مەملەكەت باسشىسى بەردىبەك ساپارباەۆتى قابىلدادى

پرەزيدەنت • 20 قاڭتار، 2021

مەملەكەت باسشىسى بەردىبەك ساپارباەۆتى قابىلدادى

48 رەت كورسەتىلدى

مەملەكەت باسشىسىنا ءوڭىردىڭ 2020 جىلعى دامۋ قورىتىندىلارى مەن پرەزيدەنت تاپسىرمالارىنىڭ ورىندالۋ بارىسى، سونداي-اق، قازاقستان حالقىنا ارنالعان جولداۋداعى مىندەتتەردى جۇزەگە اسىرۋ جوسپارى جونىندە باياندالدى، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

ايىم ءداۋىت

بەردىبەك ساپارباەۆ قاسىم-جومارت توقاەۆقا ەسەپ بەرىلىپ وتىرعان كەزەڭدەگى جامبىل وبلىسىنىڭ ەكونوميكاسىنىڭ ءوسىمى 102،2 پايىزعا، نەگىزگى كاپيتالدىڭ ينۆەستيتسياسى 344،1 ميلليارد تەڭگەگە جەتكەنى جايىندا ايتتى.

كەزدەسۋ بارىسىندا الەۋمەتتىك سالانى دامىتۋعا ەرەكشە كوڭىل ءبولىندى. پرەزيدەنتكە پاندەميا كەزىندە وبلىستىڭ 524 مىڭ تۇرعىنىنا 44،6 ميلليارد تەڭگە كولەمىندە قارجىلاي الەۋمەتتىك كومەك كورسەتىلگەنى تۋرالى ايتىلدى. سونداي-اق تاۋەلسىزدىك كۇنى مەن جاڭا جىل مەرەكەلەرى قارساڭىندا 8 مىڭ ادامعا 203 ميلليون تەڭگە كولەمىندە قوسىمشا ءبىر رەتتىك كومەك بەرىلگەن.

سونىمەن قاتار قاسىم-جومارت توقاەۆقا قورداي اۋدانىنداعى احۋال جونىندە باياندالدى. وبلىس اكىمىنىڭ ايتۋىنشا، اۋدانداعى جاعداي تۇراقتى. بىلتىر تۇرعىن ءۇي جانە جول قۇرىلىسى، ءبىلىم بەرۋ، مەديتسينا، مادەنيەت جانە سپورت سالالارى بويىنشا جالپى قۇنى 35،1 ميلليارد تەڭگە بولاتىن 392 جوبا ىسكە اسىرىلعان. مەملەكەت باسشىسىنىڭ تاپسىرماسى بويىنشا 22 ەلدى مەكەنگە گاز تارتۋ، اۋىزسۋمەن قامتاماسىز ەتۋ جانە 391 شاقىرىم جول سالۋ جۇمىستارى جۇرگىزىلگەن. 360 پاتەرلىك 5 تۇرعىن ءۇي سالىنعان.

بەردىبەك ساپارباەۆ كوروناۆيرۋستىڭ كەلەسى تولقىنىنا دايىندىق جونىندە ايتتى. وبلىستا جۇقپالى اۋرۋ جۇقتىرعاندار ءۇشىن 4،5 مىڭ جانە جان ساقتاۋ بولىمدەرىندە 468 توسەك-ورىن دايىندالعان. ءدارى-دارمەكتىڭ ەكى ايلىق قورى جاساقتالعان. قاجەت بولعان جاعدايدا قوسىمشا 7 مىڭعا دەيىن مەديتسينا قىزمەتكەرلەرى جۇمىسقا تارتىلادى.

قورداي اۋدانىنىڭ گۆاردەيسك اۋىلىنداعى بيولوگيالىق قاۋىپسىزدىك پروبلەمالارى جونىندەگى عىلىمي-زەرتتەۋ ينستيتۋتىنىڭ بازاسىندا وتاندىق يممۋندىق پرەپاراتتار شىعاراتىن زاۋىتتىڭ قۇرىلىسى جۇرگىزىلىپ جاتىر.

بەردىبەك ساپارباەۆ قاسىم-جومارت توقاەۆقا وڭىردەگى اپاتتى جاعدايدا تۇرعان جانە ءۇش اۋىسىمدى مەكتەپتەردىڭ ماسەلەسىن شەشۋ، بۇقارالىق سپورتپەن شۇعىلداناتىن ادامداردىڭ سانىن 35 پايىزعا دەيىن جەتكىزۋ جوسپارى تۋرالى اقپارات بەردى.

مەملەكەت باسشىسى ءوڭىردىڭ الەۋمەتتىك-ەكونوميكالىق دامۋى بويىنشا وبلىس اكىمىنىڭ جۇمىسىنا وڭ باعا بەرىپ، ەپيدەميالىق احۋالدى باقىلاۋدا ۇستاۋدى، ينۆەستيتسيا تارتۋ جانە جۇمىسپەن قامتۋ جول كارتاسىن ءتيىمدى جۇزەگە اسىرۋ جۇمىستارىن جانداندىرۋدى تاپسىردى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز