الماتىداعى «دوستىق ۇيىندە» ءدىن ىستەرى اگەنتتىگى, «قازاقستاننىڭ ازاماتتىق اليانسى» زاڭدى تۇلعالار بىرلەستىگى جانە «استانا-زەرتتەۋ» قوعامدىق قورى بىرلەسىپ, «ءدىن جانە ازاماتتىق قوعام» اتتى عىلىمي-تاجىريبەلىك كونفەرەنتسيا وتكىزدى.
الماتىداعى «دوستىق ۇيىندە» ءدىن ىستەرى اگەنتتىگى, «قازاقستاننىڭ ازاماتتىق اليانسى» زاڭدى تۇلعالار بىرلەستىگى جانە «استانا-زەرتتەۋ» قوعامدىق قورى بىرلەسىپ, «ءدىن جانە ازاماتتىق قوعام» اتتى عىلىمي-تاجىريبەلىك كونفەرەنتسيا وتكىزدى.
كونفەرەنتسيانىڭ ماقساتى ءدىن جانە ازاماتتىق قوعام اراقاتىناسىنداعى ەڭ وزەكتى دە تاجىريبەلىك ماڭىزى بار ماسەلەلەردى ورتاعا سالۋ, سونداي-اق, ءدىن سالاسىنداعى مەملەكەتتىك ساياساتتى جۇزەگە اسىرۋ بارىسىندا قوعام ازاماتتارىن ءدىني اعارتۋعا كەڭىنەن تارتۋ بولىپ تابىلادى.
ءدىن ىستەرى اگەنتتىگى توراعاسىنىڭ ورىنباسارى عالىم شويكين كونفەرەنتسيانى «ازاماتتىق قوعام ينستيتۋتتارىنىڭ ءدىن سالاسىنداعى مەملەكەتتىك ساياساتتى ىسكە اسىرۋعا قاتىسۋىنىڭ ۇتىمدى باعىتتارى» دەگەن كىرىسپە باياندامامەن اشىپ, پلەنارلىق وتىرىستى جۇرگىزىپ وتىردى. قالا اكىمىنىڭ ورىنباسارى زاۋرەش امانجولوۆا قاتىسۋشىلارعا ىزگى تىلەگىن ارناپ, وسىنداي شارانىڭ مادەني استانامىز الماتىدا وتكىزىلىپ وتىرعانىنا ريزاشىلىق تانىتتى.
القالى جيىننىڭ رەسمي بولىمىندە مەملەكەتتىك-كونفەسسياارالىق قاتىناستار اياسىنداعى زايىرلىلىق ماسەلەسىنە, قازاقستانداعى كونفەسسياارالىق قاتىناستار ەرەكشەلىگى مەن دىنشىلدىك جانە ءدىني ساۋاتسىزدىق ماسەلەلەرىنە, يسلام ءىلىمى تۇرعىسىنداعى قۇقىقتىق مەملەكەت پەن ازاماتتىق قوعام يدەيالارى سەكىلدى بىرقاتار وزەكتى تاقىرىپتاردا باياندامالار جاسالدى.
ودان ءارى كونفەرەنتسيا جۇمىسى سەكتسيالىق وتىرىستارمەن جالعاسىپ, «ءدىن ازاماتتىق قوعام نازارىندا: ساراپتامالىق كوزقاراس», «ءدىن سالاسىندا اقپاراتتىق-ناسيحاتتىق جۇمىستاردى ۇيىمداستىرۋداعى ۇكىمەتتىك ەمەس ۇيىمداردىڭ الەۋەتىن قولدانۋ», «ۇكىمەتتىك ەمەس ۇيىمداردىڭ دەسترۋكتيۆتى اعىمدار مەن ۇيىمداردان زارداپ شەككەن تۇلعالاردى وڭالتۋداعى ءرولى» دەگەن تاقىرىپتاردا پىكىر الماسۋ مەن عىلىمي تۇجىرىمداردى تالداۋ قورىتىندىسى ءتۇزىلدى.
عىلىمي-تاجىريبەلىك كونفەرەنتسيا بارىسىندا جينالعان بارلىق ماتەريالدار مەن ساۋاتتى پىكىرلەر ارنايى جيناق بولىپ تاسقا باسىلىپ, ەلىمىزدىڭ كىتاپحانالارىنا تۇسەتىندىگى جيىن سوڭىندا كەلىسىلدى.
قانات ەسكەندىر,
«ەگەمەن قازاقستان».
الماتى.
