الەم • 20 قاڭتار، 2021

پاندەميا سالدارىنان وزبەكستاندا قالىپ قويعان شەتەلدىك ايەلدىڭ وقيعاسى

401 رەت كورسەتىلدى

تەحاستىق ايەل kvue.com ۆيرتۋالدى ارناسىنا عالامدىق پاندەميا كەزىندە 6 اي بويى وزبەكستاندا قالاي قالىپ قويعانى تۋرالى سۇحبات بەردى، دەپ حابارلايدى Egemen.kz.

ول باستاپقىدا وزبەكستانعا ورىس جانە وزبەك تىلدەرىن ۇيرەنۋ ءۇشىن 45 كۇندىك ساپارمەن كەلگەن. COVID-19 پاندەمياسىنىڭ سالدارىنان مەملەكەتتەر شەكارالارىن جاپقان كەزدە، ول تاعى 5 اي تۇراقتاپ قالعان.

تەحاس شتاتىنان كەلگەن دجەننيفەر ۋيددون ءوز وقيعاسىن ەشتەڭەمەن سالىستىرۋعا كەلمەيتىن ۇلكەن تاجىريبە سانايدى. 

«كەيبىر ادامدار سىرتقا شىققاندى نەمەسە كوڭىلدى بولعاندى ​​ۇناتادى. ال مەن ساياحاتتاعاندى ​​جاقسى كورەمىن. ءاردايىم وزگە ەلدىڭ مادەنيەتىن ءتۇسىنۋدى، باسقا نارسەنى باعالاۋدى قالايمىن»، - دەيدى ۋيددون. 

ءدال وسى وي ونى 2020 جىلدىڭ باسىندا وزبەكستانعا جەتەلەپ اكەلدى. ول ورىس جانە وزبەك تىلدەرىن ۇيرەنۋ ءۇشىن ساياحاتقا شىعۋعا بەل بۋعان ەكەن. 

«مەن وزبەكستاندا 45 كۇن بولۋدى جوسپارلادىم. سودان كەيىن جەكسەنبىدە ماعان شەكارا جابىلادى دەگەن حابارلاما كەلدى»، - دەدى ول. 

ەلشىلىك وعان اقش-قا ورالعىسى كەلسە، سەگىز ساعاتتا استاناعا جەتۋ كەرەكتىگىن ەسكەرتەدى. 

«مەن ويانعاندا اسكەريلەر ءبىزدىڭ اۋدانداردى قورشاپ جاتتى. سونىمەن قاتار ءبىر قالادان ەكىنشى قالاعا اۋىسا المايتىنداي شەكتەۋ قويىلدى. ول كەزدە مەن استانادان بەس ساعاتتىق ۋاقىت الاتىن قاشىقتىقتا ەدىم»، - دەپ ءتۇسىندىردى ول. 

سول سەبەپتەن دجەننيفەر ۋيددون ءوز ساپارىنىڭ بۇدان دا ۇزاققا سوزىلاتىنىن جوسپارلاي باستاعان. 

«مەن اينالامداعى ادامدارمەن سويلەسۋگە قينالدىم. بىراق ولار مەنى جۇمىسقا تارتۋ ارقىلى 30 كۇندىك جوسپار قۇرۋعا كومەكتەستى. مەن ول جەردە جۇمىس ىستەمەدىم، بىراق ەرىكتى تۇردە رەپەتيتورلىقپەن اينالىستىم»، - دەيدى ايەل. 

وسىلايشا، ءبىر جارىم ايعا سوزىلۋى كەرەك بولعان ساپار التى ايعا ۇلاسادى. ەشقاشان وسىنشا ۋاقىت بولامىن دەپ ويلاماعان ەل ونىڭ ۇيىنە اينالدى. ونىڭ سوزىنە قاراعاندا، بەيتانىس ادامدار جاقىنىنداي كورىنىپ، دوس بولىپ ۇلگەرگەنگە ۇقسايدى. 

ول بۇرىندارى كەزدەستىرمەگەن ادامدارمەن بايلانىس ورناتىپ، ولاردىڭ مادەنيەتىن زەرتتەۋگە جانە ءوز ەلىنىڭ ەرەكشەلىكتەرىمەن بولىسۋگە كوپ ۋاقىتىن ارناعان. 

ايتا كەتەيىك، ول اقش-تا تۇرىپ قالعان وزبەكستان ازاماتتارىن الىپ كەتۋ ءۇشىن ۇشىپ بارعان رەيسپەن وتانىنا ورالعان. 

ول كەتەرىنەن بۇرىن ءۇش كۇن بويى تانىستارىمەن قوشتاسىپ شىققان. قازىر ونىڭ قولىندا بار بولعانى ەشتەڭەمەن ايىرباستاۋعا كەلمەيتىن ەستەلىك فوتوسۋرەتتەر عانا قالدى. 

«قۇداي-اۋ، بۇل مەنىڭ ومىرىمدەگى ەڭ جامان جىل بولدى. مەن وزبەكستاندا ۇزاق ۋاقىت قالىپ قويدىم» دەپ كىجىنسەم بولار ما ەدى؟! بىراق مەن، ارينە، ولاي جاسامايمىن، ويتكەنى سول ساپارداعى ەرەكشە ساتتەردى عانا ويلاۋعا، جاقسى جاعىنان قاراۋعا تىرىسامىن»، - دەيدى دجەننيفەر ۋيددون.

سوڭعى جاڭالىقتار

ۇقساس جاڭالىقتار