كوللاجدى جاساعان امانگەلدى قياس, «EQ»
اۋەجاي قىزمەتكەرلەرى SJ182 رەيس كومانديرى اپاتتىق جاعدايعا قاتىستى ەشقانداي بەلگى بەرمەگەنىن مالىمدەدى. Flightradar اقپاراتىنا سۇيەنسەك, 3 مىڭ مەتر بيىكتىككە كوتەرىلگەن اۋە كەمەسىمەن 4 مينۋتتان كەيىن بايلانىس ۇزىلگەن.
يندونەزيانىڭ كولىك ءمينيسترى بۋدي كاريا سۋمادي اقپاراتتى راستاپ, بورتتىڭ مالە ارالىنىڭ ماڭىندا قۇلاعانىن حابارلادى. سول ءتۇنى اسكەر 23 مەتر تەرەڭدىكتەن ۇشاقتى تاپتى.
اپاتقا ۇشىراعان ۇشاق العاشقى رەيسىن 1994 جىلى جاساعانى بەلگىلى بولدى. ياعني ۇشاق 27 جىل بويى پايدالانىلىپ كەلگەن.
بورتتاعى پونتياناك قالاسىنا بەت العان 50 جولاۋشى قازا بولدى. جولاۋشىلاردىڭ ونى – بالا.
وقيعاعا كۋا بولعان جەرگىلىكتى بالىقشىلاردىڭ ءبىرى BBC ارناسىنا سۇحبات بەرىپ, ءمان-جايدى ايتىپ بەرگەن. سوليحين دەگەن ازاماتتىڭ ايتۋىنشا, ۇشاق بىرنەشە سەكۋند ىشىندە قۇلاعان. «نايزاعاي جارقىلىنداي تەز بولدى. ءمان-جايدى ءتۇسىنىپ ۇلگەرمەدىك. ۇشاق ياۆا تەڭىزىنە قۇلاي سالا جارىلدى. اپات وتە جاقىن جەردە بولدى. ءتىپتى ۇشاقتىڭ كەي بولىكتەرى ءبىزدىڭ كەمە ماڭىنا قۇلادى», دەيدى.
قازىر يندونەزيانىڭ ۇلتتىق ىزدەۋ-قۇتقارۋ اگەنتتىگى ىزدەۋ جۇمىستارىن جۇرگىزىپ جاتىر. اۋە كەمەسى راداردا سوڭعى رەت ياۆا تەڭىزى ماڭىندا كورىنگەن. Boeing 737-500 ۇشاعى دجاكارتادان پونتياناك قالاسىنا باعىت العان. جولاۋشىلار ءتىزىمى ءالى جاريالانعان جوق. سونىمەن قوسا Sriwijaya Air كومپانياسى ۇشاقتا شەتەلدىك جولاۋشىلاردىڭ بولعان-بولماعانى تۋرالى حابار بەرمەي وتىر.
مەملەكەت باسشىسى قاسىم-جومارت توقاەۆ يندونەزيا پرەزيدەنتى دجوكو ۆيدودوعا كوڭىل ايتۋ جەدەلحاتىن جولدادى.
