ەلىمىزدىڭ ءبىلىم سالسىنا بولىنگەن قوماقتى قاراجاتتىڭ قايتارىمى كوڭىل كونشىتپەيدى. ماجىلىستەگى پارلامەنت ساعاتىندا داريعا نازارباەۆا وسى اششى شىندىقتى جۇرتشىلىققا ايتىپ بەردى. بۇل تۋرالى Kapital.kz حابارلادى.
«ءبىلىم مينيسترلىگىنىڭ تاعدىرى وڭاي بولعان جوق. 2000 جىلدان بەرى سالادا 7 باسشى اۋىستى. ولاردىڭ ءاربىرى ءوزىنىڭ جۇمىسىن كەزەكتى ءىرى كولەمدى رەفورمادان باستاپ وتىردى. بىراق سولاردىڭ بىردە-ءبىرى اقىرىنا دەيىن جەتكىزىلگەن جوق. اتالمىش سالاعا ءبولىنىپ كەلگەن وراسان زور قارجىلاردىڭ ناتيجەلەرى جۇتاڭ عانا. قازىر جۇرتتىڭ كوبى: «ءبىلىم سالاسىنا تىنىشتىق بەرىڭىزدەرشى, ونداعى رەفورمالاردان جۇرەك اينيدى» دەگىسى كەلەدى», – دەدى ءسوز ورايىندا دەپۋتات د.نازارباەۆا.
ءبىلىم باعدارلامالارىنىڭ تيىمدىلىگى دە شامالى بولىپ تۇر. وسىنى سىن تەزىنە العان دەپۋتات بىلاي دەدى: «ءبىز بىلىكتى كادرلاردىڭ تاپشى, وقۋلىقتار ساپاسىنىڭ ناشار, وقۋ باعدارلامالارىنىڭ ءتيىمسىز ەكەنىن كورىپ وتىرمىز. بارلىق ماتەريالدىق بازالارى كەمشىن مەكتەپتەردەگى مىندەتتى پاندەردىڭ سانى جاعىنان ءبىز چەمپيونبىز. قازىر ولاردىڭ سانى 17 بولسا, دامىعان ەلدەردە 6-دان اسپايدى. بۇل ءبىلىم بەرۋدىڭ ساپاسى جاڭاعىداي بولىپ تۇرعان ءبىزدىڭ ەۋروپاداعى دامىعان ەلدەرگە قاراعاندا, وعان شىعىندى اناعۇرلىم كوپ جۇمسايتىنىمىزدى بىلدىرەدى».
دانيار تۇيمەباي.
دەرەككوز: Kapital.kz.
