جاسىم 85-تە. ول كەزدەرى «سوتسياليستىك قازاقستان» دەگەن اتالىمعا يە باسىلىممەن 1951 جىلى تاعدىردىڭ قالاي تابىستىرعانى كوكەيىمدە جاتتالىپ قالىپتى. اكە-شەشەدەن جاستاي ايىرىلىپ, 8 سىنىپتان كەيىن وقۋدى ءارى قاراي جالعاستىرۋعا مۇمكىندىك بولمادى.
جاسىم 85-تە. ول كەزدەرى «سوتسياليستىك قازاقستان» دەگەن اتالىمعا يە باسىلىممەن 1951 جىلى تاعدىردىڭ قالاي تابىستىرعانى كوكەيىمدە جاتتالىپ قالىپتى. اكە-شەشەدەن جاستاي ايىرىلىپ, 8 سىنىپتان كەيىن وقۋدى ءارى قاراي جالعاستىرۋعا مۇمكىندىك بولمادى. سوعىس سالعان اۋىر جارادان اۋىل ادامدارىنىڭ ءالى وڭالىپ كەتە قويماعان, تىرشىلىكتىڭ جۇدەۋ كەزى. ءبىز قۇرالىپتاس وڭكەي جەتىمەكتەردى قاراعاندى قالاسىنداعى فزو-عا جىبەردى. وندا ءۇش اي وقىپ, شاحتاعا جۇمىسقا كىردىم. اراگىدىك قولىما وبلىستىق «سوۆەتتىك قاراعاندى» گازەتى ىلىگىپ قالىپ ءجۇردى. قازاق اۋىلىندا تۋىپ-ءوسىپ, مەكتەپتى انا تىلىمدە بىتىرگەندىكتەن, قۇمارلىعىم با – ءۇتىر-نۇكتەسىنە دەيىن باس الماستان وقىپ شىعامىن. فزو-نى بىتىرگەننەن كەيىن پەتروپاۆل قالاسىنداعى اتقارۋشى مەحانيزمدەر زاۋىتىنا توكار بولىپ ورنالاستىم. ۇيرەنىپ قالعان ادەتىممەن بىردە كىتاپحاناعا باس سۇقتىم. وڭكەي ورىسشا باسىلىمدار... قازاق تىلىندەگى بىرەۋى ىرىمعا تابىلسايشى. سودان سالىپ ۇرىپ «پارتكوم» دەگەن جازۋى انادايدان «مەنمۇندالاپ» تۇرعان كابينەتكە كىردىم. جاستىق شاقتىڭ قىزبالىعى ما, نامىس وتىنىڭ تۇتانعانى ما, تاپ باسىپ ايتا المايمىن. ۇزىن ءسوزدىڭ قىسقاسى, موسقال تارتقان پارتكوم حاتشىسى مەنىڭ نە ايتپاعىمدى تۇسىنگەن بولۋ كەرەك, ك ۇلىمسىرەگەن كۇيى ەسىككە دەيىن شىعارىپ سالدى. كوپ ۇزاماي كىتاپحانادا العاشقى قازاق گازەتتەرى رەسپۋبليكالىق"سوتسياليستىك قازاقستان» مەن وبلىستىق «لەنين تۋى» پايدا بولدى.
وسى كاسىپورىندا باقانداي 45 جىل قىزمەت ەتتىم. بيۋرو مۇشەلىگىنە دە, دەپۋتاتتىققا دا, قازاقستان سەزىنە دەلەگات بولىپ تا سايلاندىم. ارادا 62 جىل اتتاي جەلىپ وتە شىقسا دا, قوس باسىلىمنىڭ تۇراقتى وقىرمانىمىن. ءتىپتى, تاۋەلسىزدىكتىڭ ەلەڭ-الاڭ شاعىندا اقساقالدار القاسىنىڭ مۇشەسى بولا ءجۇرىپ, قازاق تىلىندەگى گازەت-جۋرنالدارعا جازىلۋدى تالماي ناسيحاتتادىق. بۇگىندە قاتارىمىزدا جوق ءماجكەن عابباسوۆ, ءنىل بولاتباەۆ, قوسىل وماروۆ سىقىلدى ۇلتجاندى زامانداستارىم گازەت-جۋرنالعا جازىلۋدى «ەگەمەن قازاقستان» مەن «سولتۇستىك قازاقستان» باسىلىمدارىنان باستايتىن. جۇرگەن-تۇرعان جەرلەرىندە وسى گازەتتەردە جارىق كورگەن تاعىلىمدى ماقالالاردان مىسالدار كەلتىرىپ, ۇلگى-ونەگە رەتىندە العا تارتىپ وتىراتىن.
قازىر جاسىم ۇلعايسا دا, ابدەن باۋىر باسىپ قالعان سۇيىكتى گازەتىمنەن قول ۇزگەن ەمەسپىن. جۇما نامازىنا بارعان كەزدە ءوزىم تۇرعىلاس «ەگەمەننىڭ» تۇراقتى وقىرماندارى زەينوللا قاجى ولجاباەۆپەن, وجان قاليمەن گازەتتىڭ تارالىمى, باعىت-باعدارى جايلى پىكىرلەسىپ تۇرامىز. كوكەيكەستى ءماسەلەلەردى تالقىعا سالامىز.
ءسوز اراسىندا ۇلتتىق بانك وبلىستىق فيليالىنىڭ ديرەكتورى, ەكونوميكا عىلىمدارىنىڭ كانديداتى قاجىراحىموۆ جومارت بالاما ريزاشىلىعىمدى ءبىلدىرگىم كەلەدى. ماعان دەمەۋشىلىك قولىن سوزىپ, «ەگەمەنگە» جازدىرىپ ءجۇر. كەيىن بىلسەم, 10 شاقتى ەڭبەك ارداگەرلەرى مەن از قامتىلعان جاندارعا دا الدىرتادى ەكەن. جومارت سىقىلدى جومارت قولدى ازاماتتار ارقاسىندا كەلەسى جىلى دا وقىرماندار قاتارىنا قوسىلىپ وتىرمىن.
مىرزاتاي بايماقانوۆ,
زەينەتكەر.
سولتۇستىك قازاقستان وبلىسى.
