«Olimpbet-فۋتبولدان قازاقستان چەمپيوناتىن كەڭەيتۋ قادامى جارىسقا قاتىسۋشىلاردىڭ كەلىسىمىمەن جاسالىپ وتىر. بۇعان دەيىن بۇل ماسەلە اتقارۋشى كوميتەتتىڭ وتىرىستارىندا بىرنەشە رەت تالقىلانعان بولاتىن. سودان كەيىن جوبا قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆتىڭ تاپسىرماسىمەن قازاقستان كاسىپقوي فۋتبول ليگاسىنىڭ جالپى جيىنىندا تالقىعا ءتۇستى. ەكى كەزدەسۋدە دە باستاما قولداۋعا يە بولدى»، دەلىنگەن قازاقستان فۋتبول فەدەراتسياسىنىڭ رەسمي حابارلاماسىندا.

پرەمەر-ليگانىڭ وتكەن جىلعى قورىتىندىسى بويىنشا چەمپيوناتتىڭ العاشقى ءۇش تۋرىن ويناپ، قارجىلىق قيىندىققا بايلانىستى پاۆلودار وبلىسىنىڭ عانا ەمەس، بۇكىل قازاقستاننىڭ ماڭدايالدى كوماندالارىنىڭ بىرىنە اينالعان ەلىمىزدىڭ 5 دۇركىن چەمپيونى «ەرتىس» مەرزىمىنەن بۇرىن جارىستان شىعىپ قالدى. سونداي-اق 2020 جىلعى بىرىنشىلىكتىڭ تۋرنير كەستەسىندە 11-ورىنعا تۇراقتاعان كوكشەتاۋدىڭ «وقجەتپەس» كومانداسى بيىل ءوز باعىن ءبىرىنشى ليگادان ىزدەيدى. ال قازاقستان چەمپيوناتىنىڭ ەرەجەسى بويىنشا ءبىرىنشى ليگادا جاقسى ناتيجە كورسەتكەن ەكى كوماندا پرەمەر-ليگاعا جولداما الدى. اتاپ ايتار بولساق، ولار بىرنەشە دۇركىن ەل چەمپيونى – «اقتوبە» مەن بىلتىرعى قازاقستان كۋبوگىنىڭ يەگەرى – «اتىراۋ» كلۋبتارى. ءبىر ايتا كەتەرلىگى، ءبىرىنشى ليگا باسەكەلەرى پاندەمياعا بايلانىستى ءبىر ايماقتا جانە ەكى كونفەرەنتسياعا ءبولىنىپ ءوتتى. ناتيجەسىندە، كونفەرەنتسيادا وزا شاپقان جوعارىداعى ەكى كلۋب «ەرتىس» پەن «وقجەتپەستىڭ» ورىندارىندا جوعارى ليگادا دوپ تەبۋگە مۇمكىندىك الدى. بۇعان قوسا، چەمپيوناتتاعى كۆوتا سانى تاعى ەكەۋگە ارتقان سوڭ، ول ورىندار ءبىرىنشى ليگادا ءوز كونفەرەنتسيالارىندا ەكىنشى ورىن العان «اقجايىق» (ورال) پەن «ارىس» (تۇركىستان وبلىسى) كوماندالارىنا بۇيىردى.

وتكەنگە كوز جۇگىرتسەك، 2012 جىلى فۋتبولدان وتكەن قازاقستان چەمپيوناتىندا 14 كوماندا باق سىناعان ەكەن. سول جىلى قاراعاندىنىڭ «شاحتەرى» قاتارىنان ەكىنشى جىل چەمپيون اتانعان. ال الماتىنىڭ «قايراتى» (11-ورىن) مەن وسكەمەننىڭ «ۆوستوگى» (12-ورىن) سوڭعى ورىنداردا قالىپ قويعاننان كەيىن كەلەسى جىلى ءبىرىنشى ليگادا دوپ تەبۋى كەرەك ەدى. الايدا ءدال بيىلعىداي قفف اتقارۋشى كوميتەتىنىڭ كەزەكتى وتىرىسىندا كوماندالار سانىن 14-كە دەيىن كوتەرۋ ماسەلەسى قارالىپ، اقىر سوڭىندا وڭ ناتيجەسىن تاپقان-دى. سونىڭ ارقاسىندا «قايرات» جوعارى ليگاداعى ورنىن ساقتاپ قالدى. سونىمەن قاتار ءبىرىنشى ليگادا العاشقى ەكى ورىندى يەلەنگەن «سۇڭقار» (الماتى) مەن «وقجەتپەس» (كوكشەتاۋ) تىكەلەي پرەمەر-ليگاعا شىقسا، كوماندالار سانىنىڭ ارتۋىنا بايلانىستى ءبىرىنشى ليگادا ءتورتىنشى ورىنعا تۇراقتاعان ورالدىڭ «اقجايىق» كلۋبى دا ەل چەمپيوناتىنىڭ جوعارى توبىندا ونەر كورسەتۋگە مۇمكىندىك الدى. دەگەنمەن 2013 جىلى قفف شەشىمى بويىنشا قىزىلوردانىڭ «قايسارى» جوعارى ليگادان الاستاتىلىپ، ءبىرىنشى ليگادا توپ جارعان «ىلە-ساۋلەت» قارجىلىق قيىندىعىنا بايلانىستى ەليتالى ديۆيزيوننان باس تارتقان سوڭ، قپل-دا ونەر كورسەتەتىن كوماندالار سانى تاعى 12-گە دەيىن قىسقارعان ەدى.

2012 جىلى «قايراتتىڭ» تومەنگى ليگاعا ءتۇسىپ قالا جازداۋىنىڭ ارقاسىندا پرەمەر-ليگا كوماندالارىنىڭ سانى 14-كە دەيىن وسسە، مىنە، اراعا 9 جىل سالىپ «قايرات» چەمپيون اتانعاندا تاعى دا فۋتبولدان ەل چەمپيوناتىندا 14 كوماندا باق سىنايتىن بولدى.

ماماندار تۋرنيرگە قاتىسۋشىلاردىڭ سانىن ارتتىرۋ ويىن كۇنتىزبەسىن وڭاي جوسپارلاۋعا مۇمكىندىك بەرەدى دەپ سانايدى. بۇل ەڭ الدىمەن قازىرگىدەي قيىن كەزەڭدە ماڭىزدى بولىپ وتىر. سونىمەن قاتار جارىس ۋاقىتشا توقتاتىلعان جاعدايدا دا ماۋسىمدى ۋاقىتىندا اياقتاۋعا مۇمكىندىك بار. ال Olimpbet-فۋتبولدان قازاقستان چەمپيوناتىندا ونەر كورسەتەتىن كوماندالار قاتارىن تولىقتىرۋ تۋرالى شەشىم سپورت قاعيداسىنىڭ تالاپتارىنا ساي جانە فۋتبول كلۋبتارىنىڭ سەرتيفيكاتتاۋ ەرەجەلەرىن ورىنداۋ جاعدايىنا بايلانىستى قابىلدانادى. ەرەجەدە بەكىتىلگەن وزگەرىستەر بويىنشا جارىستى قابىلدايتىن ستاديون ويىنعا دايىن بولماسا، ايىپتى كوماندا ماتچ­تى قارسىلاسىنىڭ الاڭىنا اۋىستىرۋعا ءماجبۇر بولادى. سونىمەن قاتار وزگە ويىنداردا جيناعان ءۇش ۇپايىنان ايىرىلادى.

قفف رەسمي حابار تاراتقاننان كەيىن فۋتبول جانكۇيەرلەرى ىشكى چەمپيوناتتا كوماندا سانىن كوبەيتۋ ماسەلەسى نەگە بيىل عانا قولعا الىنعانىن تۇسىنبەي دال بولۋدا. ويتكەنى ءدال قازىر ەل چەمپيوناتىندا كلۋب سانىن كوبەيتۋگە ەش قاجەتتىلىك تۋىنداپ وتىرعان جوق. ونىڭ ۇستىنە، جاڭادان قوسىلعان كوماندالار ۇزدىكتەرگە پالەندەي قارسىلىق كورسەتىپ، چەمپيوناتتىڭ كورىگىن قىزدىرادى دەپ تە ايتا المايمىز. سونىمەن قاتار قازاقستان پرەزيدەنتى قاسىم-جومارت توقاەۆ بىلتىرعى جولداۋىندا كاسىپقوي كلۋبتاردى كۆازيمەملەكەتتىك سەكتورلاردىڭ ەسەبىنەن قارجىلاندىرۋدى توقتاتۋ كەرەكتىگىن تاپسىرعان بولاتىن.

ەگەر قفف باس حاتشىسى ازامات ايتقوجين ايتىپ وتىرعانداي، چەمپيوناتتا 14 كوماندانىڭ بولۋى راسىندا دا ويىن كۇنتىزبەسىن جوسپارلاۋدا ءتيىمدى بولسا، وندا قفف وكىلدەرى وسى ۋاقىتقا دەيىن كوماندا سانىن 14-كە دەيىن نەگە كوبەيتپەگەن؟! نەگىزى بۇل جەردە ماسەلە باسقادا سياقتى. ياعني «جوعارىدان» جاڭادان قۇرىلعان تۇركىستان وبلىسىنىڭ كومانداسى بيىل ەل چەمپيوناتىنا قاتىسسىن دەگەن پارمەن كەلگەن بولۋى بەك مۇمكىن. ويتكەنى بىلتىر جازدا 7 مىڭ ادامعا ارناپ سالىنعان «تۇركىستان ارەنا» ستاديونىنىڭ قۇرىلىسى اياقتالىپ، پايدالانۋعا بەرىلگەن بولاتىن.

وسىلايشا، بيىلدان باستاپ فۋتبولدان ەل چەمپيوناتىنا قاتىساتىن كوماندالار سانى دا، گەوگرافيالىق ايماقتارى دا كەڭەيەدى. ال قۇرىلعانىنا 19 جىل بولعان «ارىس» (كوماندا اتاۋى وزگەرۋى مۇمكىن – ءا.ب.) كلۋبى پرەمەر-ليگادا دەبيۋت جاساماق.