلدەر ءرولى تۋرالى ءسوز ەتۋدى ۇمىتپادى. ول ءوز اناسى ءۇندىستاننان قونىس اۋدارعاندا ءدال وسى جاعدايدى بولجاماسا دا, مۇنداي وقيعانىڭ مۇمكىن ەكەنىن بىلگەن شىعار دەگەن وي ايتتى. «مەن بۇگىن وزىمە دەيىنگى ايەلدەردىڭ ارقاسىندا ورتالارىڭدا تۇرمىن. 100 جىل بۇرىن كونستيتۋتسياعا وزگەرىس ەنگىزۋ, 55 جىل بۇرىن داۋىس بەرۋ قۇقىعى ءۇشىن كۇرەسكەن, دەموكراتيانى تۋ ەتكەن ايەلدەردىڭ كۇشىمەن وسىندامىن», دەدى ۆيتسە-پرەزيدەنت.
1848 جىلى ليۋكرەتسيا كوففين موتت باستاپ, جىلدار بويى جالعاسقان كۇرەس كەشە ءوز ناتيجەسىن كورسەتتى. ول ەڭبەكتىڭ ەش ەمەس ەكەنىن ءبىلۋ ءۇشىن ەكى عاسىرعا جۋىق ۋاقىت قاجەت بولدى.
