كەشە ورتالىق كوممۋنيكاتسيالار قىزمەتىندە بولعان ءداستۇرلى بريفينگتە 2017 جىلى وتكىزىلەتىن ەكسپو كورمەسىنە قاتىستى قابىلدانعان زاڭ جانە زاڭنامالىق اكتىلەرگە ەنگىزىلگەن تۇزەتۋلەر تۋرالى اڭگىمە بولدى.
كەشە ورتالىق كوممۋنيكاتسيالار قىزمەتىندە بولعان ءداستۇرلى بريفينگتە 2017 جىلى وتكىزىلەتىن ەكسپو كورمەسىنە قاتىستى قابىلدانعان زاڭ جانە زاڭنامالىق اكتىلەرگە ەنگىزىلگەن تۇزەتۋلەر تۋرالى اڭگىمە بولدى.
وكق رەسمي وكىلى التاي ءابيبۋللاەۆ «استانا ەكسپو-2017» ۇك» اق زاڭگەرلىك دەپارتامەنتىنىڭ ديرەكتورى مايا ەگىمباەۆاعا ميكروفون ۇسىنىپ, ەلىمىز ەلەڭدەپ كۇتىپ وتىرعان ايتۋلى حالىقارالىق شارالارعا زاڭنامالىق تۇرعىدان قانداي دايىندىقتار جۇرگىزىلگەنىن ايتىپ بەرۋدى سۇرادى.
قىسقا مەرزىم ىشىندە مويىنعا العان مىندەتتى ابىرويمەن اتقارۋدىڭ نەگىزى – ونى الدىمەن زاڭنامالىق تۇرعىدان بەكەمدەپ الۋ دەسەك, وسى رەتتە جۋرناليستەرگە ءسوزىن ارناعان م.ەگىمباەۆا ەكسپو وتكىزۋگە بايلانىستى بىرقاتار زاڭ اكتىلەرىنە وزگەرىستەر ەنگىزۋ قاجەت بولعانىن, الدىمەن ەكسپو تۋرالى زاڭمەن سەگىز زاڭنامالىق اكتىگە, ونىڭ ىشىندە بيۋدجەتتىك جانە سالىق كودەكستەرىنە تۇزەتۋلەر قاراستىرىلعانىن تىلگە تيەك ەتتى. ونىڭ ايتۋىنشا, ەكسپو-2017 كورمەسىن وتكىزۋگە ۇمىتكەر ەلدەردىڭ اراسىنداعى كونكۋرستىڭ اياسىندا قابىلدانعان مىندەتتەمەلەردى ورىنداۋ ماقساتىندا ەكسپو كورمەسىن ۇيىمداستىرۋدى جانە وتكىزۋدى ءجۇزەگە اسىراتىن ۇيىمدار ءۇشىن سالىقتىق جەڭىلدىكتەر, كورمە نىساندارىنا قاتىستى ساۋلەت, قالا قۇرىلىسى جانە قۇرىلىس قىزمەتىن جۇزەگە اسىرۋدىڭ وڭايلاتىلعان ءتارتىبى, سونداي-اق, شەتەلدىك ستاندارتتاردى قولدانۋ مۇمكىندىگى سەكىلدى جەڭىلدىكتەر كوزدەلىپ, وعان قوسا, بيۋدجەتتىك كودەكستە «استانا ەكسپو-2017» ۇلتتىق كومپانياسىن مەملەكەتتىك بيۋدجەتتەن جەدەل ماقساتتى سالىم تۇرىندە قارجىلاندىرۋ مۇمكىندىگى دە ەسكەرىلىپتى.
ء سوز جوق, ەكسپو نىساندارىن سالۋ قۇرىلىسشىلاردان قاجىرلى ەڭبەكتى قاجەت ەتەدى. ال ول سول جولدا مەردىگەر قۇرىلىسشىلار ءۇشىن «ارنايى ەكونوميكالىق ايماقتار تۋرالى» زاڭعا وزگەرىستەردىڭ ەنگىزىلۋى, «استانا – جاڭا قالا» اەا قاتىسۋشىسى مارتەبەسىن الۋدىڭ جەڭىلدەتىلگەن ءتارتىبىن ەنگىزۋدىڭ تيگىزەر پايداسى مول بولماق, دەگەن زاڭگەر تاعى ءبىر زاڭنىڭ تولىقتىرىلعانىن قاپەرگە سالىپ ءوتتى. ول «حالىقتىڭ كوشى-قونى تۋرالى» زاڭ ەكەن. كورمەگە قاتىسۋ ءۇشىن ەلىمىزگە كەلگەن جەكە ساناتتاعى ادامداردى تىركەۋ جانە ولاردىڭ كەلۋىنىڭ ەرەكشە ءتارتىبىن انىقتاۋعا مۇمكىندىك بەرەتىن قاعيدالارىمەن تولىقتىرىلعان زاڭنىڭ كورمەنىڭ تىنىسىن اشا تۇسەتىنىنە سەنىمىن جەتكىزگەن م.ەگىمباەۆا الەمدىك اۋقىمداعى جاڭا ەنەرگيا ساقتاۋ تەحنولوگيالارىن پايدالانۋ ەلەمەنتتەرىن قولدانىپ, ەكسپو-2017 كورمەسى اياسىندا نىسانداردى سالۋدا جانە جوبالاۋدا تاجىريبەسى بار شەتەل ماماندارىن جۇمىسقا تارتۋ ءتارتىبىن جەڭىلدەتۋدىڭ دە جوسپارلانعانىن جەتكىزدى.
«اتالعان قۇجاتتى قابىلداۋ ەكسپو-2017 نىساندارى مەن ينفراقۇرىلىمدارىن ۋاقتىلى سالۋدىڭ قاجەتتى زاڭدىق نەگىزىن قالىپتاستىرۋعا, سونىمەن قاتار, ونى وتكىزۋگە بايلانىستى پروتسەدۋرالىق جانە ۇيىمداستىرۋشىلىق ماسەلەلەردى شەشۋگە مۇمكىندىك بەرەدى جانە «ەكسپو سياقتى اۋقىمدى شارانى وتكىزۋ ەلوردامىزبەن بىرگە, تۇتاس قازاقستان رەسپۋبليكاسىنىڭ دا ەكونوميكالىق جانە ينفراقۇرىلىمدىق دامۋىن قوسىمشا ىنتالاندىراتىن بولادى», دەدى م.ەگىمباەۆا. سونداي اق, ول ەكسپو-2017 كورمەسىنىڭ نىساندارىن جوبالاۋ جانە قۇرىلىسىن جۇزەگە اسىراتىن كومپانيالاردىڭ ءتىزىمى ۇكىمەتتىڭ بولەك شەشىمىمەن انىقتالاتىنىن جەتكىزدى.
بريفينگكە ەندى ءبىر قاتىسۋشى «استانا ەكسپو-2017» ۇك» اق قۇرىلىسى بويىنشا باسقارما ءتوراعاسىنىڭ كەڭەسشىسى قاناعات ءتىلەمىسوۆ: «كورمەنى وتكىزۋ ءۇشىن بىزگە 10 مىڭ قىزمەت كورسەتۋ مامانىن دايارلاۋ قاجەت, ولاردىڭ ىشىندە 3,5 مىڭعا جۋىعى ەنەرگيانىڭ جاڭعىرتىلمالى تۇرلەرىنە جانە باسقا دا وزىق تەحنولوگيالارعا قاتىسى بار ءبىر جاقتى پروفيلدەگى جوعارى ءبىلىمدى زياتكەرلەر بولۋى ءتيىس», دەي كەلە, بۇگىنگى تاڭدا ەكسپو-2017-ءنى دايىنداۋعا 10 شتابتىڭ جاۋاپ بەرەتىنىن ايتىپ ءوتتى. سونداي-اق, ول جۋرناليستەرگە ەكسپو سىندى اۋقىمدى كورمەلەردى وتكىزۋدە تاجىريبەسى بار شەتەلدىك كادرلاردى بۇل جۇمىسقا كەڭىنەن تارتۋ كوزدەلىپ وتىرعانىنا دا ەكپىن ءتۇسىردى.
انار تولەۋحانقىزى,
«ەگەمەن قازاقستان».
