ءتۇپ تەگى بريتاندىق بولىپ تابىلاتىن يتاليا ءانشىسى, سازگەر ءارى ساياحاتشى سون پاسكالدىڭ قازاقستاندا جۇرگەنىنە ەكى جىلعا جۋىقتاپ قالىپتى. الايدا, قازىر ەلىمىزدە بۇل جىگىتتى بىلمەيتىن جاستار از.
ءتۇپ تەگى بريتاندىق بولىپ تابىلاتىن يتاليا ءانشىسى, سازگەر ءارى ساياحاتشى سون پاسكالدىڭ قازاقستاندا جۇرگەنىنە ەكى جىلعا جۋىقتاپ قالىپتى. الايدا, قازىر ەلىمىزدە بۇل جىگىتتى بىلمەيتىن جاستار از.
جات ەلدە ءجۇرىپ جالىققان سوڭ ءوز ەلىنە قايتاتىن شىعار دەگەن قوناعىمىز, ءبىزدىڭ ەلىمىزگە باۋىر باسىپ قانا قويماي, باقىتىن دا قازاقستاننان تاپقان سياقتى. جاڭا شىعارمالارىندا قازاق ءتىلىن قولدانىپ, قازاق حالقىنىڭ اندەرىن شىرقايتىن جىگىت وزىندە ەشقانداي بوتەن ويى جوق, ۇلتتىق ماسەلەلەرگە باس قاتىرمايتىندىعىن, كوزدەگەنى دە, ىزدەگەنى دە تەك قانا تازا مۋزىكا ەكەنىن ايتىپ-اق كەلەدى.
وتكەن جىلى سون پاسكال ءوزىمىزدىڭ تانىمال اكتەرلەردىڭ ءبىرى ءانۋار نۇرپەيىسوۆپەن بىرىگىپ سالعان «Englishman in Shimkent», «چايكا ايگۋل» يۋمورلىق كليپتەرى ارقىلى تانىمال بولىپ شىعا كەلگەن-ءدى. باستاپقىداعى الەمدىك چارتتاردا بۇل كليپتەر ەڭ كوپ قارالعان اندەردىڭ قاتارىندا بولعان. سوننىڭ «ابايدىڭ «كوزىمنىڭ قاراسىن» دا ازداپ ءوز ماقامىنا سالىپ شىرقاعان رومانتيكالىق كليپى كوڭىلدەن شىقتى. قىسقاسى, عالامتور ارقىلى مۋزىكا تىڭداعاندى جاقسى كورەتىن جاستار اراسىندا بۇل اندەر رەيتينگىسىن جوعالتقان جوق. قازىر ونىڭ «جانىم سول» سينگلى چارتتاردا كوش باستاپ تۇر.
قازاق تىلىندە ءان ايتىپ, قازاقتىڭ اتىن التى قىردان اسىرىپ جۇرگەن يتاليالىق ءانشى سون پاسكال ەندى ءوزىنىڭ تىڭدارماندارىن كەزەكتى جاڭالىعىمەن قۋانتىپ قانا قويماي, بۇل جولى ءتىپتى تاڭعالدىرماق نيەتتە. ول «ماحاببات» اتتى جاڭا انىنە ەلىمىزدىڭ باس قالاسى – استانادا رەاليتي-شوۋ جانرىندا جاڭا بەينەكليپ تۇسىرگەن.
«جىگىتكە جەتى ونەر دە از», دەمەكشى سون پاسكال ءوزى ءانشى, ءوزى سازگەر, ءتىپتى وپەراتور جانە رەجيسسەر بولىپ باعىن سىناپ كوردى. بەينەكليپتى ءتۇسىرۋ ءۇشىن ءانشى قولىنا كامەرا الىپ, جاڭا تۋىندىسى – «ماحاببات» ءانىن ايتا ءجۇرىپ, ءبىر كۇندە استانا قالاسىن ارالاپ شىقتى. باستى كوشەلەردەن باستاۋ الىپ, ەسىلدىڭ بويىن جاعالاعان اۆتور قالالىق №4 مەكتەپ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, اۋەجاي, «حان شاتىر», «كەرۋەن» ويىن-ساۋىق ورتالىقتارى, ءتىپتى سپورتتىق جاتتىعۋ ورىندارىنا دەيىن بارىپ, حالىقتىڭ كوڭىلىن كوتەردى, استانالىقتاردى ارمانسىز بيلەتتى. وسىنىڭ ءبارى بەينەكليپتە قاز-قالپىندا قامتىلعان.
«ماحاببات» ءانىنىڭ ءسوزىن جاس اقىندار جازسا, سازىن ءانشىنىڭ ءوزى شىعارعان. عاشىقتىق سەزىم, سۇيىسپەنشىلىك – بەينەكليپتىڭ نەگىزگى تاقىرىبى. ال باستى ەرەكشەلىگى – مۇندا ەش جاساندىلىق جوق. بۇل جەردە ونەر دەسە ىشكەن اسىن جەرگە قوياتىن حالىقتىڭ شىنايى ىقىلاسى عانا بار. وسىنداي قاراپايىمدىلىعىمەن, تالانتىمەن يتالياندىق ءانشى حالىققا تاعى دا جاقىنداي ءتۇستى.
«ايدالادان كەلىپ», ءبىزدىڭ انا ءتىلىمىزدى قولداۋعا ىنتا-شىنتاسىمەن كىرىسىپ كەتكەن سون پاسكال دەيتىن كىم ءوزى دەيتىن بولساق, ول ءوز ەلىندە جاپ-جاقسى تانىمال انشىلەردىڭ ءبىرى. ايگىلى «aTunes-2011» مۋزىكالىق جوباسىنىڭ ءفيناليسى.
سونىمەن, وتكەن جىلى عالامتوردى كەزىپ كەتكەن «You should speak قازاقشا» كليپىن تۇسىرۋگە ءوزىمىزدىڭ جەرگىلىكتى مۋزىكانتتار سەپتەسىپ, قازاق پروديۋسەرى جومارت سۇلەيمەنوۆ كومەكتەسكەن-ءدى.
سون پاسكالدىڭ قازاقستانعا تاپ بولۋى دا قىزىق. كونتسەرتتەردىڭ بىرىندە ونى دينا ەسىمدى قازاق قىزى قازاق جەرىنە قوناققا شاقىرعان ەكەن. ءانشى جىگىتتى اۋەسقويلىق جەڭىپ, بۇرىن كورمەگەن ەلگە قىدىرىپ كەلۋگە بەل بايلايدى. الايدا, از عانا كۇنگە قىدىرىستاپ كەلگەن ەلدە ول ۇزاق ۋاقىتقا قالىپ قويامىن دەپ ءتىپتى دە ويلاماعان. شەتەلدىك ءانشى ءبىر كورگەننەن ۇناتقان ەلىندە ءوزىنىڭ كومپوزيتورلىق قابىلەتىن مۇلدە جاڭا قىرىنان سىناپ كورۋگە بولاتىندىعىن تۇيسىنسە كەرەك. شوۋ-بيزنەستىڭ تاپتاۋرىن جولىنان تايقىپ شىعا كەلگەن يتاليالىق ءوزىن مۇندا ۇدايى تۋريست رەتىندە سەزىنبەۋ ءۇشىن بىردەن ءتىل ۇيرەنۋگە دەن قويادى. قازاق ءتىلىن ناسيحاتتاۋعا دەگەن يدەيا دا وسىدان باستاۋ العانى بەلگىلى. اينالاسىنا جۇعىمدى, اقجارقىن, رومانتيكانى جاقسى كورەتىن جىگىتتى ءبىزدىڭ مۋزىكانتتار دا بوتەن كورمەي, قاتارىنا قوسىپ العان. قازىر وسىنداعى دوستارىمەن الماتىداعى مۋزىكالىق كەشتەردەن قالمايتىن ءانشىنىڭ الىمساقتان كەلە جاتقان قوناقجايلىققا قوياتىن ءمىنى جوق. جاڭا ومىرىنە ءدان ريزا.
ايناش ەسالي,
«ەگەمەن قازاقستان».
الماتى.
