ماڭعىستاۋ وبلىسى اقتاۋ قالاسىنداعى دارىگەرلەرگە «سالعىرتتىقتارى كىسى ولىمىنە اكەلىپ سوقتى» دەگەن ايىپ تاعىلىپ,ىستەرى سوت وتىرىسىندا قارالعان بولاتىن. 3 دارىگەر راقىمشىلىققا ءىلىنىپ, سوت زالىنان بوساپ شىقتى. بۇل تۋرالى «استانا» تەلەارناسى حابارلادى.
وتكەن اپتاداعى اقپارىمىزدا ماڭعىستاۋ وبلىستىق اۋرۋحاناسىنىڭ دارىگەرلەرىنە بايلانىستى سوت وتىرىسى باستالعانىن جازعانبىز. وسىعان قاتىستى قىلمىستىق ءىس بىرنەشە رەت توقتاتىلسا دا, مارقۇمنىڭ اناسى وسى جولى ءادىل شەشىمنىڭ بولاتىنىنا ءۇمىتىن ۇزبەگەن ەدى..الايدا, ءىس جۇزىندە ولاي بولماي شىقتى. «ايىپكەرلەرگە قاتىستى راقىمشىلىق قولدانۋعا قۇقىمىز بار. بۇعان پروكۋرور دا قارسىلىق بىلدىرگەن جوق. دەگەنمەن, سوت پروتسەسىنىڭ اياقتالۋى دارىگەرلەردى جاۋاپكەرشىلىكتەن قۇتقارمايدى. ولار ءالى دە ايىپكەر رەتىندە قاراستىرىلادى.»,-دەيدى اقتاۋ قالالىق سوتىنىڭ سۋدياسى مارەت كوۆراەۆا.
بۇل شەشىم دارىگەرلەردىڭ ەمدەۋ مەكەمەسىندە جۇمىس ىستەۋىنە كەدەرگى كەلتىرمەيتىن كورىنەدى. جابىرلەنۋشى تاراپ تاعى شاعىم جازۋعا ازىرلەنىپ جاتىر. ويتكەنى, دارىگەرلەر كىنالى ەكەندىكتەرىن سوتتا مويىندادى.
وسىدان 3 جىل بۇرىن دانيار يماشەۆ جول اپاتىنا ءتۇسىپ, ءتۇرلى دەنە جاراقاتىمەن اۋرۋحاناعا تۇسكەن بولاتىن. سول كەزدە وعان وتا جاساعان دارىگەرلەر ونىڭ ءبىر اپتادان كەيىن ساۋىعىپ كەتەتىنىن ايتقان. ول 7 ساعاتتان كەيىن كوز جۇمعانىندا, دارىگەرلەر مۇنىڭ سەبەبىن جۇرەگى كەنەتتەن توقتاپ قالۋىمەن بايلانىستىردى. ال ساراپتاما قورىتىندىسىندا وكپەگە قان كەتۋىنەن جاعدايى ناشارلاعانى كورسەتىلگەن.
باقىتبەك كەنەش ۇلى.
دەرەككوز: «استانا» تەلەارناسى.
.
