قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ «دارا تۇلعا» اتتى مەرەكەلىك كونتسەرتى ەلباسىنا ارنالدى.
قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ «دارا تۇلعا» اتتى مەرەكەلىك كونتسەرتى ەلباسىنا ارنالدى.
تۇڭعىش پرەزيدەنت كۇنى بۇكىل ەلىمىز بويىنشا كەڭىنەن اتالىپ وتىلگەنى بەلگىلى. بىراق وسى ورايداعى ىقىلاستى كوڭىل ءلۇپىلى, ىزگى نيەتتەردەن تۋعان قۇرمەت تولقىنى, يگى شارالار تاسقىنى تولاستار ەمەس. كۇي اتاسى قۇرمانعازى اتىنداعى قازاق ونەرىنىڭ قاراشاڭىراعى ءوزىنىڭ سەكسەنىنشى ماۋسىمىنىڭ شىمىلدىعىن ەلدىگىمىزدىڭ مارتەبەسىن بيىكتەتكەن وسىناۋ ۇلىق مەرەكەنى ايشىقتاعان تاماشا باعدارلامامەن اشۋى ەلەۋلى وقيعاعا اينالدى.
ءيا. دارا تۇلعا. كونتسەرت تاقىرىبىنىڭ التىن ارقاۋى, كۇمىس ءتىنى ەلىمىزدى الەمگە تانىتقان, تاۋەلسىزدىكتىڭ كوك بايراعىن العاش جەلبىرەتكەن قادىرمەندى ەلباسىمىز بولۋى دا زاڭدى. مەملەكەتتىك سىيلىقتىڭ لاۋرەاتى, اقىن مارفۋعا ايتحوجينا جاڭا ماۋسىمدى وركەستردىڭ سەكسەنىنشى كوكتەمىنە بالادى. ولەڭمەن ورنەكتەلگەن ءوز قۇتتىقتاۋىن:
«سەكسەنىنشى قىس ورالدى, ۇلپا قارعا بولەنىپ,
پرەزيدەنت كۇنى – الەم جۇرتى ايتىپ جاتىر تورەلىك.
سەكسەندەگى قۇرمانعازى وركەسترى قوسىلىپ,
«دارا تۇلعا» ءانىن ايتىپ بەرەلىك», – دەگەن سىرلى شۋماقتارمەن جەلپىندىرە ءتۇستى. ەل پرەزيدەنتىنىڭ بەكزات قاسيەتتەرىن كەستەلەگەن وسىناۋ تاماشا ءاننىڭ, ونىڭ تۇرپاتتى ولەڭىنىڭ دە اۆتورى مارفۋعا اقىن. وركەستردىڭ جاڭادان تاعايىندالعان جاس ديرەكتورى نۇرعيسا داۋەشوۆتىڭ ەلباسىنا ارنالعان بۇكىل كونتسەرتتىك باعدارلامانى وسى ءان اتاۋىمەن اتاۋى تاپقىر شەشىم بولىپ, جاقسى جاراسىپ تۇرعانداي.
مەرەكەلىك كونتسەرت ەلباسىنىڭ تاۋەلسىز مەملەكەت قۇرۋداعى ەرەن ەڭبەگىن ايشىقتى تۇردە بەينەلەپ كورسەتكەندەي اسەر قالدىردى. كەشتە نۇرسۇلتان ءابىش ۇلىنىڭ حالىققا كەڭىنەن تانىمال «ۇشقوڭىر», «تاريح تولقىنىندا», «استانا», «گورود موي» سىندى شىعارمالارى ساتىمەن ورىندالدى. جيىلعان قاۋىم وركەستردىڭ باس دومبىراشىسى, مەملەكەتتىك «دارىن» جاستار سىيلىعىنىڭ لاۋرەاتى باتىرجان مىقتىباەۆ, حالىقارالىق جانە رەسپۋبليكالىق كونكۋرستاردىڭ لاۋرەاتتارى بەرەكە ەڭكەباەۆا, فارحات كۋبيەۆ, الماس التىنبەكوۆ, باقىتگۇل بەكبەرگەنوۆا, ديدار كادەن جانە «اڭسار» كۆارتەتى سىندى ونەر مايتالماندارىنا سۇيسىنە قول سوقتى.
وركەستردىڭ باس ديريجەرلىگىنە جاڭادان كەلگەن حالىقارالىق كونكۋرستاردىڭ لاۋرەاتى ارمان جۇدەباەۆتىڭ وزىندىك ورنەك-قولتاڭباسى, جاڭا تىنىس ەرەكشە ناشپەن, بولەكشە ورەدە قۇيقىلجي شالقىعان كۇيلەردەن بايقالىپ-اق تۇردى. قازاقستاننىڭ ەڭبەك سىڭىرگەن قايراتكەرى جاناس بەكەنتۇروۆ پەن حالىقارالىق كونكۋرستاردىڭ لاۋرەاتى قارشىعا احمەدياروۆ ونەرى دە قاۋىمدى قۋانىشقا بولەدى.
كونتسەرتتى قازاق رۋحىن تانىتار «سارىارقا» كۇيىمەن قاتار, ۇزەڭگى قاعىستىرا تۇيىندەگەن «دارا تۇلعا» ءانىن قازاقستاننىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى شاحيماردان ءابىلوۆ تاۋ سامالىنداي تازا, بارقىت كۇيلى بيپاز داۋىسپەن كەلىستىرە شىرقادى. كەڭ تىنىستى كەمەل اندە ەل باعىنا تۋعان ەر بەينەسى تومەندەگىدەي ولەڭ جولدارىمەن ادەمى اشىلدى.
جاڭعىرتىپ قالاسىن دا, دالاسىن دا,
ەلىڭدى باستاپ ءجۇرسىڭ جاڭا شىڭعا.
امان بول, بار قازاقتىڭ باقىتى ءۇشىن,
زاماننان اسىپ تۋعان دارا تۇلعا.
قورعانبەك امانجول,
«ەگەمەن قازاقستان».
الماتى.
