بىلتىر قىزىلوردادا 2181 ازامات «باستاۋ» جوباسىن ونلاين وقىدى

ايماقتار • 20 قاڭتار، 2021

بىلتىر قىزىلوردادا 2181 ازامات «باستاۋ» جوباسىن ونلاين وقىدى

20 رەت كورسەتىلدى

بۇل تۋرالى كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ ايتتى.

«باستاۋ» جوباسى وتكەن جىلدان باستاپ ونلاين وتكىزىلۋدە. جوبا اياسىندا 2020 جىلى قىزىلوردا وبلىسى بويىنشا 2150 ادامدى وقىتۋ جوسپارلانعان بولاتىن. جىل سوڭىندا 2181 ازامات سەرتيفيكات الدى. ولاردىڭ 1966-سى اياقتاعانى تۋرالى، 205-ءى قاتىسقانى تۋرالى قۇجاتقا يە بولدى، - دەيدى پالاتا باسشىسى.

بىلتىر وقىعان ازاماتتاردىڭ ىشىندە جالپى سوماسى 422،1 ملن تەڭگە بولاتىن 746 قاتىسۋشىنىڭ جوباسىنا قارجى بولىنگەن. ونىڭ 411،2 ملن تەڭگەنى قۇرايتىن 741 جوباسى مەملەكەتتىك گرانت ەسەبىنەن قارجىلاندىرىلسا، 10،9 ملن تەڭگەلىك 5 جوبا مەملەكەتتىك باعدارلاما شەڭبەرىندە جەڭىلدەتىلگەن نەسيەگە قول جەتكىزگەن.

ايتا كەتۋ كەرەك، «ەڭبەك» مەملەكەتتىك باعدارلاماسى اياسىندا كاسىپكەرلىك نەگىزدەرىنە وقىتۋ بويىنشا «باستاۋ» جوباسى 2017 جىلدان باستاپ جۇزەگە اسىرىلۋدا. كۋرسقا قاتىسۋشىلار 21 كۇن ىشىندە ءوز بىلىكتىلىكتەرىن ارتتىرادى جانە ارنايى بيزنەس-جاتتىقتىرۋشىلاردان كاسىپ اشۋ جانە جۇرگىزۋدىڭ قىر-سىرىن ۇيرەنەدى.

وتكەن جىلى جوبا 10 ماۋسىمدا باستالىپ، قىزىلوردا قالاسى مەن وبلىستىڭ 7 اۋدانىندا، سونداي-اق بايقوڭىر قالاسىندا وتكىزىلدى. ەلدە توتەنشە جاعداي جاريالانۋىنا جانە كارانتيندىك شارالاردىڭ ەنگىزىلۋىنە بايلانىستى وقىتۋدىڭ كەيبىر ەرەكشەلىكتەرى بولدى. وقۋ كارانتيگە وراي ونلاين جۇرگىزىلدى. بەلگىلى ءبىر داعدىلار مەن بىلىمگە يە بولىپ، بەينە ساباقتار تاپسىرمالارىن ءساتتى ورىنداعاندار وقۋدى ەرتەرەك اياقتادى.

كۋرس 12 مودۋل بويىنشا 50 تانىمدىق بەينە ساباقتان جانە ءوز بەتىنشە ورىنداۋعا ارنالعان 9 تاپسىرمادان تۇرادى. وقۋ پروتسەسى اياقتالعان كەزدە تىڭداۋشى قورىتىندى تەستىلەۋدەن وتەدى. تىڭداۋشى مۇمكىندىگىنشە كوپ بالل جيناۋى كەرەك. وسىدان كەيىن عانا وعان بيزنەس-جوسپار قۇراستىرۋشىسى اشىلادى. بيزنەس-جوسپار ءۇشىن ەڭ جوعارى باعا 30 بالل. كۋرس بويىنشا اياقتاعانى تۋرالى جانە قاتىسقانىن راستايتىن سەرتيفيكات بەرىلەدى. سەرتيفيكاتتىڭ سوڭعى ءتۇرى جەڭىلدەتىلگەن پايىزبەن نەسيە الۋعا نەمەسە مەملەكەتتىك گرانتقا قاتىسۋعا قۇقىق بەرمەيدى. اياقتاعانى جايلى سەرتيفيكاتتى الۋ ءۇشىن قاتىسۋشى 60 % (18 بالل) جانە ودان جوعارى بالل جيناۋى قاجەت. ەگەر قاتىسۋشى بيزنەس-جوسپاردى تەكسەرۋ ناتيجەلەرى بويىنشا شەكتى بالل جيناماسا، وعان قاتىسقانى تۋرالى سەرتيفيكات تاپسىرىلادى. قاتىسۋشىنىڭ بيزنەس-جوسپاردى پورتال ارقىلى قايتا تاپسىرۋعا 2 مۇمكىندىگى بار.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز