جالپى اۋىل ءالى عالامتوردىڭ يگىلىگىن كورە قويعان جوق. بۇل بىلتىر كوكتەمدە باستالعان پاندەميا كەزىندە ۇيدەن وقۋعا كوشكەن اۋىلداعى №84 مەكتەپ وقۋشىلارى ءۇشىن قيىن ءتيدى.
سوندىقتان ينفورماتيكا ءپانىنىڭ مۇعالىمى الماسبەك قالدىبەك اۋىل تۇرعىندارى مەن مەكتەپ وقۋشىلارىن ينتەرنەتپەن قامتۋ ءۇشىن SMART بولمە ويلاپ تاپتى.
قاراپايىم اۋىل مۇعالىمى ويلاپ تاپقان SMART بولمە ۆايفاي جەلىسىن تاراتۋ ارقىلى تۇرعىنداردىڭ ينتەرنەتكە سىمسىز قوسىلۋىنا مۇمكىندىك بەردى.
سونداي-اق بولمە ارقىلى قاۋىپسىز ينتەرنەت جۇيەسىنە باقىلاۋ قويىلىپ, قاجەتسىز سايتتار مەن پايداسىز اقپاراتتى سۇرىپتاۋ مەن قاداعالاۋ جۇيەسى ورناتىلعان.
«مەنىڭ SMART بولمەنى ويلاپ تابۋداعى ەڭ باستى ماقساتىم – اۋىل بالالارى مەن قالا بالالارى اراسىنداعى الشاقتىقتى جويۋ بولاتىن. وبلىس ورتالىقتارىنداعى زامانۋي تەحنولوگيالاردان ءبىزدىڭ وقۋشىلار دا حاباردار بولسا ەكەن دەيمىن. ونىڭ ۇستىنە وتكەن جىلى باستالعان پاندەميا بالالاردىڭ ءبىلىم الۋىنا قيىندىق كەلتىردى. قوسۇيەڭكى اۋىلىندا تەك مەكتەپ قانا ينتەرنەت بايلانىسىمەن قامتىلعان. تۇرعىندار ءۇشىن قول جەتىمسىز. سوندىقتان انتەننا تۇرىندەگى قابىلداعىش پەن سىمسىز ينتەرنەت تاراتقىش قۇرىلىعىلارىن ويلاپ تاۋىپ, اۋىلداعىلاردى دا ينتەرنەت جەلىسىمەن قامتۋعا قول جەتكىزدىك», دەيدى الماسبەك قالدىبەك.
مەكتەپ مۇعالىمى ويلاپ تاپقان SMART بولمەنىڭ تاعى ءبىر جاڭالىعى –قاشىقتىقتان باسقارۋ جۇيەسى مەن اتا-انالار ءۇشىن ساباق پروتسەسىن پروۆايدەرلەر ارقىلى اقىسىز باقىلاۋ جۇيەسى دە ىسكە قوسىلعان.
زامانۋي SMART بولمەنى قۇراستىرۋشى الماسبەك قالدىبەك قاۋىپسىزدىكتى دە بارىنشا نازارعا العان. اتالعان بولمەدە ساباق وتكىزگەن ۇستازدار كابينەتتىڭ جارىعىن نەمەسە كومپيۋتەرلەردى ءسوندىرۋدى ۇمىت قالدىرسا, اۆتوماتتى تۇردە قاشىقتىقتان وشىرۋگە نەمەسە قوسۋعا مۇمكىندىك بار. بولمەگە كىرگەن ۋاقىتىڭىزدا قاۋىپسىزدىك ەرەجەلەرىن قاتاڭ ساقتاۋ قاجەتتى داۋىستىق حابارلاما ارقىلى ەسكەرتىلىپ, ساباق پروتسەسىنىڭ باستالعاندىعى حابارلانادى.
سونىمەن قاتار, SMART بولمەدە قيمىل قوزعالىس پەن داۋىس ارقىلى دا باسقارۋ جۇيەسى ورناتىلعان. ساباق پروتسەسى باستالعان ۋاقىتتا كىرۋ-شىعۋ بەلگىسىن كورسەتەتىن بەلگىلەر وزدىگىنەن ىسكە قوسىلىپ, وشىرىلەدى. ساباق اياقتالعان سوڭ بولمەدە ورنالاسقان بارلىق كومپيۋتەرلىك قۇرىلعىلار اۆتوماتتى تۇردە سوندىرىلەدى. بۇل پروتسەستەردى پۋلت نەمەسە قولىڭىزداعى ۇيالى تەلەفون ارقىلى باسقارۋ مۇمكىندىگى دە قاراستىرىلعان. سەنسورلىق باسقارۋ جۇيەسى دە ورنالاستىرىلعان.
ينفورماتيكا ءپانى مۇعالىمى الماسبەك قالدىبەكتىڭ شاكىرتتەرى دە ءتۇرلى تەحنولوگيالاردى ويلاپ تاۋىپ ءجۇر. بولمە بازاسىندا ۇيىمداستىرىلاتىن ۇيىرمەلەرگە قاتىساتىن بالالار ىستەن شىققان تەلەديدار پۋلتىنەن ينتەراكتيۆتى تاقتانى قاشىقتىقتان باسقارۋ قۇرىلعىسىن جاساپ شىعارعان.
بۇدان بولەك, كۇن ساۋلەسىنىڭ تۇسۋىنە قاراي اۆتوماتتى تۇردە جۇمىس جاسايتىن پەردە دە وسى بالالاردىڭ جاڭالىعى. كۇن ساۋلەسى قاتتى ءتۇسىپ, بولمە ىسىعاندا پەردە وزدىگىنەن تومەن تۇسەدى.
ال بۇلتتى كۇندەرى بولمە قاراڭعى بولماۋى ءۇشىن پەردە وزدىگىنەن كوتەرىلىپ, جارىق مول تۇسەدى.
