43 جاستاعى جامبىل وبلىسىنىڭ تۋماسى كاسىبي فۋتبولداعى العاشقى قادامىن 1995 جىلى الماتىنىڭ «قايرات» كومانداسىندا باستاعان. ودان كەيىنگى جىلداردا تالدىقورعاننىڭ «جەتىسۋ», ەلوردانىڭ «استانا», الماتىنىڭ «الما-اتا», «مەگاسپورت», الماتى وبلىسىنىڭ «سۇڭقار» كلۋبتارىندا دوپ تەپكەن. سونىمەن قاتار 2000-2002 جىلدارى ۇلتتىق قۇرامادا دا ونەر كورسەتكەن.
ك.گوروۆەنكو كەيىنگى جىلدارى باپكەرلىك قىزمەت اتقارىپ كەلەدى. 2018-2020 جىلدارى تالدىقورعاننىڭ «جەتىسۋ ب» كلۋبىنداعى تابىستى ناتيجەسىنەن كەيىن, ول بىلتىر قاراعاندىنىڭ «شاحتەر» كلۋبىنىڭ تىزگىنىن ۇستادى. ونىڭ باسشىلىعىمەن «كەنشىلەر» كومانداسى پرەمەر-ليگادا ءتورتىنشى ورىنعا تۇراقتاپ, ۋەفا كونفەرەنتسيا ليگاسىنا جولداما العان بولاتىن. ەسكە سالا كەتەيىك, بۇعان دەيىن «جەتىسۋ» كومانداسىن وزگە ءبىر قازاقستاندىق مامان دميتري وگاي باسقارعان ەدى. وتكەن ماۋسىمدا الماتى وبلىسىنىڭ كومانداسى ەل بىرىنشىلىگىندە 6-ورىندى مىسە تۇتتى.
