رەسپۋبليكانىڭ بارلىق وبلىسىندا فيليالدارى بار قۇرىلىمنىڭ نەگىزگى مىندەتى – اۆتوموبيل جولدارىن سالۋ, قايتا جاڭارتۋ, جوندەۋ جانە كۇتىپ ۇستاۋ كەزىندەگى جۇمىستار مەن ماتەريالداردىڭ ساپاسىن ساراپتاۋ, جول اكتيۆتەرىن باسقارۋ. فيليالدار زەرتحانالارى جول-قۇرىلىس ماتەريالدارىنىڭ ساپاسىن تەكسەرۋگە ارنالعان زاماناۋي قۇرال-جابدىقتارمەن جانە ءنورماتيۆتى تەحنيكالىق قۇجاتتارمەن قامتاماسىز ەتىلگەن. ورتالىق رەسپۋبليكالىق ماڭىزى بار جولداردى عانا ەمەس, سونىمەن قاتار جەرگىلىكتى ماڭىزى بار جولدار, كوپىر قۇرىلىستارى مەن كوشەلەردى سالۋ جانە جوندەۋ كەزىندە جۇمىستار مەن ماتەريالدارعا ساراپتاما جۇرگىزەدى.
جۋىردا ورتالىقتىڭ قىزىلوردا وبلىستىق فيليالى باسشىسى ەربولات كوشتاەۆ پەن زەرتحانا مەڭگەرۋشىسى ەرجان ۋسمانوۆ باق وكىلدەرىنە وتكەن جىلى اتقارىلعان جۇمىستاردى بايانداپ, نەگىزگى ماسەلەلەرگە توقتالدى.
«جول اكتيۆتەرىنىڭ ۇلتتىق ساپا ورتالىعى» رمك قىزىلوردا وبلىستىق فيليالى بىلتىر وبلىستىق جولاۋشىلار كولىگى جانە اۆتوموبيل جولدارى باسقارماسىمەن, قالامەن جانە جەتى اۋدانمەن 21 كەلىسىمشارت جاساعان. سونىڭ نەگىزىندە تاپسىرىس بەرۋشىلەرمەن بىرلەسە وتىرىپ سالىنىپ جاتقان جولدار ساپاسىنا باقىلاۋ جۇرگىزىپتى.
– بىلتىر رەسپۋبليكالىق ماڭىزى بار جولداردى ءىشىنارا تەكسەرۋ بارىسىندا 77 سىناما الىنىپ, 7 جول قۇرىلىس ماتەريالى نورماتيۆتىك قۇجاتتار تالاپتارىنا ساي بولماي شىقتى. اسپاپتىق تەكسەرۋ بارىسىندا تاعى 10 كەمشىلىك انىقتالدى. قازىر ولار تولىق جوندەلدى, – دەدى «جول اكتيۆتەرىنىڭ ۇلتتىق ساپا ورتالىعى» رمك وبلىستىق فيليالىنىڭ ديرەكتورى ەربولات كوشتاەۆ.
جەرگىلىكتى ماڭىزى بار اۆتوموبيل جولدارى مەن ەلدى مەكەندەردەگى, قالا كوشەلەرىندەگى جۇرگىزىلگەن جۇمىستارعا جانە قولدانىلاتىن ماتەريالدار ساپاسىنا جۇرگىزىلگەن ساراپتاما دا كوپ ولقىلىقتى انىقتاعان. ءىشىنارا تەكسەرۋ بارىسىندا 1 205 سىناما الىنىپ, زەرتحانادا جۇرگىزىلگەن سىناق ناتيجەسىندە ونىڭ 614-ءى تالاپقا ساي ەمەستىگى انىق بولعان. اسپاپتىق تەكسەرۋ بارىسىندا دا جۇزدەن استام كەمشىلىك بايقالدى. ەڭ قىزىعى, تاپسىرىس بەرۋشىلەر مەن مەردىگەرلەرگە 71 حات جولدانسا دا, انىقتالعان اقاۋلار ءالى تولىق ورنىنا كەلگەن جوق. «جول اكتيۆتەرىنىڭ ۇلتتىق ساپا ورتالىعى» رمك فيليالىنىڭ زەرتحانا مەڭگەرۋشىسى ەرجان ۋسمانوۆ ەسكەرتۋدى ەلەمەيتىندەردىڭ ءبىرى ارال مەن قازالى اۋداندارىن جالعاستىراتىن «جاڭاقۇرىلىس – بەكارىستان بي» باعىتىنداعى جولدى سالىپ جاتقان مەردىگەر ەكەنىن اتاپ ءوتتى. بىلتىر وسى جولعا سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتى ماماندارىمەن بىرلەسىپ تەكسەرۋ جۇرگىزىلگەن. سوندا الىنعان 26 سىنامانىڭ ون التىسى كۇرە جول قۇرىلىسىندا كوپ كەمشىلىك بارىن كورسەتكەن ەدى. بىراق مەردىگەر تاراپىنان ءالى كۇنگە سول ولقىلىقتاردىڭ جونگە كەلگەنى جايلى حابار جوق.
سالىنىپ جاتقان جولدارعا قاتىستى ورتاق كەمشىلىك – قالىڭدىعىنىڭ قالىپتاعىدان كەمدىگى, ەنىنىڭ تارلىعى مەن تىعىزداۋ كوەففيتسەنتىنىڭ ويداعىداي ورىندالماۋى. وسىدان كەلىپ جاڭا جول اي اينالماي جاتىپ ويدىم-ويدىم بولىپ شىعا كەلەدى.
ە.كوشتاەۆ بۇگىندە جول سالۋعا قىرۋار قارجى ءبولىنىپ, مۇمكىندىگى مەن ماماندارى بار كومپانيا دا, ون ەكىدە ءبىر سايمانى جوق سەرىكتەستىكتەر دە قۇرىلىسقا قۇمبىل كىرىسىپ كەتكەندىگىن ايتادى. قۇرىلىس نورمالارى ەرەجەسىنە سايكەس اسفالت توسەۋ كۇزدىڭ سالقىنى سەزىلگەننەن باستاپ توقتاۋى كەرەك. بىراق اقشاعا قۇنىققاندار وعان دا قاراپ جاتقان جوق.
جول قۇرىلىسى ساپاسىن تاپسىرىس بەرۋشىنىڭ تەندەرىن ۇتىپ العان تەحنيكالىق قاداعالاۋشى ءجىتى باقىلاپ, كۇندەلىكتى جۇمىستىڭ باسىندا بولىپ, كەتكەن كەمشىلىكتەردى ۋاقىتىندا ەسكەرتۋى ءتيىس. بىراق قازىر بۇعان دا نازار اۋدارىپ وتىرعاندار از. وسىنىڭ كەسىرىنەن جولدىڭ ساپاعا ساي ەمەستىگى كوبىنە سالىنىپ بىتكەننەن كەيىن عانا بەلگىلى بولادى. وسىدان دا ماماندار تەحنيكالىق قاداعالاۋشىلار جاۋاپكەرشىلىگىن كوتەرۋ قاجەتتىگىن ايتىپ وتىر.
قىزىلوردا
