ماراپاتتاۋ ءراسىمى بارىسىندا قاسىم-جومارت توقاەۆ ەكى ەل اراسىنداعى وداقتاستىق قاتىناستاردى, سونداي-اق, دوستىق پەن ىنتىماقتاستىقتى نىعايتۋ ىسىنە ەلەۋلى ەڭبەك سىڭىرگەنى ءۇشىن رەسەي فەدەراتسياسىنىڭ ەلشىسى الەكسەي بوروداۆكينگە قازاقستاننىڭ جوعارى مەملەكەتتىك ناگراداسىن تابىستاپ وتىرعانىن اتاپ ءوتتى.
– ءسىز حالىقارالىق قاتىناستار ماسەلەلەرى بويىنشا بىلىكتى مامان رەتىندە ديپلوماتيالىق ورتالاردا تانىمالسىز. رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى رەتىندە مەملەكەتتەرىمىز اراسىنداعى دوستىقتىڭ تۇراقتى بولۋىنا, ماڭگىلىك سيپات الۋىنا زور كۇش سالىپ كەلەسىز. ءسىزدىڭ اتقارعان ۇلكەن ءارى اۋقىمدى جۇمىسىڭىز ءۇشىن ريزاشىلىق بىلدىرەمىز. سونىمەن قاتار ءسىز جاقىندا عانا جەكە ومىرىڭىزدەگى ەلەۋلى مەرەيتويلىق داتانى اتاپ ءوتتىڭىز. بۇل – كەرەمەت مەرەيتوي. اتالعان ماراپات تا وسى ايتۋلى وقيعاعا وراي بەرىلىپ وتىر, – دەدى مەملەكەت باسشىسى.
الەكسەي بوروداۆكين قازاقستان مەن رەسەي اراسىنداعى وداقتاستىق قاتىناستار مەن ينتەگراتسيالىق بايلانىستاردى دامىتۋعا جانە نىعايتۋعا قوسقان ۇلەسىن جوعارى باعالاعانى ءۇشىن قاسىم-جومارت توقاەۆقا العىس ايتتى.
– مەن بۇل ماراپاتتى ەلدەرىمىز اراسىنداعى بايلانىستاردى دامىتۋعا جەكە ءوزىمنىڭ عانا ەمەس, سونداي-اق, قازاقستان باعىتىندا ەڭبەك ەتىپ جاتقان بارلىق رەسەيلىك ديپلوماتتاردىڭ, ەڭ الدىمەن, ەلشىلىكتەگى ارىپتەستەرىمنىڭ قوسقان ۇلەسىنە بەرىلگەن باعا دەپ سانايمىن. قۇرمەتتى قاسىم-جومارت كەمەل ۇلى, ءبىزدىڭ وداقتاستىق, ينتەگراتسيالىق بايلانىستارىمىزدى ودان ءارى جوعارى ءارى ساپالى دەڭگەيگە كوتەرۋ ءۇشىن بار كۇش-جىگەرىمدى جۇمساي بەرەتىنىمدى نىق سەنىممەن ايتامىن, – دەدى الەكسەي بوروداۆكين.
