وڭتۇستىك قازاقستان وبلىسىندا پوليتسيا قىزمەتكەرى مال ۇرلىعىمەن اينالىسقان توپقا قولداۋ كورسەتكەن. بۇل تۋرالى «استانا» تەلەارناسى حابارلادى.
مال ۇرلاۋشىلارعا قولداۋ بىلدىرگەن ءتارتىپ ساقشىسى ەڭبەكشى اۋداندىق ىشكى ىستەر بولىمىندە قىزمەت ىستەگەن. اعا لەيتەنانت شەنىندەگى بۇل ازامات ءوزىنىڭ سىبايلاستارىنا جول بويىنداعى بەكەتتەردەن مالدى كەدەرگىسىز الىپ وتۋىنە ىقپال جاساپتى. وڭاي ولجاعا كەنەلگەندەردىڭ وسى ارەكەتى جارتى جىلدان كەيىن عانا اشكەرە بولدى. ولار ءبىر عانا ورداباسى اۋدانىنىڭ 60-تان استام جىلقىسىن قولدى قىلعان. ال اۋىل تۇرعىندارىنا 3 ايدا كەلگەن جالپى شىعىن 15 ملن. تەڭگەنى قۇرايدى.
ۇيىمداسقان توپ مالداردى «كاماز» كولىگىنە تيەپ, تۇركىستان قالاسىنىڭ تۇرعىندارىنا ساۋدالاعان. الايدا, مال ۇرلاۋشى – بۇرىنعى پوليتسيا قىزمەتكەرى مەن ونىڭ سىبايلاسىنا ىزدەۋ جاريالاندى. «ىشكى ىستەر ءبولىمىنىڭ قىزمەتكەرى قىزمەت بابىن اسىرا پايدالانىپ, مال ۇرلاعاندارعا كومەك كورسەتكەن. وسىعان بايلانىستى ونى ىشكى ىستەر بولىمىنەن بوساتۋ تۋرالى شەشىم قابىلداندى»,-دەيدى وبلىستىق ىشكى ىستەر دەپارتامەنتى مەملەكەتتىك ءتىل جانە اقپارات باسقارماسىنىڭ باستىعى سالتانات قاراكوزوۆا.
باقىتبەك كەنەش ۇلى.
دەرەككوز: «استانا» تەلەارناسى
