10 قاڭتار كۇنى بارلىق سايلاۋ ۋچاسكەلەرىندە سايلاۋ قالىپتى ءوتتى, تۇرعىندار وزدەرى تىركەلگەن مەكەنجايلارى بويىنشا ۋچاسكەلەرگە كەلىپ, كىدىرىسسىز داۋىستارىن بەرىپ جاتتى. بۇل كۇنى وبلىس ورتالىعىنداعى بىرنەشە سايلاۋ ۋچاسكەسىندە ساياسي پارتيالار مەن قوعامدىق بىرلەستىكتەر فيليالدارىنىڭ, تمد مەن ەقىۇ بايقاۋشىلارى دا بولعانىن ايتا كەتكەن ءجون.
سايلاۋ ۋچاسكەلەرىندە سانيتارلىق-ەپيدەميالىق تالاپتار قاتاڭ ساقتالدى. سونداي-اق مۇمكىندىگى شەكتەۋلى ازاماتتاردىڭ داۋىس بەرۋىنە ىڭعايلى بولۋى ءۇشىن بارلىق سايلاۋ ۋچاسكەلەرىنىڭ كىرەبەرىسىنە پاندۋستار ورناتىلىپ, ارنايى ەسىك تۇتقالارى سالىنىپ, ماڭىزدى اقپاراتتار توپتاستىرىلعان مونيتورلار ورناتىلدى.
COVID-19 كوروناۆيرۋس ينفەكتسياسىنىڭ تارالۋىن بولدىرماۋ ماقساتىندا بارلىق ۋچاسكەلەردە بۇل كۇنى مەديتسينا قىزمەتكەرلەرى مەن ەرىكتىلەر كەزەكشىلىككە شىعىپ, داۋىس بەرۋشى ازاماتتاردىڭ الەۋمەتتىك اراقاشىقتىقتى ساقتاۋىن جانە ولاردىڭ بەتپەردە كيۋىن قاتاڭ باقىلادى. 10 قاڭتاردا وڭىردەگى بارلىق سايلاۋ ۋچاسكەلەرىندە ءتارتىپ بۇزعاندار مەن باسقا دا ورەسكەل جاعدايلار تىركەلگەن جوق. سايلاۋ قالىپتى ءوتتى دەپ ايتۋعا بولادى.
اقتوبە وبلىسى
