قازاقستان • 17 قاڭتار، 2021

ديماش قۇدايبەرگەننىڭ العاشقى ونلاين-كونتسەرتى ءوتتى

24 رەت كورسەتىلدى

«DIMASH DIGITAL SHOW» الەمدىك پاندەميا باستالعاننان بەرگى ءانشىنىڭ العاشقى جاھاندىق قويىلىمى بولدى، دەپ حابارلايدى dimashnews.

كونتسەرتتىڭ ونلاين-چاتى ءبىر سەكۋندقا دا تىنىشتالمادى، بارلىق جانكۇيەرلەر سۇيىكتى ارتىستەرىنىڭ ونەرىن قايتا كورگەندەرىنە وتە قۋاندى. Dears-ءتىڭ ايتۋىنشا، ولاردىڭ بارلىعى ديماشتىڭ جەكە كونتسەرتىن قاتتى ساعىنعان.

شوۋ بارىسىندا قازاقستاندىق ورىنداۋشى 6 تىلدە: قازاق، يتاليان، فرانتسۋز، قىتاي، اعىلشىن جانە ورىس تىلدەرىندە ءان ايتتى. سونداي-اق ول بۇرىن سوڭدى بولماعان جاڭا مازمۇندى ۇسىندى: اندەر، ولاردىڭ اراسىندا ءانشىنىڭ ءوزى جازعان كومپوزيتسيالار بار. ونلاين-فورمات الەمنىڭ تۇكپىر-تۇكپىرىندەگى Dears-كە ديماشتىڭ كونتسەرتىن ۇيدەن شىقپاي-اق، ءۇي جاعدايىندا تاماشالاۋعا مۇمكىندىك بەردى.

سونداي-اق كونتسەرتتى «كورۋ» گەوگرافياسى دا ايتارلىقتاي كەڭەيدى: Dears «DIMASH DIGITAL SHOW» كونتسەرتىن الەمنىڭ 100-دەن استام ەلىنەن كوردى. Tixr امەريكالىق ستريمينگتىك پلاتفورماسى وكىلدەرىنىڭ ايتۋىنشا، العاش رەت شەتەلدىك ورىنداۋشىنىڭ كونتسەرتىنە بيلەتتەر ساتۋ وسىنداي جوعارى كورسەتكىشتەرگە قول جەتكىزگەن.

ديماش كوپتەگەن جانكۇيەرىنە جاڭا فورماتقا قاراماستان، ونىڭ العاشقى ونلاين-كونتسەرتىن قولداعانى ۇشىن العىس ءبىلدىردى.

«مەنىڭ العاشقى ونلاين-كونتسەرتىمە قاتىسىپ، قولداۋ كورسەتكەندەردىڭ بارلىعىنا ۇلكەن راحمەت! پاندەميا ءبىزدى ۇزاق ۋاقىت بويى جۇزدەستىرمەگەنى وتە وكىنىشتى، سوندىقتان مەن بۇگىن سىزدەردىڭ الدارىڭىزدا ونەر كورسەتكەنىمە قۋانىشتىمىن. مەن سىزدەردى كورمەسەمدە، مەنىڭ جانىم سىزدەردىڭ بارلىق قولداۋلارىڭىز بەن كۇش-جىگەرلەرىڭىزدى سەزىندى، سىزدەر ارقاشان مەنى شابىتتاندىراسىزدار جانە جاڭا جەتىستىكتەرگە كۇش بەرەسىز! بۇگىنگى شوۋدى تولىق تاماشالادىڭىزدار دەگەن سەنىمدەمىن. ءبىز سىزدەرمەن وتە جاقىن ارادا كەزدەسەمىز دەپ ۇمىتتەنەمىن!».

ەستەرىڭىزگە سالا كەتەيىك، ديماشتىڭ ونلاين-كونتسەرتىن 16 قاڭتار مەن 23 قاڭتار ارالىعىندا شەكتەۋسىز كورە الاسىزدار. كونتسەرتتىڭ دايىندىق جۇمىستارىنا بايلانىستى ۋاقىتشا توقتاتىلعان بيلەتتەر ساتىلىمى شوۋ اياقتالعاننان كەيىن قايتا باستالادى.

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار