قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ قازاقستانعا رەسمي ساپارمەن كەلگەن تۇرىك رەسپۋبليكاسىنىڭ ۇلتتىق قورعانىس ءمينيسترى يسمەت يىلمازبەن كەزدەستى.
قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ قازاقستانعا رەسمي ساپارمەن كەلگەن تۇرىك رەسپۋبليكاسىنىڭ ۇلتتىق قورعانىس ءمينيسترى يسمەت يىلمازبەن كەزدەستى.
– قازاقستان مەن تۇركيا اراسىنداعى ىنتىماقتاستىق قازىرگى تاڭدا باۋىرلاس ەلدەرىمىز باسشىلارىنىڭ ارقاسىندا بەلسەندى تۇردە دامىپ كەلەدى. تۇركيا – قازاقستاننىڭ تاۋەلسىزدىگىن تانىعان تۇڭعىش مەملەكەت. العاشقىلاردىڭ ءبىرى بولىپ, قارۋلى كۇشتەردى دامىتۋدىڭ ءارتۇرلى اسپەكتىلەرى بويىنشا ءوز تاجىريبەلەرىن بولىسۋگە ازىرلىگىن بىلدىرگەن بولاتىن, دەپ اتاپ ءوتتى ءا.جاقسىبەكوۆ.
كاسىبيلەندىرۋ بۇگىندە قازاقستان اسكەرى ءۇشىن وزەكتى باعىتتاردىڭ ءبىرى بولىپ تابىلادى. وسى باعىتتا قازاقستان اسكەري ۆەدومستۆوسى تۇرىك اسكەرىنىڭ ىرىكتەۋ جۇيەسىن دامىتۋ, شاقىرۋ, اسكەري پەرسونالدى ەسەپكە الۋ مەن باعالاۋ تاجىريبەسىن زەردەلەۋگە مۇددەلى.
اسكەري ءبىلىم مەن عىلىم قازاق-تۇرىك اسكەري ىنتىماقتاستىعىنىڭ ماڭىزدى باعىتى بولىپ تابىلادى. قازاقستان قورعانىس مينيسترلىگى ءتۇركيا اسكەري وقۋ ورىندارىندا قازاقستاندىق اسكەري قىزمەتشىلەر ءۇشىن وقىتۋ كۆوتاسىن ارتتىرۋعا, سونداي-اق قازاقستاننىڭ ۇلتتىق قورعانىس ۋنيۆەرسيتەتىندە ءدارىس وقۋ ءۇشىن پروفەسسورلىق-وقىتۋشىلار قۇرامىن شاقىرۋعا مۇددەلى. «ەلىمىزدىڭ اسكەري مەكەمەسىن جەتىلدىرۋدىڭ ماڭىزدى بولىگى بىلىكتى جانە دايىندالعان ماماندار بولىپ تابىلادى», – دەپ اتاپ ءوتتى ءا.جاقسىبەكوۆ وسى ورايدا.
تاراپتار وسىعان دەيىن انكارادا وتكەن كەزدەسۋ ەكىجاقتى ءوزارا ءىس-قيمىلدىڭ باعىتتارىن ناقتىلاپ, بولاشاقتاعى باسىمدىقتاردى نەعۇرلىم ايقىنداپ بەرگەنىن اتاپ ءوتتى.
ءا.جاقسىبەكوۆ پەن ي.يىلماز ەكىجاقتى ىنتىماقتاستىق, ونىڭ ىشىندە ءاسكەري-تەحنيكالىق ءوزارا ءىس-قيمىل سالاسىنداعى ءبىرقاتار وزەكتى ماسەلەلەردى تالقىلادى. ودان كەيىن قازاقستان مەن تۇركيا قورعانىس ۆەدومستۆولارىنىڭ باسشىلارى ەلەكتروندى-وپتيكالىق قۇرىلعىلار وندىرەتىن «قازاقستان اسەلسان ينجينيرينگ» قازاق-تۇرىك بىرلەسكەن كاسىپورنىنىڭ اشىلۋ راسىمىنە قاتىستى. قازاقستاندىق ماماندار وسى زاۋىتتىڭ ونىمدەرىن ءارتاراپتاندىرۋ مۇمكىندىگىن قاراستىرۋدا.
ءا.جاقسىبەكوۆ ي.يىلمازعا قازاقستاننىڭ قورعانىس ونەركاسىبى سالاسىن دامىتۋعا قوسقان ۇلەسى ءۇشىن العىس ءبىلدىرىپ, تۇركيا قازاقستان ءۇشىن حالىقارالىق اسكەري جانە اسكەري-تەحنيكالىق ىنتىماقتاستىقتا سەنىمدى ءارىپتەستەر قاتارىندا قالا بەرەتىنىن جەتكىزدى.
«ەگەمەن-اقپارات».
