اقتوبە وبلىستىق «دوستىق» ۇيىندە قازاقستان حالقى اسسامبلەياسىنىڭ كەزەكتى ون جەتىنشى سەسسياسى ءوتتى. سەسسيا ماجىلىسىنە وبلىستىق, اقتوبە قالالىق جانە اۋداندىق ءماسليحاتتارىنىڭ حاتشىلارى, دەپۋتاتتار, وبلىستىق باسقارمالار مەن دەپارتامەنتتەر, ءىرى كاسىپورىندار مەن قوعامدىق ۇيىمدار باسشىلارى, جاستار وكىلدەرى قاتىستى.
اقتوبە وبلىستىق «دوستىق» ۇيىندە قازاقستان حالقى اسسامبلەياسىنىڭ كەزەكتى ون جەتىنشى سەسسياسى ءوتتى. سەسسيا ماجىلىسىنە وبلىستىق, اقتوبە قالالىق جانە اۋداندىق ءماسليحاتتارىنىڭ حاتشىلارى, دەپۋتاتتار, وبلىستىق باسقارمالار مەن دەپارتامەنتتەر, ءىرى كاسىپورىندار مەن قوعامدىق ۇيىمدار باسشىلارى, جاستار وكىلدەرى قاتىستى.
جيىندى اقتوبە وبلىسى قازاقستان حالقى اسسامبلەياسىنىڭ توراعاسى, وبلىس اكىمى ارحيمەد مۇحامبەتوۆ اشىپ, ءجۇرگىزىپ وتىردى. سەسسيادا اقتوبە وبلىسى قازاقستان حالقى اسسامبلەياسى حاتشىلىعىنىڭ مەڭگەرۋشىسى قىدىرعالي ەرمۇقان «مەملەكەت باسشىسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ قازاقستان حالقى اسسامبلەياسىنىڭ حح سەسياسىنداعى تاپسىرمالارىنان تۋىندايتىن مىندەتتەردىڭ ورىندالۋ بارىسى تۋرالى» دەگەن تاقىرىپتا بايانداما جاسادى. ول ەلباسى تاپسىرماسىن تاراتىپ ايتا كەلىپ, بۇل مىندەتتەردىڭ قوعامدىق-ساياسي تۇراقتىلىقتى, بەيبىتشىلىك پەن كەلىسىمدى نىعايتۋعا باعىتتالعانىنا توقتالدى. وبلىستىق اسسامبلەيانىڭ تاياۋداعى جەتى جىلعا ارنالعان دامۋ تۇجىرىمداماسى جاسالعانىن العا تارتتى.
– اسسامبلەيانىڭ بارلىق قىزمەتى مەن ماقساتى قازاقستان حالقىن ەتنوستىق تەگىنە, دىلىنە, دىنىنە قاراماي, ىنتىماعى جاراسقان, اۋىزبىرشىلىگى مىعىم, ساياسي احۋالى تۇراقتى ەل بولۋعا ۇيىستىرۋعا اتسالىسۋ بولىپ تابىلادى. كەز كەلگەن ەلدىڭ دامۋى الدىمەن تاتۋلىقتىڭ, تۇراقتىلىقتىڭ ارقاسىندا ەكەنى دالەلدەنگەن قاعيدا. «بىرلىك بولماي تىرلىك بولمايدى». ەندەشە, ونى ساقتاي ءبىلۋ, ەلىمىزدەگى ەتنوسارالىق قاتىناستاردى ءارى قاراي دامىتۋ بۇگىنگى قوعام الدىنداعى باستى پارىزىمىز, – دەپ تۇجىرىمدادى ويىن ق.ەرمۇقان.
سەسسيادا «دوستىق» ءۇيىنىڭ ديرەكتورى ر.بەركەشوۆا, اقتوبە قالاسىنداعى «ازەربايجاندار قاۋىمداستىعى» رەسپۋبليكالىق بىرلەستىگى فيليالىنىڭ توراعاسى ش.جامالوۆ, مارتوك اۋدانىنىڭ اكىمى م.ەلەۋسىزوۆ شىعىپ سويلەپ, ۇلتارالىق دوستىق پەن بىرلىكتى نىعايتۋعا باعىتتالعان يگىلىكتى ىستەردەن حاباردار ەتتى.
سەسسيا بارىسىندا ءبىر توپ اسسامبلەيا بەلسەندىلەرىنە وبلىس اكىمىنىڭ العىس حاتتارى تاپسىرىلدى. ونىڭ جۇمىسىنىڭ قورىتىندىسى بويىنشا وبلىستىق قازاقستان حالقى اسسامبلەياسىنىڭ ارنايى قارارى قابىلداندى. اقتوبە وبلىسى قازاقستان حالقى اسسامبلەياسىنىڭ بارلىق ءىس-ارەكەتى ەل بىرلىگىن, قوعامدىق كەلىسىم مەن تولەرانتتىلىقتى نىعايتۋعا باعىتتالىپ وتىر. بىرلىك پەن ءوزارا تۇسىنىستىك جولىمەن العا باسىپ, ەلىمىزدىڭ بەيبىتشىلىك پەن جاسامپازدىعى ءۇشىن ودان ءارى جاعداي جاسالاتىنى كۇمانسىز.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
