تۇركيا پروكۋراتۋراسى جازداعى نارازىلىق اكتسيالارىنا قاتىسقان 225 ەرەۋىلشىگە سوت جۇزىندە ايىپ تاقتى. بۇل تۋرالى Lenta.ru حابارلادى.
ميتينگ تۋرالى زاڭدى بۇزۋدان باستاپ, ءدىني عيماراتتارعا زاقىم كەلتىرۋ مەن قىلمىسكەرلەردى جاسىرۋ ايىپتارى تۇرىكتەرمەن قاتار, شەتەلدىڭ جەتى ازاماتىنا دا تاعىلعان.
تۇركياداعى جاپپاي نارازىلىق گەزي ساياباعىنداعى اعاشتاردىڭ قىرقىلۋىنا قارسى شىققان ەكولوگتاردىڭ شاعىن اكتسياسىنان باستالعان بولاتىن. كەيىننەن ەرەۋىلشىلەردىڭ قاتارى كوبەيىپ, ولاردىڭ تالاپتارى دا ساياسي باعىت الا باستادى.
ەرەۋىلشىلەردى تاراتۋ ءۇشىن پوليتسيا سۋ اتقىش, كوز جاساۋراتاتىن گاز جانە تاعى باسقا ارنايى قۇرالداردى قولداندى. ناتيجەسىندە التى ادام قازا بولىپ, سەگىز مىڭعا جۋىعى ءتۇرلى جاراقات العان. تۇركيا پرەمەر-ءمينيسترى رەدجەپ تايپ ەردوگان بىرنەشە رەت ەرەۋىلشىلەردى قىلمىسكەرلەر دەپ اتاپ, ولارعا قارسى قاتاڭ شارالار قولدانىلاتىنىن ەسكەرتكەن بولاتىن.
ايدار ورىسباەۆ.
دەرەككوز: Lenta.ru
