ءتورت جىلدا قۇقىق قورعاۋ ورگاندارىنىڭ 32 قىزمەتكەرى پارا العان كەزدە ۇستالعان. وتكەن جىلى ءىىم قاراستى باتىس وڭىرلىك اسكەري-تەرگەۋ باسقارماسىنىڭ اقتوبە وبلىسى بويىنشا باسقارما باسشىسىنىڭ 49 ملن تەڭگە پارا الىپ جاتقان جەرىندە قولعا ءتۇسۋى ۇلكەن رەزونانس تۋدىرعان ەدى. ءدال وسىنداي قىلمىسقا باردى دەگەن كۇدىكپەن ۇستالعان وسى باسقارمانىڭ تەرگەۋشىسى 2,3 ملن تەڭگە ايىپپۇل تولەپ, اباقتىدا وتىرۋدان قۇتىلدى. سىبايلاس جەمقورلىققا بارعانى ءۇشىن ءىستى بولعانداردىڭ قاتارىندا 18 مەملەكەتتىك ورگاننىڭ, 7 كۆازيمەملەكەتتىك سەكتوردىڭ باسشىسى بار. اقتوبە وبلىسى بويىنشا ىشكى مەملەكەتتىك اۋديت دەپارتامەنتى باسشىسىنىڭ ورىنباسارى پارا العانى ءۇشىن 4 جىلعا باس بوستاندىعىنان ايىرىلدى. «قتج» ۇك قاراستى اقتوبە ماگيسترالدى جەلى بولىمشەسىنىڭ شالقار جول ديستانتسياسىنىڭ باستىعى پارا الىپ جاتقان جەرىندە ۇستالىپ, سوت وعان 36 ملن تەڭگە كولەمىندە ايىپپۇل سالۋ جازاسىن تاعايىندادى.
ەلىمىزدە لاۋازىمدى تۇلعالاردى پارا الۋعا يتەرمەلەپ, دەلدالدىقپەن اينالىساتىن, زاڭسىز سىياقى بەرۋشى تۇلعالاردىڭ جاۋاپكەرشىلىگى دە كۇشەيتىلدى. وڭىرلىك كولىكتىك باقىلاۋ ينسپەكتسياسىنىڭ باس مامانى «سامارا-شىمكەنت» تاسجولىنىڭ بويىندا رۇقسات ەتىلگەن سالماقتان اسىپ كەتكەنى ءۇشىن جۇك كولىگىنىڭ جۇرگىزۋشىسىنە ايىپپۇل تولتىرعاندا, جۇرگىزۋشى ينسپەكتورعا 20 مىڭ تەڭگە پارا ۇسىنعان. ارتىق قاربىز تيەگەنى ءۇشىن 20 مىڭ تەڭگەمەن قۇتىلماق بولعان ترانزيتتىك كولىك جۇرگىزۋشىسى اقىرى مەملەكەتكە 200 مىڭ تەڭگە ايىپپۇل تولەدى. كارانتيندىك تالاپتاردى بۇزعانى ءۇشىن اكىمشىلىك جاۋاپكەرشىلىكتەن قاشىپ, ايىپپۇل تولەگىسى كەلمەگەن جەرگىلىكتى تۇرعىن پوليتسيا قىزمەتكەرىنىڭ بانكتىك كارتوچكاسىنا 10 مىڭ تەڭگە اۋدارىپ جىبەرگەن كەزدە, پارا ۇسىنعانى ءۇشىن اكىمشىلىك جاۋاپكەرشىلىككە تارتىلىپ, سوتتىڭ شەشىمىمەن 100 مىڭ تەڭگە ايىپپۇل تولەدى.
2020 جىلدىڭ جەلتوقسان ايىنىڭ سوڭىندا مەملەكەت باسشىسى سىبايلاس جەمقورلىققا قارسى ءىس-قيمىل سالاسىنداعى بىرقاتار زاڭنامالىق وزگەرىسكە قول قويدى. زاڭداعى سوڭعى وزگەرىستەر بويىنشا پاراقورلىققا قاتىستى زاڭ تالاپتارى كۇشەيىپ, پارا الۋشىلار مەن پارا بەرۋشىلەرگە جازا مەرزىمى ۇزارتىلدى. ەگەر بۇرىن قىلمىستىق كودەكستىڭ 367-بابىنىڭ 2-بولىگىندە «ايتارلىقتاي مولشەردە پارا بەرۋ» قىلمىسى ءۇشىن ەڭ جوعارعى جازا – 5 جىلعا دەيىن باس بوستاندىعىنان ايىرۋ قاراستىرىلىپ, بۇل ورتاشا اۋىر قىلمىس ساناتىنا جاتقىزىلعان بولاتىن. بيىلدان باستاپ وسى باپ بويىنشا ايىپتالعاندار اۋىر قىلمىس جاساعان ساناتقا ەنگىزىلىپ, سوت ولارعا 7 جىلعا دەيىن باس بوستاندىعىنان ايىرۋ جازاسىن تاعايىندايتىن بولدى. سونداي-اق بيىلدان باستاپ پارا العانى نەمەسە بەرگەنى ءۇشىن سوتتالعاندار شارتتى تۇردە مەرزىمىنەن بۇرىن بوساپ شىعا المايدى ءارى ولار جازا مەرزىمىن قاۋىپسىزدىگى تومەن قونىس-كولونيادا وتەي المايدى. پارا بەرگەنى جانە پاراقورلىققا دەلدال بولعاندارعا ايىپپۇل مولشەرى دە بىرنەشە ەسە ءوستى. بيىلعى جىلدان باستاپ پارا بەرگەنى ءۇشىن سوتتالعاندار ايىپپۇلدىڭ 20 ەسەلەنگەن سوماسىن تولەيدى. ەگەر 100 مىڭ تەڭگە پارا ۇسىنعانى ءۇشىن سوتتالعان ازامات مەملەكەتكە 2 ملن تەڭگە ايىپپۇل تولەيدى. بۇعان دەيىن ەڭ تومەنگى ايىپپۇل كولەمى 1 ملن تەڭگەنى قۇراعان ەدى. كاسىپكەرلەردىڭ جۇمىسىنا كەدەرگى كەلتىرگەن قۇقىق قورعاۋ ورگاندارىنىڭ قىزمەتكەرلەرىنە دە جاۋاپكەرشىلىك قاتاڭدادى. قىلمىستارى دالەلدەنسە, قۇقىق قورعاۋ ورگاندارىنىڭ قىزمەتكەرلەرى 5 جىلعا دەيىن باس بوستاندىعىنان ايىرىلادى. وسى باپ بويىنشا بۇرىنعى زاڭنامادا 2 جىلعا دەيىن عانا باس بوستاندىعىنان ايىرۋ جازاسى بەكىتىلگەن بولاتىن. ال كاسىپكەرلەردىڭ جولىنا كەسە كولدەنەڭ تۇرعان قۇقىق قورعاۋ ورگاندارى باسشىلارى نەمەسە سۋديالار 8 جىلعا دەيىن باس بوستاندىعىنان ايىرىلادى.
قىلمىستىق كودەكستە سىبايلاس جەمقورلىققا قارسى زاڭ تالاپتارى كۇشەيتىلگەنىمەن, قوعامنىڭ دامۋىن ارتقا تارتاتىن جەمقورلىق اتتى جاعىمسىز قۇبىلىستى توقتاتۋعا مۇمكىن بولا ما, جوق پا, مۇنى الداعى ۋاقىت كورسەتەدى.
اقتوبە
