دەپۋتاتتار مۇقىر اۋىلىنا بارعان كەزدە مەكتەپتە بولىپ, قاۋىپسىزدىك جۇيەسىن تەكسەردى, سونداي-اق ءبىلىم بەرۋ ساپاسى مەن مۇعالىمدەردىڭ جالاقىسى تۋرالى ويلارىمەن ءبولىستى.
مۇقىر ستانتسياسىنىڭ تەمىرجولشىلارىمەن بولعان كەزدەسۋدە وسى سالانىڭ وزەكتى ماسەلەلەرى قوزعالدى, قىزمەتكەرلەردىڭ ۇسىنىستارى مەن وتىنىشتەرى تىڭدالدى. سەناتورلار ءوز كەزەگىندە ايتىلعان ۇسىنىستاردى الداعى جۇمىس بارىسىندا ەسكەرۋگە ۋادە بەردى.
دەپۋتاتتاردىڭ ساپارى تاسقۇدىق ەلدى مەكەنىندە ودان ءارى جالعاستى. تۇرعىندار اۋىز سۋمەن قامتاماسىز ەتىلمەگەن, گاز قۇبىرى جەتكىزىلمەگەن ەكەن. ەلەكتر جەلىسى دە قايتا جاڭعىرتۋدى تالاپ ەتەدى. سەناتورلار بۇل كۇردەلى ماسەلەلەردى وڭ شەشۋگە جاردەمدەسەتىن بولادى.
سەناتورلار قۇلسارى-مۇقىر تاس جولىنىڭ جاعدايىنا نازار اۋداردى. وسى اۆتوموبيل جولىن قايتا جاڭارتۋ ماسەلەسى دەپۋتاتتاردىڭ باقىلاۋىندا بولعاندىقتان سەناتور عۇمار دۇيسەمباەۆ وسى ماسەلە بويىنشا بۇدان بۇرىن پرەمەر-ءمينيستردىڭ اتىنا دەپۋتاتتىق ساۋال جولداعان ەدى.
دەپۋتاتتار سونداي-اق ايماقتاعى حيميا وندىرىسىندە دە بولىپ, وڭىرلىك تۇراقتاندىرۋ قورىنىڭ جۇمىسىمەن دە تانىستى. ولار وسى قوردىڭ تاۋارلارى ساۋدالاناتىن سۋپەرماركەتتەر جەلىسىنە بارىپ, الەۋمەتتىك ماڭىزى بار تاۋارلاردىڭ باعاسى تۋرالى حاباردار بولدى. دەپۋتاتتار مەديتسينالىق تاۋارلار قويماسىندا دا بولدى.
سەناتور عۇمار دۇيسەمباەۆ باعانى مەملەكەتتىك رەتتەۋ ارقىلى الەۋمەتتىك ماڭىزى بار تاۋارلاردىڭ ناقتى ەسەبىن الۋ جولعا قويىلۋى ءتيىس ەكەنىن اتاپ ءوتتى. قازىرگى كەزدە ازىق-ت ۇلىك پەن مەديتسينالىق تاۋارلارعا قاتىستى دۇربەلەڭگە جول بەرمەۋ, جەتكىزۋ تەتىكتەرى مەن سورەلەردەگى باعالاردى ۇنەمى باقىلاۋ, الىپساتارلىققا جول بەرمەۋ ماڭىزدى بولىپ وتىر.
