ۆەدومستۆو باسشىسى مارتوك اۋدانىندا بولىپ, مادەنيەت پەن سپورت مەكەمەلەرىن ارالادى. 2019 جىلى اۋدان ورتالىعىندا سپورت مەكتەبىنىڭ اشىلۋى جاسوسپىرىمدەردىڭ سپورتپەن شۇعىلدانۋىنا جول اشتى. بۇگىندە شاڭعى, بياتلون, كوپ سايىستان جاقسى ونەر كورسەتكەن وسى اۋداننىڭ بالعىن سپورتشىلارى رەسپۋبليكالىق قۇراما كوماندا قاتارىنا الىنسا, 10 جاس بياتلونشى اقتوبە قالاسىنداعى وبلىستىق وليمپيادالىق رەزەرۆ مەكتەبىندە وقيدى. مارتوك مەكتەبىنىڭ مىقتى بولۋى جاتتىقتىرۋشىلارىنىڭ ارقاسى. بۇل جاقتا كەڭەستىك زاماننان جالعاسقان جاتتىقتىرۋشىلىق مەكتەپ اكەدەن بالاعا, ۇستازدان شاكىرتكە ساباقتاسىپ كەلەدى. ءبىر كەمشىلىگى زاماناۋي سپورت مەكتەبىنىڭ بولماۋى, سپورت جابدىقتارىنىڭ ەسكىلىگى بولاتىن. 160 ورىنعا ارنالعان دەنە شىنىقتىرۋ-ساۋىقتىرۋ كەشەنى سالىنعالى اۋدان جاستارى بىرنەشە سپورت تۇرىمەن شۇعىلدانا باستادى. بۇل جەردە 50-دەن استام بالا سۋعا جۇزۋمەن دە اينالىسادى. باسسەين ەسىگى سەنبى, جەكسەنبى كۇندەرى مۇمكىندىگى شەكتەۋلى جانە كوپ بالالى وتباسىلاردىڭ بالالارى ءۇشىن اشىق ءارى جاتتىعۋ تەگىن. سپورت كەشەنىندە جۇمىس ىستەيتىن جاتتىقتىرۋشىلار سانى ارتقان. ولاردىڭ ەڭبەكاقىسى جونىندە سۇراعان مينيستر «جاتتىقتىرۋشىلار مەن سپورت نۇسقاۋشىلارى بازالىق ايلىق ەسەپتىڭ 100 پايىزدىق دەڭگەيىندە ەڭبەكاقى الۋى كەرەك», دەپ تاپسىرما بەردى. ويتكەنى, اقىلى نەگىزدە جۇمىس ىستەيتىن سپورت سەكتسيالارىنان تۇسكەن تولەمنىڭ قانداي دا ءبىر بولىگى جاتتىقتىرۋشىلارعا بەرىلۋى قاجەت.
قىسقى سپورت تۇرلەرى جاقسى قارقىنمەن دامىپ جاتقان مارتوك اۋدانىنىڭ اۋىلدىق وكرۋگتەرىندە دە بۇقارالىق سپورت تۇرلەرىن دامىتۋ جوسپارعا ەنگىزىلگەن. بيىل جازدان باستاپ سارجانساي, قاراتوعاي, رودنيكوۆكا ەلدى مەكەندەرىندە سپورت زالدارى, سارىجار, جايساڭ ەلدى مەكەندەرىندە انگار تۇرىندەگى سپورت كەشەندەرى سالىناتىن بولدى.
مادەنيەت جانە سپورت ءمينيسترى اقتوتى رايىمقۇلوۆا مەن ءوڭىر باسشىسى وڭداسىن ورازالين اۋداندىق كىتاپحانا قورىن ارالاپ, اۋداندىق مادەنيەت ۇيىندە قولونەرشى ەرقوساي ءابىلوۆ پەن اعاش ۇستاسى ەدىلباي ۇزاقباەۆتىڭ كورمەسىمەن تانىستى. 1976 جىلى سالىنعان مارتوك اۋداندىق مادەنيەت ءۇيى وتكەن جىلى «جۇمىسپەن قامتۋدىڭ جول كارتاسى» باعدارلاماسى اياسىندا كۇردەلى جوندەۋدەن ءوتتى. بيۋدجەتتەن بولىنگەن 145,8 ملن تەڭگە قارجىعا جوندەۋ جۇمىستارىن «KND Construction» جشس-ءى جۇرگىزدى. قۇرىلىسقا مارتوك اۋدانىنىڭ 21 جۇمىسسىز تۇرعىنى تارتىلعان. قازىر 460 ورىنعا كەڭەيتىلگەن مادەنيەت ۇيىندە 18 ۇيىرمە جۇمىس ىستەيدى. بۇل جەردە مينيستر مەن ءوڭىر باسشىسى اۋىل كلۋبتارىنىڭ جەتەكشىلەرىمەن كەزدەسىپ, ەلدى مەكەندەردەگى مادەنيەت وشاقتارىنىڭ قازىرگى جاعدايى تۋرالى اڭگىمەلەستى.
وسىدان كەيىن ا.رايىمقۇلوۆا اقتوبە قالاسىنداعى قىسقى سپورت تۇرلەرىنە ارنالعان وبلىستىق مامانداندىرىلعان بالالار مەن جاسوسپىرىمدەر مەكتەبىنە بارىپ, جاتتىقتىرۋشىلار مەن تاربيەلەنۋشىلەرمەن كەزدەسىپ, كىرپىشتى ەلدى مەكەنىندەگى ۇزىندىعى 11,5 شاقىرىم بولاتىن روليكتى شاڭعى جولىنىڭ اشىلۋىنا قاتىستى. ساپار سوڭىندا مينيستر اقتوبەدەگى وبلىستىق فيلارمونيا عيماراتىندا مادەنيەت قىزمەتكەرلەرىمەن كەزدەستى.
اقتوبە وبلىسى
