* پرەزيدەنت تاپسىرماسى قالاي ورىندالۋدا؟
وتكەن سەنبىدە پرەمەر-مينيستر سەرىك احمەتوۆتىڭ توراعالىعىمەن وتكەن كەڭەستە مەملەكەت باسشىسىنىڭ 2013 جىلدىڭ 11 قازانى كۇنى وتكەن كەڭەيتىلگەن ۇكىمەت وتىرىسىندا بەرگەن تاپسىرمالارىن جۇزەگە اسىرۋ ماسەلەلەرى تالقىلاندى.
* پرەزيدەنت تاپسىرماسى قالاي ورىندالۋدا؟
وتكەن سەنبىدە پرەمەر-مينيستر سەرىك احمەتوۆتىڭ توراعالىعىمەن وتكەن كەڭەستە مەملەكەت باسشىسىنىڭ 2013 جىلدىڭ 11 قازانى كۇنى وتكەن كەڭەيتىلگەن ۇكىمەت وتىرىسىندا بەرگەن تاپسىرمالارىن جۇزەگە اسىرۋ ماسەلەلەرى تالقىلاندى.
كەڭەس بارىسىندا كولەڭكەلى ەكونوميكامەن كۇرەستىڭ كەشەندى جوسپارىن ورىنداۋعا, الكوگولدىك ونىمدەر اينالىمىنا باقىلاۋدى كۇشەيتۋ جونىندەگى شارالارعا زاڭ نەگىزىندە قولداۋ كورسەتۋگە ەرەكشە نازار اۋدارىلدى.
سونىمەن قاتار, تۇرعىن ءۇي-كوممۋنالدىق شارۋاشىلىقتى جاڭعىرتۋدىڭ 2010-2029 جىلدارعا ارنالعان باعدارلاماسىنىڭ تيىمدىلىگىن ارتتىرۋ ماسەلەسى دە قارالدى. اتالعان ماسەلەگە بايلانىستى ۇكىمەت باسشىسى ءسوز بولىپ وتىرعان باعدارلاماعا حالىقتىڭ قاتىسۋىن جەڭىلدەتەتىن شارالاردى ەنگىزۋدىڭ, مۇنى ءتىپتى زاڭ دەڭگەيىندە شەشۋدىڭ قاجەتتىگىن اتاپ كورسەتتى.
«بۇل – شەشىمىن كۇتىپ وتىرعان باستى ماسەلەلەردىڭ ءبىرى. تكش-ءنى جاڭعىرتۋ باعىتىندا شىنايى رەفورمالار جۇرگىزۋ مەملەكەتتىڭ جانە حالىقتىڭ قاتىسۋىنسىز مۇمكىن ەمەس. بۇل ىستە بىزگە ونى جۇزەگە اسىرۋدىڭ ءتيىمدى تەتىكتەرى قاجەت», دەدى س.احمەتوۆ.
كەڭەستە مەملەكەتتىك ورگاندار باسشىلارىنىڭ ارنايى ەكونوميكالىق ايماقتار قىزمەتىنىڭ تيىمدىلىگىن ارتتىرۋ, دامۋ ينستيتۋتتارىنىڭ, زەينەتاقى قورلارىنىڭ, قارجى ۇيىمدارىنىڭ قارجىلارىن مەملەكەتتىك جەكەمەنشىك ءارىپتەستىگى جوبالارىنا تارتۋ ماسەلەلەرىنە قاتىستى ەسەپتەرى تىڭدالدى.
كەڭەس بارىسىندا ۇكىمەت باسشىسى ۇلتۇستىلىك جانە حالىقارالىق ۇيىمدارعا جۇمىس ىستەۋ ءۇشىن كادرلار ىرىكتەۋ ءىسىن نەعۇرلىم ساپالى جۇرگىزۋ قاجەتتىگىنە نازار اۋدارتتى. بۇل ىستە رەسەيلىك جانە بەلارۋستىك ارىپتەستەردىڭ نەعۇرلىم جەمىستى تاجىريبەگە قول جەتكىزگەندىگىن اتاپ كورسەتە وتىرىپ, كەدەن وداعى, ءبىرتۇتاس ەكونوميكالىق كەڭىستىك, بۇكىلالەمدىك ساۋدا ۇيىمى اياسىنداعى جۇمىستارعا قاتىستى ينتەگراتسيالىق ماسەلەلەرمەن اينالىساتىن مەملەكەتتىك ورگانداردى ينستيتۋتسيونالدىق كۇشەيتۋدىڭ ناقتى تەتىكتەرىن ازىرلەۋ جونىندە تاپسىرما بەردى.
كەڭەستە «بيزنەستىڭ جول كارتاسى-2020» باعدارلاماسى جوبالارىن جۇزەگە اسىرۋ ءجونىندەگى تاپسىرمانىڭ ورىندالۋ بارىسى تۋرالى دا ەسەپتەر تىڭدالدى.
كەڭەستى قورىتىندىلاي كەلە, ۇكىمەت باسشىسى جەكەلەگەن مەملەكەتتىك ورگاندار باسشىلارىنىڭ تاپسىرمالاردىڭ جەكەلەگەن باعىتتارىن جۇيەلى ورىنداۋ جونىندە ەلەۋلى جۇمىستار جۇرگىزگەنىن دە اتاپ كورسەتە كەتتى. سونىمەن قاتار, بىرقاتار باعىتتار بويىنشا ءىس-ارەكەتتەردى ودان ءارى كۇشەيتە ءتۇسۋ قاجەت بولىپ وتىر. تۇپتەپ كەلگەندە, مەملەكەتتىك ورگاندار باسشىلارى ەلباسىنىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ ىسىنە بارىنشا جۇمىلىپ, وسى تاپسىرمالارعا سايكەس بارلىق ماسەلەلەردى ءجىتى باقىلاۋدا ۇستاپ وتىرۋعا مىندەتتى. «ەلباسىنىڭ تاپسىرمالارى تولىقتاي جانە ناقتى ورىندالۋى ءتيىس», دەگەن ءسوزدى ۇكىمەت باسشىسى ەرەكشە ەكپىن ءتۇسىرىپ ايتتى.
سۇڭعات ءالىپباي,
«ەگەمەن قازاقستان».
