ەكى جىل بۇرىن بولعان مىنا ءبىر وقيعا ونىڭ بۇل ويىنىڭ دۇرىستىعىن دالەلدەي تۇسكەندەي. بۇرىن ايىرىلىسقان ەرلى-زايىپتىلارعا قاتىستى ءىستىڭ (بۇرىنعى ايەلى بۇرىنعى كۇيەۋىن ولتىرۋگە تاپسىرىس بەرگەن) اشىلۋىندا جاس تەرگەۋشىنىڭ شەبەرلىگى انىق بايقالدى.
– بۇل وقيعا 2019 جىلى شىلدە ايىندا بولعان. 48 جاستاعى ايەل ايىرىلىسقان كۇيەۋىن ءولتىرۋ ءۇشىن تۇركىستان وبلىسىنىڭ تۇرعىنىنا تاپسىرىس بەرەدى. بۇل قىزمەتىنە 20 مىڭ اقش دوللارىن بەرۋگە ۋادە ەتىپتى. بىراق بۇرىن سوتتى بولعان ول ازامات ۇسىنىسقا كەلىسكەن سىڭاي تانىتقانىمەن ارتىنشا بىزگە ارىزداندى. قاندى قىلمىستى بولدىرماۋ ءۇشىن ارەكەت ەتە باستادىق, – دەيدى تەرگەۋشى.
ءبىر قاراعاندا ءبارى وڭاي سياقتى. تاپسىرىس بەرۋشى دە, اۋىر قىلمىستى «ويداعىداي ورىنداپ» شىعۋعا ءسوز بەرگەن كيللەر دە انىقتالىپ تۇر. بىراق وقيعانىڭ بارىسىن, قالاي باستالعانىن, ونداعى ءار ءساتتىڭ سەبەپ-سالدارىنا ءۇڭىلۋ كەرەك. زەرتتەي كەلە انىقتالعانى, الگى ايەلدىڭ كۇيەۋى تۇراقتى تابىسى بار كاسىپكەردىڭ ءبىرى ەكەن. كاسىبىن اعاش ونىمدەرىن وڭدەۋدەن باستاپ, كەيىن نان ءپىسىرۋ تسەحى مەن تىگىن تسەحىنىڭ قۇرىلعىسىن, «لەكسۋس-RX-300» پەن اۋىر جۇك كوتەرەتىن كولىك ساتىپ الىپ, ءىسىن كەڭەيتە ءتۇسىپتى. 2016 جىلى قالالىق سوت شەشىمىمەن ەكەۋىنىڭ نەكەسى بۇزىلىپ, 4 بالاسى مەن ايەلىنە وسى دۇنيەلەردى, ءۇيدى قالدىرىپ كەتە بەرگەن.
بىراق, وسىنشا م ۇلىكتى مىسە تۇتپاعان ايەلدىڭ بۇرىنعى كۇيەۋىن ولتىرتسە ونىڭ باسقا دا جيعانى بالالارىنا مۇرا بوپ قالاتىنى, ءوزىنىڭ دە وسى ارقىلى بايلىققا جاقىنداي تۇسەتىنى كۇندىز ويىنان, تۇندە تۇسىنەن كەتپەي قويادى. وسى ويمەن بۇرىن جازاسىن قىزىلورداداعى قونىس-كولونيادا وتەگەن, سول تۇستا كۇيەۋىنىڭ سەرىكتەستىگىندە جۇمىس ىستەگەن تۇركىستان وبلىسىنىڭ تۇرعىنىنا حابارلاسادى.
ەكەۋىنىڭ العاشقى كەزدەسۋى وبلىس ورتالىعىنداعى اۆتوۆوكزالدا بولىپتى. ايەل سول جەردە تانىسىنا پاتەر جالداۋى ءۇشىن 20 مىڭ تەڭگە ۇسىنىپ, بۇرىنعى كۇيەۋىن ءولتىرتۋ تۋرالى ۇسىنىسىن ايتادى. ال بۇرىن سوتتالعان ازامات بۇل قىلمىستىق پيعىلدى اشكەرەلەۋدى دۇرىس كورىپ, وبلىستىق پوليتسيا دەپارتامەنتىنە ارىزدانادى.
– دەرەۋ سوتقا دەيىنگى تەرگەپ-تەكسەرۋ باستالدى. قىزىلوردا قالاسىنىڭ مامانداندىرىلعان تەرگەۋ سوتى كۇدىكتىنىڭ قىلمىستىق ارەكەتىن اشكەرەلەۋ ءۇشىن ادامدى جانە جاسىرىن اۋديو جانە بەينەباقىلاۋ قۇرالدارىن پايدالانۋعا سانكتسيا بەردى. ايەلدەن تاپسىرىس العان ازاماتتى ارنايى كىسى ءولتىرۋشى رەتىندە بەلگىلەدىك. الدىن الا جاسالعان جوسپار بويىنشا «كيللەر» جابىرلەنۋشىنى «ولتىرگەنى» تۋرالى وقيعانى دالەلدەۋ ءۇشىن يميتاتسيا جاساۋى كەرەك ەدى. «كيللەرگە» جابىرلەنۋشىنىڭ ۇستىنە قان جاعىپ, پىشاق پەن وعان تيەسىلى باسقا دا زاتتارىن ۇيالى تەلەفونعا ءتۇسىرىپ, ايەلدى سەندىرە ءتۇسۋ تاپسىرىلدى, – دەيدى ناريمان ابىلاكىم.
«كىسى ءولتىرۋشى» تاپسىرىستى ورىندايتىن كۇنى ايەلمەن ا.توقماعامبەتوۆ كوشەسى بويىنداعى ءبىر ءۇيدىڭ اۋلاسىندا كەزدەسىپ, بۇرىنعى كۇيەۋىنىڭ كوزى جويىلعانىن كورۋگە اسىققان كەلىنشەكتىڭ كولىگىمەن وقيعا وتەتىن جەرگە جەتەدى. كوپ كەشىكپەي «كيللەر» ويعا العان ىستەرى جۇزەگە اسقانشا قالا ورتالىعىندا كۇتە تۇرۋعا كەلىسكەن ايەلگە حابارلاسىپ, كۇيەۋىن ولتىرگەنىن, داريا بويىمەن قاشىپ كەلە جاتقانىن ايتادى. ەكەۋى كەزدەسكەن ساتتە ۇيالى تەلەفونىنداعى جىگىتتىڭ قانسىراپ جاتقان فوتوسۋرەتىن, قان جۇققان پىشاقتى كورسەتەدى. وسىلايشا مۇقيات ويلاستىرىلعان وپەراتسيا ناتيجەسىندە ايەل قىلمىستىق پيعىلى تولىعىمەن «ورىندالعانىنا» كوزىن جەتكىزەدى. سودان كەيىن «كيللەرگە» جولكىرە رەتىندە 10 مىڭ تەڭگە ۇسىنادى. ال بۇرىنعى كۇيەۋىنىڭ اتىنا تىركەلگەن م ۇلىكتەر بالالارىنا مۇرا بولىپ وتكەننەن كەيىن عانا كەلىسىلگەن 20 مىڭ اقش دوللارىن بەرەتىنىن ايتادى.
باستى سوت تالقىلاۋىندا بۇرىنعى كۇيەۋى سوتتالۋشىعا بارىنشا جەڭىل جازا بەرۋىن سۇراپتى. قىزىلوردا وبلىسى مامانداندىرىلعان اۋدانارالىق سوتىنىڭ ۇكىمىمەن سوتتالۋشى 7 جىل 6 ايعا باس بوستاندىعىنان ايىرىلدى.
قىزىلوردا
